9

E^saa^laa Daux Gaux Nyiemc Zuangx Baeqc Fingx Nyei Zuiz

1Naaiv deix jauv-louc jiex liuz, I^saa^laa^en Mienh nyei bieiv zeiv daaih lorz yie. Ninh mbuo gorngv, “I^saa^laa^en Mienh, liemh sai mienh caux Lewi Mienh, maiv caux weih gormx nyei ganh fingx mienh bun nqoi. Ninh mbuo zuotc jienv Kaa^naa^an Mienh, Hitv^tai Mienh, Be^litv^si Mienh, Ye^mbutc Mienh, Ammon Mienh, Mo^apc Mienh, I^yipv Mienh, caux Aa^mo^lai Mienh zoux nyei yietc zungv youx haic, gamh nziev haic nyei sic. 2I^saa^laa^en Mienh weic ninh mbuo ganh yaac weic ninh mbuo nyei dorn longc naaiv deix ganh fingx mienh nyei sieqv zoux auv. Ninh mbuo ziouc bun Tin-Hungh nyei cing-nzengc nyei baeqc fingx zorpc jienv weih gormx nyei ganh fingx mienh. Zoux bieiv zeiv nyei mienh caux zoux jien nyei mienh zoux dorngc naaiv deix sic gauh camv.”
3Yie yietv haiz naaiv deix sic, yie nzauh haic ziouc betv yie nyei lui caux domh lui-ndaauv yaac cun yie nyei mba'biei caux siaam, hnyouv mun haic, zueiz jienv wuov. 4Da'faanh weic gamh nziex I^saa^laa^en Mienh nyei Tin-Hungh nyei waac sin zinx, laaix zuqc guaatv mingh aengx nzuonx daaih nyei mienh zoux dorngc nyei zuiz wuov deix, daaih gapv zunv yie naaiv. Yie hnyouv mun haic, zueiz jienv wuov taux lungh maanz-hmuangx, buov ga'naaiv ziec bun Tin-Hungh nyei ziangh hoc.
5Lungh maanz-hmuangx taux ziec nyei ziangh hoc, yie yiem yie zueiz jienv hnyouv mun wuov norm dorngx jiez sin daaih. Yie corc zuqv jienv yie betv nyei lui caux domh lui gueic njiec ndau sung buoz faaux, caux Ziouv, yie nyei Tin-Hungh, daux gaux. 6Yie gorngv,
“O yie nyei Tin-Hungh aac, yie za'gengh haiz nyaiv haic, zungv maiv gaamv cau hmien mangc yie nyei Tin-Hungh, weic zuqc yie mbuo nyei zuiz gauh hlang yie mbuo nyei m'nqorngv. Yie mbuo zoux dorngc nyei zuiz ndui jienv taux gu'nguaaic lungh.
7Yiem loz-hnoi yie mbuo nyei ong-taaix taux ih zanc yie mbuo zoux dorngc nyei zuiz hniev haic. Laaix yie mbuo nyei zuiz, yie mbuo, liemh hungh diex caux sai mienh, zuqc yiem ganh norm guoqv nyei hungh nyei buoz-ndiev ziouc zuqc nzuqc ndaauv daix, zuqc caangv, zuqc luv, zuqc diev nyaiv taux ndiev, hnangv ih jaax hnoi nor.
8“Mv baac ih zanc Ziouv, yie mbuo nyei Tin-Hungh, weic naaiv deix nangv nyei ziangh hoc, ceix en bun yie mbuo. Ninh liouh deix yie mbuo zengc njiec nyei mienh nzuonx daaih maaih dorngx wuonv nyei yiem ninh nyei singx dinc, yaac bun yie mbuo fingv daaih yiem yie mbuo zuqc zoux nouh nyei ziangh hoc duqv heng deix. 9Yie mbuo zuqc zoux nouh, mv baac zoux nouh nyei ziangh hoc yie mbuo nyei Tin-Hungh maiv guangc yie mbuo. Ninh bun yie mbuo yiem Besie Hungh nyei nza'hmien biux mengh ninh hnamv yie mbuo, bun yie mbuo nzuonx daaih ceix yie mbuo nyei Tin-Hungh nyei biauv, aengx zorc baaic waaic nyei dorngx. Ninh yaac beu jienv yie mbuo yiem Yu^ndaa caux Ye^lu^saa^lem.
10“O yie mbuo nyei Tin-Hungh aac, meih ndongc naaic tengx yie mbuo, ih zanc yie mbuo oix zuqc hnangv haaix nor gorngv? Weic zuqc yie mbuo zuangx mienh guangc meih hatc nyei waac, 11dongh meih longc meih nyei bou, zuangx douc waac mienh, jiu bun yie mbuo nyei waac gorngv, ‘Meih mbuo oix bieqc mingh duqv nzipc benx meih mbuo nyei buonc deic-bung se maaih uix nyei deic-bung. Yiem wuov nyei mienh zoux youx haic, gamh nziev haic nyei sic, yiem naaiv bung mingh gormx taux wuov bung ziouc maaih uix nzengc. 12Weic naaiv maiv dungx bungx meih mbuo nyei sieqv bun ninh mbuo nyei dorn longc. Yaac maiv dungx lorz ninh mbuo nyei sieqv bun meih mbuo nyei dorn longc zoux auv. Meih mbuo yietc liuz maiv dungx tengx ninh mbuo duqv longx fai ceix ninh mbuo benx daaih. Hnangv naaic meih mbuo ziouc henv daaih, duqv nyanc naaiv norm deic-bung longx nyei ga'naaiv, yaac liouh deic-bung bun meih mbuo nyei zeiv-fun yietc liuz duqv nzipc.’
13“Yie mbuo nyei Tin-Hungh aac, laaix yie mbuo ganh zoux nyei waaic sic caux zoux dorngc nyei domh zuiz zuqc buangh nyei nyungc-nyungc sic, meih dingc nyei zungv gauh heng yie mbuo nyei zuiz, yaac maiv puix yie mbuo horpc zuqc duqv nyei. Meih yaac liouh yie mbuo naaiv guanh zengc njiec nyei mienh. 14Yie mbuo corc oix zuqc aengx baamz meih nyei leiz-latc ziouc caux zoux youx haic, gamh nziev nyei sic wuov deix mienh dorng jaa fai? Se gorngv yie mbuo hnangv naaiv nor zoux, meih zungv oix qiex jiez, mietc yie mbuo naaiv guanh zoqc nyei mienh, maiv bun yie mbuo zengc yietc dauh. 15O Ziouv, I^saa^laa^en Mienh nyei Tin-Hungh aac, meih se baengh fim nyei. Yie mbuo naaiv guanh zengc njiec nyei mienh corc biaux ndutv daaih taux ih hnoi. Ih zanc yie mbuo dorng jienv meih nyiemc yie mbuo zoux dorngc nyei zuiz, weic zuqc maaih naaiv deix zuiz maiv maaih haaix dauh haih duqv yiem meih nyei nza'hmien.”