9
Vaajtswv kev teem txem
1Kuv pum Yawmsaub sawv ntawm lub thaaj xyeem ib saab hab nwg has tas,
“Ca le ntaus tej hauv ncej
ua kuas tej paws rooj ua zug quas kais,
hab ca le muab luv ua tej dwb daim
poob rua sau cov pejxeem suavdawg taubhau.
Cov kws tseed tshuav nyob,
kuv yuav xuas ntaaj tua pov tseg,
yuav tsw muaj ib tug twg tswv moog tau,
yuav tsw dim ib tug hlo le.
2Txawm yog puab khawb moog txug tub tuag teb
los kuv txhais teg yuav nteg puab hov ntawd lug.
Txawm yog puab nce moog txug sau ntuj,
los kuv yuav coj puab nqeg hov ntawd lug.
3Txawm yog puab tswv nraim
rua sau lub ncov roob Khamee,
los kuv yuav nrhav puab
hab nteg puab hov ntawd lug.
Txawm yog puab tswv nraim
rua huv qaab thu havtxwv kuas dhau kuv qhov muag,
los kuv yuav has rua tug zaaj kws nyob huv
kuas tum puab.
4Txawm yog puab raug nteg coj moog
rua ntawm yeeb ncuab xubndag lawm,
los kuv yuav khaiv tej nav ntaaj nav rag
tua puab hov ntawd.
Kuv yuav tsom ntsoov saib puab rua qhov phem,
tsw yog saib rua qhov zoo.”
5Vaajtswv Yawmsaub
kws muaj fwjchim luj kawg nkaus,
nwg kov lub nplajteb
mas lub nplajteb yaaj ntshws taag,
hab txhua tug kws nyob huv
yuav quaj ntsuag.
Lub nplajteb phwj tuaj yaam le tug dej Nai,
hab rov nqeg ib yaam le tug dej Nai huv Iyi tebchaws.
6Tug kws tswm nwg lub chaw nyob rua txheej sau ntuj,
hab tswm lub ntuj khwb lub nplajteb,
yog tug kws hu dej havtxwv tawm tuaj
hab muab hliv rua sau lub nplajteb,
nwg lub npe hu ua Yawmsaub.
7Yawmsaub has tas, “Cov Yixayee 'e,
mej tsw thooj le cov tuabneeg Khuj rua kuv lov?
Kuv tsw coj cov Yixayee tawm huv Iyi tebchaws lug lov,
hab tsw tau coj cov Filixatee tawm huv Khathau tebchaws
hab cov Alaa tawm huv Khi tebchaws lug lov?
8Saib nawj, Vaajtswv Yawmsaub lub qhov muag
saib ntsoov lub tebchaws kws ua txhum muaj txem.
Kuv yuav muab lub tebchaws hov
rhuav tshem kuas pluj plag huv lub nplajteb moog,
tassws kuv yuav tsw rhuav tshem
Yakhauj caaj ceg kuas tu noob nrho.”
Yawmsaub has le nuav ntaag.
9“Kuv yuav has hab kuv yuav tshau cov Yixayee
huv plawv ib tsoom tebchaws suavdawg
ib yaam le muab tshaus lug tshau,
tassws tsw muaj ib lub qai zeb yuav poob rua huv aav.
10Kuv haiv tuabneeg kws ua txhum
txhua tug yuav tuag taag rua nav ntaaj,
puab yog cov kws has tas,
‘Kev phem yuav lawv tsw cuag hab tsw raug peb.’ ”
Cov Yixayee yuav rov vaam meej le qub
11“Nub ntawd kuv yuav tsaa Tavi
lub tsev ntaub kws qaug lawd sawv dua tshab,
hab khu tej ntu kws tawg
hab tsaa tej kws pob taag ua tej nam pawg dua tshab,
hab tswm dua tshab
kuas zoo yaam le yaav thau u.
12Puab txhad le txeeb tau tej kws tshuav
huv Entoo tebchaws
hab huv txhua lub tebchaws kws hu lawv le kuv lub npe
lug ua puab teej puab tug.”
Yawmsaub kws yuav ua tej nuav
has le nuav ntaag.
13Yawmsaub has tas,
“Saib maj, lub caij lub nyoog saamswm lug
mas tug kws laij teb yuav laij yeej tug kws hlais,
hab tug kws tsuam kua txwv maab
yuav tsuam yeej tug kws cog noob txwv maab.
Tej cawv txwv maab qaab zwb
yuav nrug sau tej roob lug,
hab yuav ndwg sau tej pov roob huvsw lug.
14Kuv yuav pub kuv haiv tuabneeg Yixayee
rov vaam meej le qub.
Puab yuav tswm tej moos kws pob taag dua tshab
hab nyob rua huv,
puab yuav cog vaaj txwv maab
hab tau cawv txwv maab lug haus,
puab yuav cog vaaj txwv ntoo
hab tau noj tej txwv hov.
15Kuv yuav cog puab rua huv puab lub tebchaws,
puab yuav tsw raug muab dob tawm
huv lub tebchaws kws kuv tub pub rua puab dua le lawm.”
Mej tug Vaajtswv Yawmsaub
has le nuav ntaag.