2

Nau Tâm Rklaih Ma Nau Yô̆ Bơh Brah Ndu

1Dôl khân may khĭt jêh yor gao nau vay jêh ri nau tih, 2nau khân may tĭng tông kăl e, tĭng nâm nau mơng ta neh ntu aơ, tĭng nâm hđăch brah mhĭk tâm ndâr tŭk, brah nây gŭ pah kan aƀaơ aơ tâm phung kon ƀư rlăng. 3Kăl e lĕ rngôch he jêng tâm ban pô nây lĕ. He gŭ rêh tĭng nâm nau nglay săk kơnh. He ƀư tĭng nâm nau nglay săk jêh ri nau mĭn rŏng. Pôri he jêng kon ma nau hăt janh dadê nâm bu lĕ rngôch bunuyh êng. 4Ƀiălah Brah Ndu, ndrŏng nau yô̆, yor nau Păng rŏng ma he toyh ngăn. 5Dôl he khĭt yor nau tih he, Păng ăn he dâk rêh tay tâm Brah Krist (pôri ma nau yô̆ yơh khân may hŏ tâm rklaih jêh khân may ). 6Păng hŏ ăn rêh jêh he ndrel ma Brah Krist, jêh ri ăn he gŭ tâm trôk tâm Yêsu Krist, 7gay ma tâm mpơl tâm rnôk kăndơ̆ nau păng yô̆ mâu blau dŭt, ma nuih n'hâm ueh păng ăn jêh ma he tâm Yêsu Krist.
8Pôri, yor nau yô̆ yơh khân may rklaih jêh nau tih. Nau nây mâu di luh tă bơh khân may ôh, ƀiălah bơh Brah Ndu ăn; 9mâu di yor kan he ôh; pô nây mơ lơi ăn geh bunuyh tâm rnê ma păng nơm. 10Yorlah he jêng kan păng. Păng rhăk njêng jêh he tâm Yêsu Krist ma kan ueh Brah Ndu nkra jêh bơh lor, gay ma he kơt ƀư.

Yor si tâm rkăng Yêsu Krist phung bu năch jêh ri phung Yuđa tâm rnglăp jêng ngih ma Brah Ndu

11Pôri kah gĭt hom nau khân may jêng phung bu năch tĭng nâm nglay săk dôl nây, jêh ri phung koh ntâu ma ti bunuyh tâm nglay săk kuăl khân may phung mâu koh ntâu. 12Rnôk nây khân may mâu geh Brah Krist ôh; mâu geh nau vay dơi jêng phung ƀon lan Israel ôh; jêng bu năch ma nau tâm rnglăp bơh nau ton tâm neh ntu mâu geh nau kâp gân jêh ri mâu geh Brah Ndu ôh. 13Kăl e ri khân may gŭ ngai, ƀiălah aƀaơ aơ tâm Yêsu Krist khân may gŭ dăch jêh yor mham Yêsu Krist. 14Yor Păng jêng nau đăp mpăn ndrăng he. Păng yơh ăn bar mpôl băl jêng nguay. Păng ƀư rai jêh mpêr king nau tâm nkhah nkhat he. 15Păng ƀư rai nau rlăng tâm pă nkhah. Ma mham Păng nơm Păng ƀư rai nau vay Păng ntăm jêh. Pôri yơh Păng ăn nau đăp mpăn dôl Păng njêng bar mpôl băl jêng du mpôl bunuyh mhe tâm Păng nơm. 16Jêh ri Păng tâm rnglăp ăn jêng nguay săk jăn đah Brah Ndu yor si tâm rkăng; ta nây Păng ƀư rai lơi nau rlăng ndrăng khân păng nơm. 17Păng văch jêh mbơh nau đăp mpăn ma khân may phung gŭ ngai, jêh ri ma phung gŭ dăch. 18Yorlah ma Păng yơh phung he bar dơi hăn dăch Mbơ̆ tâm nguay Brah Huêng Ueh.
19Pôri yơh, khân may mâu hôm jêng phung bu năch ôh, mâu lĕ jêng bunuyh bơh padih, ƀiălah khân may jêng phung ƀon lan ndrel ma phung kloh ueh, jêh ri jêng mpôl băl Brah Ndu. 20Bu rdâk khân may ta klơ ntur phung kôranh oh mon jêh ri phung kôranh nơm mbơh lor, Yêsu Krist Nơm lĕ jêng lŭ njônh ngih, 21lĕ du mlâm ngih rdâk ta klơ lŭ nây tâm khan ueh jêh, gay ma jêng du mlâm ngih kloh ueh tâm Kôranh Brah. 22Ma Păng yơh, khân may tâm ban lĕ rdâk ndrel, gay ma jêng du mlâm ngih ma Brah Ndu tâm Brah Huêng Ueh.