2

Mâm Ƀư Y-Pôl Nti Lah

1Hơi phung oh nâu, tơlah gâp hăn jêh ma khân may, mâu di gâp hăn mbơh ma khân may nau Brah Ndu ma nau blau ngơi mâu lah ma nau blau mĭn ôh. 2Yorlah gâp mĭn mâu ŭch gĭt ndơ êng ôh tâm phung khân may knŏng Yêsu Krist, jêh ri Yêsu Krist khĭt ta si tâm rkăng. 3Ta năp khân may gâp jêng huơi, geh nau klach jêh ri sâr săk jăn ngăn, 4nau gâp ngơi, nau gâp nti lah mâu nsing ma nau blau ngơi bơh nau blau mĭn ôh, ƀiălah bơh nau Brah Huêng Ueh tâm mpơl jêh ri ma nau brah păng, 5gay ma nau chroh khân may mra rdâk mâu di ta klơ nau blau mĭn bunuyh ôh, ƀiălah ta klơ nau brah Brah Ndu.
6Nanê̆ hên nti nau blau mĭn ma phung jêng rah vah jêh, ƀiălah nau blau mĭn mâu di bơh neh ntu aơ ôh, mâu lĕ tă bơh phung kôranh neh ntu, yorlah khân păng mra rai yot. 7Ƀiălah hên nti nau blau mĭn Brah Ndu, khlay jêh ri nđâp, nau blau mĭn nây Brah Ndu săch prăp jêh ma nau chrêk rmah he bơh lor lĕ rngôch rnôk. 8Mâu geh du huê tâm phung kôranh neh ntu aơ mâp gĭt năl nau blau mĭn nây; yorlah tơlah khân păng gĭt năl jêh nau nây; khân păng mâu mra nkhĭt Kôranh Brah nau chrêk rmah ta si tâm rkăng ôh.
9Ƀiălah tâm ban ma nau nchih jêh:
 "Ndơ măt mâu mâp saơ, tôr mâu mâp tăng.
 Jêh ri mâu mâp lăp tâm nuih n'hâm bunuyh ndơ Brah Ndu nkra jêh ma phung rŏng ma păng".
10Ƀiălah Brah Ndu tâm mpơl jêh ma he ndơ nây ma Brah Huêng Ueh, yorlah Brah Huêng Ueh sek lĕ, nđâp ma nau jru Brah Ndu. 11Yorlah mbu nơm gĭt nau mĭn bunuyh? Knŏng huêng păng nơm gŭ tâm păng yơh. Tâm ban lĕ, mâu geh nơm gĭt năl nau mĭn Brah Ndu ôh, knŏng Brah Huêng Ueh Brah Ndu yơh.
12Ƀiălah he mâu sŏk dơn ôh nau mĭn bơh neh ntu, ƀiălah Brah Huêng Ueh bơh Brah Ndu pôri mơ he dơi gĭt rbăng ndơ Brah Ndu ăn ma he ma nau păng yô̆. 13Jêh ri hên ngơi nau nây mâu di ma nau ngơi luh bơh nau blau mĭn bunuyh nti ôh, ƀiălah luh tă bơh Brah Huêng Ueh nti. Hên rblang nau ngăn brah ma nau ngơi brah. 14Bunuyh tĭng nâm nglay săk mâu sŏk dơn ôh ndơ tă bơh Brah Huêng Ueh Brah Ndu, yorlah ndơ nây jêng nau rluk ma păng, jêh ri păng mâu gĭt vât ôh, yorlah ma nau mĭn brah yơh bu dơi sek uănh lĕ rngôch ndơ nây. 15Bunuyh brah sek uănh lĕ rngôch ndơ, ƀiălah mâu geh nơm dơi sek uănh păng ôh. 16"Yorlah mbu nơm gĭt năl jêh nau mĭn Kôranh Brah, ŭch sâm nti Păng? Ƀiălah hên geh nau mĭn Brah Krist.