20

Douc Waac Gorngv I^yipv Caux E^ti^o^bie

1Atc^si^lie nyei hungh, Saagorn, paaiv ninh nyei domh baeng-bieiv mingh Atc^ndotc wuov hnyangx, ninh ziouc mingh mborqv aengx caangv duqv wuov norm zingh mi'aqv. 2Wuov zanc, Ziouv longc Aamortv nyei dorn, I^saa^yaa, douc waac. Ziouv mbuox ninh, “Meih jaiv nqoi meih sai jaaiv nyei la'maah ndie-cou yaac tutv nqoi heh.” I^saa^yaa ziouc ei jienv zoux, sin laengh gaengv nyei, heh yaac maiv daapc, jiex naaiv jiex wuov.”
3Ziouv gorngv, “Hnangv yie nyei bou, I^saa^yaa, sin laengh gaengv nyei, heh yaac maiv daapc, jiex naaiv jiex wuov buo hnyangx weic zoux jangx-hoc caux beiv nyei jauv donv I^yipv caux E^ti^o^bie, 4hnangv naaic Atc^si^lie hungh oix guaatv I^yipv Mienh mingh yaac caangv E^ti^o^bie Mienh, maiv gunv gox lunx, sin laengh gaengv nyei, heh yaac maiv daapc, guh kuotv-norm cuotv, bun I^yipv Mienh zuqc nyaiv. 5Kaux E^ti^o^bie maaih lamh hnamv yaac bungx waac-maux I^yipv wuov deix ziouc gamh nziex yaac zuqc nyaiv. 6Wuov hnoi yiem naaiv diuh koiv-hlen nyei mienh ziouc gorngv, ‘Mangc maah! Yie mbuo maaih lamh hnamv nyei yaac biaux mingh lorz tengx yie mbuo biaux ndutv Atc^si^lie Mienh wuov deix buangh nyei sic. Wuov nyungc, yie mbuo ni? Yie mbuo hnangv haaix nor haih biaux duqv ndutv?’+”