9

Gi^mbe^on Mienh Nduov Yo^su^waa

1Yiem Jor^ndaen Ndaaih fai bung maengx nyei zuangx hungh diex, se yiem mbong-aiv caux fai bung nyei mbong-juoqv caux yiem Domh Koiv hlen mingh taux Le^mbaa^norn Geh wuov deix Hitv^tai Mienh, Aa^mo^lai Mienh, Kaa^naa^an Mienh, Be^litv^si Mienh, Hiwai Mienh caux Ye^mbutc Mienh haiz gorngv taux naaiv deix sic. 2Ninh mbuo ziouc dongh hnyouv gapv qaqv oix mingh caux Yo^su^waa aengx caux I^saa^laa^en Mienh mborqv jaax.
3Mv baac Gi^mbe^on Mienh haiz gorngv Yo^su^waa hnangv haaix nor zoux bun Ye^li^ko Zingh caux Ai Zingh wuov zanc, 4ninh mbuo ziouc daav guv guaix nyei za'eix. Ninh mbuo bun mienh mingh yaac dorh la'maah mbuoqc huv caux mbiev jienv dapv a'ngunc diuv nyei loz-ndopv-mbuoqc huv bun lorh tor jienv mingh. 5Ninh mbuo daapc mbiev jienv nyei loz-heh yaac zuqv loz-lui-houx. Dorh mingh nyei bienh fuix youc nqaai youc jiex mbuov. 6Ninh mbuo mingh taux Gin^gaan nyei ndopv-liuh ciangv lorz Yo^su^waa, gorngv mbuox ninh caux I^saa^laa^en Mienh, “Yie mbuo yiem go haic nyei deic-bung daaih. Tov caux yie mbuo liepc ngaengc waac.”
7I^saa^laa^en Mienh gorngv mbuox wuov deix Hiwai Mienh, “Nziex meih mbuo yiem leih yie mbuo maiv go saah? Wuov nyungc yie mbuo hnangv haaix nor haih caux meih mbuo liepc ngaengc waac?”
8Ninh mbuo gorngv mbuox Yo^su^waa, “Yie mbuo zoux meih nyei bou.”
 Mv baac Yo^su^waa naaic, “Meih mbuo haaix nyungc mienh? Yiem haaix daaih?”
9Ninh mbuo dau Yo^su^waa, “Meih nyei bou mbuo yiem go haic nyei deic-bung daaih weic zuqc yie mbuo haiz Ziouv, meih nyei Tin-Hungh, hlo haic nyei mengh hoc. Yie mbuo haiz gorngv Ziouv yiem I^yipv Deic-Bung zoux nyei yietc zungv sic, 10yaac haiz gorngv ninh hnangv haaix nor zoux bun yiem Jor^ndaen Ndaaih nyei dong bung maengx wuov deix i dauh Aa^mo^lai Mienh nyei hungh. Se zoux bun Hetv^mbon Zingh nyei Si^honx Hungh caux yiem Atc^taa^lotv Zingh gunv Mbaasaan Deic wuov dauh Okc Hungh. 11Weic naaiv yie mbuo nyei mienh gox caux yie mbuo nyei deic-bung nyei yietc zungv baeqc fingx gorngv mbuox yie mbuo, ‘Dorh jienv yiem jauv zaangc nyanc nyei bienh fuix mingh lorz ninh mbuo, yaac gorngv mbuox ninh mbuo, “Yie mbuo zoux meih mbuo nyei bou. Tov caux yie mbuo liepc ngaengc waac.” ’ 12Yie mbuo cuotv jauv daaih lorz meih mbuo wuov hnoi, naaiv deix njuov corc jorm nyei. Mangc maah! Ih zanc nqaai nzengc yaac jiex mbuov mi'aqv. 13Naaiv deix dapv diuv nyei ndopv-mbuoqc yie mbuo dapv a'ngunc diuv wuov zanc corc siang nyei, mv baac mangc maah! Ih zanc huv mi'aqv. Yie mbuo nyei lui-houx caux heh yaac loz nzengc mi'aqv, weic zuqc jauv za'gengh go haic.”
14I^saa^laa^en Mienh ziouc zipv wuov deix mienh nyei nyanc hopv daaih, mv baac ninh mbuo maiv naaic Ziouv horpc zuqc hnangv haaix nor zoux. 15Yo^su^waa ziouc caux ninh mbuo gorngv horpc yaac liepc ngaengc waac liouh ninh mbuo nyei maengc. I^saa^laa^en Mienh nyei yietc zungv bieiv zeiv yaac houv jienv oix ei naaiv deix ngaengc waac.
16I^saa^laa^en Mienh caux Gi^mbe^on Mienh liepc liuz ngaengc waac nqa'haav buo hnoi, ziouc hiuv duqv naaiv deix mienh yiem leih ninh mbuo maiv go. 17I^saa^laa^en Mienh ziouc cuotv jauv. Buo hnoi wuov hnoi ninh mbuo taux wuov deix mienh nyei zingh. Wuov deix mienh nyei zingh heuc Gi^mbe^on, Ke^fi^laa, Mbe^e^lotv caux Ki^li^yaatv Ye^aa^lim. 18Mv baac I^saa^laa^en Mienh maiv daix ninh mbuo, weic zuqc wuov deix bieiv zeiv ziangv jienv Ziouv, I^saa^laa^en Mienh nyei Tin-Hungh, caux ninh mbuo houv waac.
 Zuangx baeqc fingx ngopv wuov deix bieiv zeiv.
19Mv baac yietc zungv bieiv zeiv gorngv mbuox gapv zunv nyei zuangx mienh, “Yie mbuo ziangv jienv Ziouv, I^saa^laa^en Mienh nyei Tin-Hungh, caux ninh mbuo houv jienv waac. Ih zanc yie mbuo maiv haih hoic ninh mbuo nyei maengc. 20Mbuo oix zuqc hnangv naaiv nor zoux bun ninh mbuo. Oix zuqc siex cuotv ninh mbuo nyei maengc. Maiv zei aeqv, laaix yie mbuo maiv ei yie mbuo caux ninh mbuo houv nyei waac, nziex mbuo haih zuqc Tin-Hungh nouz.” 21Wuov deix bieiv zeiv aengx gorngv mbuox baeqc fingx, “Oix zuqc siex cuotv ninh mbuo nyei maengc, mv baac bun ninh mbuo tengx I^saa^laa^en nyei zuangx baeqc fingx gaeqv zaangh, ndaam wuom.” Ninh mbuo ziouc ei jienv bieiv zeiv caux wuov deix mienh laengz jiex nyei waac zoux.
22Yo^su^waa ziouc heuc wuov deix Gi^mbe^on Mienh daaih, yaac gorngv ninh mbuo, “Meih mbuo weic haaix diuc nduov yie mbuo? Meih mbuo gorngv, ‘Yie mbuo yiem leih meih mbuo go haic,’ mv baac meih mbuo za'gengh yiem nitv yie mbuo fatv nyei. 23Ih zanc meih mbuo zuqc zioux aqv. Meih mbuo yietc liuz biaux maiv ndutv zoux nouh. Oix zuqc yietc liuz gaeqv zaangh, ndaam wuom weic yie nyei Tin-Hungh nyei biauv.”
24Ninh mbuo dau Yo^su^waa, “Yie mbuo meih nyei bou, haiz gorngv duqv mengh nyei. Ziouv, meih nyei Tin-Hungh paaiv ziangx ninh nyei bou, Mose, zorqv nzengc naaiv norm deic-bung jiu bun meih mbuo, yaac mietc nzengc naaiv norm deic-bung yiem meih mbuo nyei wuov ndaangc maengx nyei yietc zungv mienh nyei maengc. Weic naaiv yie mbuo laaix meih mbuo za'gengh! gamh nziex haic, nzauh heix meih mbuo hoic yie mbuo nyei maengc, cingx daaih hnangv naaiv nor zoux. 25Ih zanc yie mbuo yiem meih nyei buoz-ndiev. Ziux meih buatc zoux duqv horpc, zoux duqv longx, gunv zoux bun yie mbuo aqv.”
26Yo^su^waa ziouc tengx ninh mbuo biaux ndutv I^saa^laa^en Mienh nyei buoz-ndiev, maiv zuqc I^saa^laa^en Mienh daix ninh mbuo. 27Dongh wuov hnoi Yo^su^waa paaiv Gi^mbe^on Mienh weic I^saa^laa^en nyei zuangx mienh yaac weic Ziouv oix ginv ziangx wuov norm dorngx nyei ziec-dorngh gaeqv zaangh, ndaam wuom. Taux ih jaax hnoi ninh mbuo corc hnangv naaiv nor zoux.