12

  1Haaix dauh a'hneiv muangx gorngv-njaaux nyei waac, wuov dauh hnamv wuonh zaang,
  mv baac haaix dauh nzorng gorngv-hemx nyei waac se hngongx nyei.
  2Kuv mienh bun Ziouv a'hneiv,
   mv baac daav orqv za'eix nyei mienh, Ziouv oix dingc zuiz.
  3Zoux orqv sic maiv tengx mienh liepc duqv wuonv,
   mv baac kuv mienh liepc duqv wuonv hnangv njiec nzungh ndo nor.
  4Ziangh horngh nyei auv se hnangv nqox nyei ningv,
   mv baac maiv hiuv duqv nyaiv nyei auv, se hnangv zoux bun ninh nyei nqox nyei mbungv latv.
  5Kuv mienh hnamv cuotv nyei jauv se baengh fim nyei,
   mv baac orqv mienh caangh laangh nyei waac se guv guaix nyei sic.
  6Orqv mienh nyei waac zuov jienv daix mienh,
   mv baac hnyouv zingx mienh nyei nzuih gorngv nyei waac njoux duqv mienh.
  7Orqv mienh zuqc mietc ziouc baac mi'aqv,
   mv baac kuv mienh nyei zeiv-fun yiem duqv wuonv.
  8Mienh ziux ninh nyei cong-mengh duqv mienh ceng,
   mv baac hnyouv ngau hnyouv njuotv nyei mienh zuqc mienh mangc piex.
  9Benx pou-tong mienh weic ganh zoux gong yungz maengc,
   se gauh longx ceng ganh hlo mv baac maiv maaih hnaangx nyanc.
  10Kuv mienh korv-lienh ninh mbuo nyei saeng-kuv nyei maengc,
   mv baac orqv mienh korv-lienh nyei jauv se doqc nyei.
  11Haaix dauh laih ganh nyei lingh deic duqv laangh ziqc nyanc beuv,
   mv baac haaix dauh gan maiv lamh longc nyei jauv hnamv maiv tong haaix nyungc.
  12Orqv mienh oix longc mienh waaic mienh caangv daaih nyei ga'naaiv,
   mv baac kuv mienh nyei gorn yiem duqv wuonv.
  13Orqv mienh nyei nzuih gorngv dorngc nyei waac zoux koux hlopv zuqc ninh ganh,
   mv baac kuv mienh biaux ndutv zuqc kouv nyei jauv.
  14Mienh nyei nzuih gorngv nyei waac bun ganh duqv longx buangv hnyouv,
   mienh nyei buoz zoux nyei gong yaac winh bun ganh.
  15Mienh hngongx mienh zoux nyei sic ziux ganh nyei m'zing mangc zoux duqv horpc,
   mv baac cong-mengh mienh a'hneiv muangx mienh njaaux.
  16Mienh hngongx mienh yietv qiex jiez liemh zeih zieqv duqv aqv,
   mv baac guai nyei mienh zuqc mienh gorngv doqc corc hnangv maiv haiz nor.
  17Haaix dauh gorngv ziepc zuoqv nyei waac kungx gorngv duqv zingx nyei hnangv,
   mv baac zoux jaav zorng-zengx nyei mienh gorngv gorngv-baeqc nduov nyei waac.
  18Mienh nzuih siepv gorngv waac hnangv nzuqc ndaauv baqv mienh,
   mv baac cong-mengh mienh nyei waac haih hnangv ndie zorc mienh.
  19Mienh gorngv zien nyei waac, waac yietc liuz yiem,
  mv baac mienh gorngv gorngv-baeqc nyei waac se yiem nduqc dangh hnangv.
  20Daav orqv za'eix nyei mienh maaih gorngv-baeqc nduov mienh nyei hnyouv,
   mv baac daav longx nyei za'eix wuov deix duqv njien-youh.
  21Kuv mienh maiv zuqc haaix nyungc zeqc naanc hoic,
   orqv mienh zungv zuqc zeqc naanc camv aqv.
  22Mienh nyei nzuih gorngv-baeqc, Ziouv gamh nziev haic,
   mv baac ziepc zuoqv nyei zoux wuov deix, ninh a'hneiv haic.
  23Mienh guai mienh gem jienv ninh maaih nyei wuonh zaang,
   mv baac mienh hngongx mienh zunh cuotv hngongx nyei sic.
  24Mienh jienh mienh nyei buoz duqv gunv,
   mv baac mienh lueic mienh zuqc aapv zoux gong.
  25Mienh hnyouv nzauh faanh haiz hnangv ga'naaiv ngatv jienv hniev nyei,
   mv baac yietc joux longx nyei waac bun ninh haiz hnyouv longx.
  26Kuv mienh dorh ninh nyei juangc laangz mienh,
   mv baac orqv mienh nyei jauv bun mienh mingh dorngc.
  27Mienh lueic mienh maiv mingh buonv orv,
  mienh jienh mienh duqv jaaix nyei zinh zoih.
  28Yiem zoux horpc nyei jauv bun mienh maaih maengc ziangh,
   mv baac orqv nyei jauv bun mienh mingh zuqc daic.