55

Nau Yô̆ Nhhơr Dơm Dam Ma Lĕ Rngôch

1"Hơi, ăp nơm ji hir, văch ta dak; jêh ri mbu nâm mâu geh prăk ôh, văch hom, rvăt jêh ri sa! Văch hom, rvăt dak play kriăk ƀâu jêh ri dak toh ndrôk mâu geh ma prăk, mâu geh ma rnoh ôh. 2Mâm ƀư khân may dâk prăk ma ndơ mâu jêng ndơ sông sa ôh, jêh ri pah kan ma ndơ mâu blau hơm ôh? Iăt gâp na nê̆, sa hom moh ndơ, jêh ri ƀư maak khân may nơm ma ndơ sa ueh kah. 3Rkêng hom tôr khân may jêh ri văch hom ma gâp; gŭ iăt hom gay ma huêng khân may dơi rêh; jêh ri gâp mra ƀư ma khân may nau tâm rnglăp n'ho ro, nâm bu ntŭk nau rŏng răp jăp ngăn ma Y-David. 4Aơ, gâp ăn păng jêng nơm mbơh ngăn ma phung ƀon lan. 5Aơ, khân may mra kuăl phung ndŭl mpôl khân may mâu gĭt năl ôh, jêh ri phung ndŭl mpôl mâu gĭt năl khân may mra nchuăt ran ta khân may, yor Yêhôva Brah Ndu khân may, jêh ri yor Nơm Kloh Ueh Phung Isarael, yor lah păng ƀư jêh ăn chrêk rmah khân may."
6Joi hom Yêhôva dôl bu dơi saơ păng; kuăl mbơh sơm hom ma păng dôl păng gŭ dăch. 7Ăn phung ƀai chalơi hom trong păng nơm, jêh ri ăn bunuyh kue chalơi nau păng mĭn. Ăn păng nơm sĭt ma Yêhôva, gay ma păng geh nau yô̆, ma Brah Ndu he yor lah păng mra yô̆ an rmeh ler.
8"Yor lah gâp mĭn mâu jêng nau khân may mĭn ôh, trong khân may mâu lĕ jêng trong gâp." Yêhôva lah: 9"Yor lah tâm ban ma trôk prêh lơn ma neh ntu, pô nây lĕ trong gâp jêng prêh lơn ma trong khân may, jêh ri nau gâp mĭn prêh lơn ma nau khân may mĭn. 10Yor lah tâm ban ma dak mih jêh ri pler jŭr bơh trôk, mâu hôm sĭt ta nây ôh, ƀiă lah djrah neh, ăn păng hon ndơ jêh ri kao, jêh ri ăn ntil ma nơm srih jêh ri ndơ sông sa ma nơm sa, 11tâm ban pô nây lĕ nau gâp ngơi luh bơh trôm mbung gâp mra jêng păng mâu mra sĭt ma gâp dơm dam ôh, ƀiă lah păng mra ƀư jêh nau gâp ŭch, jêh ri păng mra dơi tâm nau gâp mprơh păng hăn jêh. 12Yor lah khân may mra hăn ma nau răm, jêh ri bu mra njŭn khân may ma nau đăp mpăn; Yôk jêh ri dor mra mprănh nau mprơ ta năp khân may, jêh ri lĕ rngôch tơm si tâm bri mra tap ti. 13Nsro ma lok, tơm si n'ho mra hon; nau nây mra jêng ndơ kah gĭt ma Yêhôva, nau tâm mbên n'ho ro bu mâu dơi ngroh ôh."