16

1Njuăl hom âk kon biăp jêng pi ma kôranh chiă uănh, bơh ƀon Sêla ta trong rgăn bri rdah, ta yôk Kon Bu ur Siôn 2Phung bu ur Môap ta mbŏng thơl ntŭk dơi rgăn dak krong Arnôn jêng tâm ban ma sĭm mpăr du, tâm ban ma kon sĭm bu ntrŭt du tă bơh rsuăn.
3Tâm nchră an ƀư nau sŏng. Ta nar nklang bôk ăn gui nkâm may jêng tâm ban ma dôl măng; pôn lơi phung bu nsot, lơi rlăng ôh ma nơm du. 4Ăn phung Môap bu nsot jêh gŭ ndrel ma may; ăn may jêng ntŭk khân păng krap bơh nơm ƀư rai. Nơm tŭn jot mra roh, nau ƀư rai mra rlu; Jêh ri nơm tŭn jot mra du bơh bri neh. 5Bu mra rdâk du rplay sưng hađăch ma nau rŏng răp jăp, du huê bơh ngih bok Y-David, du huê phat dôih joi nau di, jêh ri gơnh ƀư nau sŏng srăng.
6Hên tăng jêh nau phung Môap sưr, nau păng sưr ngăn, nau păng ra nam, jêh ri nau păng mưch, ƀiă lah nau păng sưr jêng dơm dam. 7Yor nây phung Môap nhĭm nhhiăng, lĕ rngôch nhĭm nhhiăng ma bri Môap. Ăn khân may rngot klâng rêh ni ngăn. Yor roh ƀănh play kriăk ƀâu ƀon Kir Harêsat. 8Neh mir ƀon Hêsbôn jêh ri tơm play kriăk ƀâu ƀon Sipma kroh klêu. Phung kôranh phung ndŭl mpôl bunuyh jot lơi jêh n'gĭng ueh lơn păng, n'gĭng nây tât jêh ta ƀon Jaser, nchah hăn tât ta bri rdah. Nkeh păng ntoch jong, n'ho tât ta kơh dak mƀŭt.
9Yor nây gâp mra nhĭm ma tơm play kriăk ƀâu ƀon Sipma tâm ban ma ƀon Jaser nhĭm. Ơ ƀon Hêsbôn jêh ri ƀon Êlêala, gâp mra ƀư bĕ may ma dak măt, nau bu nter hâk yor play dŭm may jêh ri play yăn rek may gŭ rklăk. 10Nau rhơn jêh ri nau maak bu ăn roh jêh bơh đang tơm play; bu mâu mprơ ôh tâm đang play kriăk ƀâu, mâu lĕ geh nau răm maak. Mâu geh nơm jot play kriăk ƀâu tâm thŭng, Yor lah gâp ăn lôch jêh nau bu răm maak. 11Nuih n'hâm gâp nđêng tâm ban ma gong rêng yor bri Môap, jêh ri yor ƀon Kin Hêres. 12Tơ lah phung Môap hăn ta ntŭk prêh khân păng, păng kanŏng ƀư rgănh păng nơm tơ lah păng lăp tâm ntŭk kloh ueh păng gay mbơh sơm, păng mâu mra dơi ôh.
13Aơ yơh jêng nau Yêhôva ngơi jêh di ma phung Môap. 14Ƀiă lah aƀaơ Yêhôva lah. "Tâm pe năm tâm bon ma năm bunuyh bu nkhôm, nau chrêk rmah phung Môap jêh ri phung bunuyh păng jêng âk mra plăch jêng ndơ bu tâm rmot, jêh ri phung hôm mra jêng djê̆ ngăn jêh ri rơ-ia." (rdja)