18

Douc Waac Mienh, Mi^kaa^yaa, Gorngv Aa^hapc

(Beiv mangc 1 Hungh Douh 22:1-28)

1Ye^ho^saa^fatv butv zoih haic aqv, maaih mengh dauh hlo. Ninh caux Aa^hapc daav cing-jaa weic jiu zuoqc. 2Jiex liuz ziex hnyangx, Ye^ho^saa^fatv mingh Saa^maa^lie caux Aa^hapc nziaauc. Aa^hapc weic Ye^ho^saa^fatv caux gan ninh mingh nyei mienh daix ba'gi yungh caux ngongh camv nyei. Aa^hapc ziouc yuoqc Ye^ho^saa^fatv caux ninh mingh mborqv Laamotv Gi^le^aatc. 3I^saa^laa^en nyei hungh, Aa^hapc, naaic Yu^ndaa nyei hungh, Ye^ho^saa^fatv, “Meih caux yie mingh mborqv Laamotv Gi^le^aatc fai?”
 Ye^ho^saa^fatv dau ninh, “Yie se hnangv meih nor. Yie nyei baeqc fingx yaac hnangv meih nyei baeqc fingx.
4Yie mbuo ziouc caux meih mingh mborqv jaax.” Mv baac Ye^ho^saa^fatv yaac gorngv mbuox I^saa^laa^en nyei hungh, “Tov naaic Ziouv ndaangc.”
5I^saa^laa^en nyei hungh ziouc heuc ⟨douc waac mienh⟩ daaih gapv zunv, maaih feix baeqv dauh. Hungh diex ziouc naaic gaax ninh mbuo, “Yie mbuo horpc zuqc mingh mborqv Laamotv Gi^le^aatc fai maiv horpc zuqc mingh?”
 Ninh mbuo dau, “Gunv mingh aqv. Weic zuqc Tin-Hungh oix zorqv wuov norm zingh jiu bun yiem hungh diex nyei buoz-ndiev.”
6Mv baac Ye^ho^saa^fatv naaic, “Yiem naaiv maiv maaih Ziouv nyei ganh dauh douc waac mienh yie mbuo haih naaic ninh fai?”
7I^saa^laa^en nyei hungh dau Ye^ho^saa^fatv, “Corc maaih dauh mienh, se Imlaa nyei dorn, Mi^kaa^yaa. Mbuo haih tov ninh tengx mbuo naaic Ziouv. Mv baac yie nzorng ninh weic zuqc ninh maiv douc jiex longx nyei jauv bun yie, kungx gorngv ciouv nyei sic hnangv.”
 Ye^ho^saa^fatv gorngv, “Hungh diex maiv dungx hnangv naaic gorngv.”
8I^saa^laa^en nyei hungh heuc dauh jien daaih ziouc gorngv, “Mingh dorh Imlaa nyei dorn, Mi^kaa^yaa, siepv-siepv nyei daaih maah!”
9I^saa^laa^en nyei hungh caux Yu^ndaa nyei hungh, Ye^ho^saa^fatv, yiem Saa^maa^lie nyei zingh gaengh ndaangc, mborqv mbiauh nyei ciangv. Gorqv-mienh zueiz jienv hungh weic yaac zorng jienv ninh mbuo nyei hungh lui. Zuangx douc waac mienh yiem ninh mbuo nyei nza'hmien douc waac. 10Ke^naa^aa^naa nyei dorn, Se^nde^ki^yaa, longc hlieqv zoux jorng. Ninh gorngv, “Ziouv hnangv naaiv gorngv, ‘Meih oix longc naaiv deix jorng zong Silie Mienh taux mietc nzengc ninh mbuo.’+”
11Zuangx douc waac mienh yaac fih hnangv nyei douc waac. Ninh mbuo gorngv, “Gunv mingh mborqv Laamotv Gi^le^aatc ziouc mborqv hingh, weic zuqc Ziouv oix zorqv wuov norm zingh jiu bun yiem hungh diex nyei buoz-ndiev.”
12Mingh heuc Mi^kaa^yaa daaih wuov dauh douc fienx mienh gorngv mbuox ninh, “Zuangx douc waac mienh dongh joux waac gorngv hungh diex oix duqv longx. Tov meih caux wuov deix dongh joux waac gorngv yaac kungx gorngv hungh diex oix duqv longx hnangv.”
13Mv baac Mi^kaa^yaa gorngv, “Yie ziangv jienv ziangh jienv nyei Ziouv laengz waac, yie nyei Tin-Hungh gorngv haaix nyungc, yie ziouc gorngv wuov nyungc hnangv.”
14Mingh taux hungh diex wuov zanc, hungh diex naaic ninh, “Mi^kaa^yaa aac, yie mbuo mingh mborqv Laamotv Gi^le^aatc horpc fai maiv horpc?”
 Mi^kaa^yaa dau, “Gunv mingh mborqv yaac mborqv duqv hingh. Ninh mbuo oix zuqc yiem hungh diex nyei buoz-ndiev.”
15Mv baac hungh diex gorngv mbuox ninh, “Yie bun meih laengz mbu'ziex nzunc waac, meih dengv Ziouv nyei mbuox caux yie kungx gorngv zien waac hnangv?”
16Mi^kaa^yaa ziouc gorngv, “Yie buatc I^saa^laa^en nyei zuangx mienh nzaanx mingh yiem mbong hnangv ba'gi yungh guanh maiv maaih mangc yungh nyei mienh goux nor. Ziouv yaac gorngv, ‘Naaiv deix baeqc fingx maiv maaih ziouv. Oix zuqc bun ninh mbuo gorqv-mienh baengh orn nyei nzuonx gorqv-mienh nyei biauv.’ ”
17I^saa^laa^en nyei hungh gorngv mbuox Ye^ho^saa^fatv, “Yie gorngv jiex mbuox meih maiv zeiz? Naaiv dauh maiv douc jiex longx nyei waac bun yie. Ninh kungx douc ciouv nyei waac hnangv.”
18Mi^kaa^yaa aengx gorngv, “Hnangv naaiv, muangx Ziouv nyei waac maah! Yie buatc Ziouv zueiz ninh nyei hungh weic, yaac buatc gu'nguaaic lungh nyei zuangx fin-mienh souv jienv ninh nyei zaaix maengx, mbiaauc maengx. 19Ziouv gorngv, ‘Haaix dauh oix nduov I^saa^laa^en nyei hungh, Aa^hapc, mingh Laamotv Gi^le^aatc, yiem wuov zuqc daic?’
 “Maaih dauh hnangv naaiv nor gorngv, maaih dauh hnangv wuov nor gorngv.
20Nqa'haav maaih dauh cuotv daaih souv jienv Ziouv nyei nza'hmien gorngv, ‘Yie oix nduov ninh mingh.’
 “Ziouv naaic ninh, ‘Meih oix longc haaix nyungc za'eix?’
21“Ninh gorngv, ‘Yie oix mingh zoux bun ninh nyei zuangx douc waac mienh gorngv-baeqc.’
 “Ziouv aengx gorngv, ‘Hnangv naaic meih za'gengh haih nduov duqv zuqc ninh aqv. Gunv mingh zoux maah!’
22“Ih zanc Ziouv zoux bun meih nyei naaiv deix douc waac mienh yietc zungv gorngv-baeqc. Ziouv zungv dingc ziangx bun meih oix zuqc domh zeqc naanc.”
23Ke^naa^aa^naa nyei dorn, Se^nde^ki^yaa, mingh taux, mbaix Mi^kaa^yaa nyei hmien yaac naaic ninh, “Ziouv nyei Singx Lingh cuotv yie yangh haaix mingh caux meih gorngv waac laeh?”
24Mi^kaa^yaa dau, “Meih bieqc biauv gu'nyuoz nyei yietc qongx weic bingx jienv wuov hnoi meih ziouc duqv buatc aqv.”
25I^saa^laa^en nyei hungh gorngv, “Zorqv Mi^kaa^yaa fungx nzuonx jiu bun Aamon saengv-ziouv caux hungh nyei dorn, Yo^aatc. 26Oix zuqc gorngv mbuox ninh mbuo, ‘Hungh diex hnangv naaiv nor gorngv, ‘Zorqv naaiv dauh lov wuonx jienv loh, bun wuom caux njuov gaux yungz jienv maengc hnangv, zuov yie baengh orn nyei nzuonx daaih.’+”
27Mi^kaa^yaa gorngv, “Se gorngv meih haih duqv baengh orn nyei nzuonx daaih, se maiv zeiz Ziouv longc yie gorngv waac.” Ninh aengx gorngv, “Zuangx baeqc fingx aac, tov muangx longx oc.”

Aa^hapc Yiem Laamotv Gi^le^aatc Zuqc Daix Daic

(Beiv mangc 1 Hungh Douh 22:29-35)

28I^saa^laa^en nyei hungh caux Yu^ndaa nyei hungh, Ye^ho^saa^fatv, ziouc mingh Laamotv Gi^le^aatc. 29I^saa^laa^en nyei hungh gorngv mbuox Ye^ho^saa^fatv, “Bieqc mingh mborqv jaax nyei ziangh hoc yie zorng hnangv benx ganh dauh mv baac meih zorng jienv meih nyei hungh lui-ndaauv.” I^saa^laa^en nyei hungh ziouc zorng benx ganh dauh, bieqc mingh mborqv jaax.
30Silie nyei hungh paaiv ninh nyei mborqv jaax cie nyei baeng-bieiv, “Maiv dungx caux haaix dauh mborqv jaax maiv gunv hlo faix. Kungx caux I^saa^laa^en nyei hungh mborqv hnangv.” 31Mborqv jaax cie nyei baeng-bieiv buatc Ye^ho^saa^fatv ninh mbuo gorngv, “Naaiv dauh za'gengh I^saa^laa^en nyei hungh.” Ninh mbuo ziouc daaux sin mingh mborqv ninh. Mv baac Ye^ho^saa^fatv heuc. Ziouv aengx tengx ninh aqv. Tin-Hungh dorh ninh mbuo leih nqoi ninh aqv. 32Mborqv jaax cie nyei baeng-bieiv buatc maiv zeiz I^saa^laa^en nyei hungh, ninh mbuo ziouc daaux cie, maiv zunc Ye^ho^saa^fatv aqv.
33Mv baac maaih dauh mienh gouv-mueic buonv yietc nzitv forng yaac zuqc I^saa^laa^en nyei hungh yiem ninh mborqv jaax nyei zorng-zuqv yietc kuaaiv yietc kuaaiv nyei mbu'ndongx-qangx. Hungh diex ziouc mbuox zaangv ninh nyei cie wuov dauh, “Daaux cie tor yie cuotv mborqv jaax ciangv. Yie zuqc mun mi'aqv.” 34Wuov hnoi ziangh hnoi mborqv jaax hniev nyei. Ninh mbuo yaac sengh jienv hungh diex yiem ninh nyei cie gu'nyuoz huin mangc jienv Aalam Mienh taux lungh hmuangx. Lungh maanz-hmuangx ninh daic mi'aqv.