1

Ntŭk Dơn Samƀŭt Jêh Ri Nau Khâl

1Y-Yakơ jêng oh mon Brah Ndu jêh ri Brah Yêsu Krist nchih khâl ma phung jât ma bar nuyh mpôl băl nchah du êng êng.

Nau Rlong Uănh

2Hơi phung oh nâu, tơlah khân may mâp ma nau rlong uănh âk ntil, ăn kơp nau nĕ jêng nau răm maak dadê, 3yorlah khân may gĭt jêh nau rlong uănh ma nau khân may chroh njêng nau srôih. 4Ƀiălah ăn nau srôih ăn jêh nanê̆ kan păng, gay ma khân may jêng ueh rah vah, mâu geh nau pưt ôh.
5Tơlah mbu nơm tâm phung khân may, pưt nau blau mĭn, dăn hom ma Brah Ndu, nơm ăn ma lĕ rngôch bunuyh ma nau lŏng jêh ri mâu nuih janh ôh, jêh ri păng mra geh. 6Ƀiălah ăn păng dăn ma nau chroh lơi đing ôh, yorlah mbu nơm đing, nơm nĕ jêng tâm ban ma dak mƀŭt njach, sial đô̆ jêh ri rdu păng. 7Bunuyh nĕ lơi păng mĭn mra sŏk dơn du ntil ndơ bơh Kôranh Brah ôh. 8Nau mĭn bunuyh nĕ tâm pă, mâu geh du ai ôh tâm lĕ kan păng ƀư.
9Ăn bunuyh gŭ ntŭk tâm dâng tâm rnê ma nau n'hao păng. 10Ƀiălah ăn bunuyh ndrŏng tâm rnê ma nau păng dêh rhêt ma bu; yorlah păng mra rlau lôch nâm bu kao si. 11Yorlah nar luh, geh duh ktang. Gơ̆ păng kro, kao păng rŭng, jêh ri nau ueh păng roh. Nâm nđĕ lĕ, bunuyh ndrŏng mra hoănh kro tâm kan păng ƀư.

Nau Rlong Uănh Jêh Ri Nau Yô̆

12Ueh maak yơh mbu nơm srôih dơn nau rlong uănh, yorlah jêh păng dơi, păng mra geh đon hđăch nau rêh, Brah Ndu ton jêh ma phung rŏng ma păng. 13Dôl du huê bunuyh geh nau ndơm, lơi ăn păng lah: "Brah Ndu yơh ndơm gâp." Yorlah nau mhĭk mâu dơi ndơm Brah Ndu ôh, jêh ri Brah Ndu nơm mâu mâp ndơm bunuyh ôh. 14Ƀiălah ăp nơm bunuyh geh nau ndơm tơlah nau păng kơnh têk jêh ri nchâp păng. 15Nau kơnh jêh păng ntreo, păng deh nau tih, jêh nau tih văch ma toyh, păng njêng nau khĭt.
16Hơi phung oh nâu gâp rŏng, lơi ta khân may vĭ ôh. 17Lĕ nau yô̆ ueh jêh ri lĕ nau ăn yô̆ di tât bơh klơ, bơh Mbơ̆ nau ang. Tâm păng mâu geh nau rgâl ôh, mâu lĕ geh gui nau rgâl. 18Ma nau păng ngơi ngăn păng deh ma he tĭng nâm păng ŭch. Nâm nđĕ yơh he jêng phung lor lơn tâm lĕ rngôch ndơ păng njêng.

Ăn Ƀư Tĭng Nâm Nau Brah Ndu Ngơi

19Hơi phung oh nâu gâp rŏng, khân may gĭt jêh nau aơ. Pôri ăn lĕ rngôch bunuyh gơnh tâm iăt, ƀât ngăch ngơi, ngăch ji nuih ôh. 20Yorlah nau bunuyh nuih mâu tâm di nau sŏng bơh Brah Ndu ôh. 21Yor nây yơh, chalơi hom nau ƀơ̆ ƀơch jêh ri lĕ nau ƀai ăn khân may dơn Nau Ngơi tăm jêh tâm phung khân may ma nuih n'hâm rdơ̆ nau ngơi nĕ dơi tâm rklaih huêng khân may.
22Ăn khân may ƀư tĭng nâm Nau Ngơi, lơi knŏng iăt jêh ri ndơm khân may nơm. 23Yorlah tơlah du huê bunuyh knŏng iăt jêh ri mâu ƀư tĭng nâm Nau Ngơi ôh, păng jêng nâm bu du huê bunuyh uănh muh măt păng tâm măt rachŏk; 24jêh saơ muh măt păng nơm, păng du ta ntŭk êng jêh ri chuêl ro nau păng jêng. 25Ƀiălah mbu nơm sek uănh jêh ri srôih uănh tâm nau vay ueh bơh nau kon me, mâu di păng jêng bunuyh knŏng tăng jêh ri chuêl lơi, ƀiălah păng ƀư tĭng nâm nau ntăm, bunuyh nĕ mra geh nau ueh maak tâm kan păng.
26Tơlah du huê mĭn păng jêng bunuyh chroh jêh ri păng mâu njrăng mpiăt păng, ƀiălah păng ndơm nuih n'hâm păng nơm, nau chroh bunuyh nĕ jêng dơm dam. 27Pô aơ ntil nau chroh kloh ngăn jêh ri mâu ƀơ̆ ôh ta năp Brah Ndu Mbơ̆ he, jô̆ khâl phung kon đơi jêh ri phung bu ur ndrô, dôl khân păng gŭ rêh ni, jêh ri mât mray khân may nơm ma nau ƀơ̆ tă bơh neh ntu.