1

Brah Ndu Tâm Mpơl Păng Nơm Tâm Kon Păng

1Tâm âk nau jêh ri tâm âk trong Brah Ndu ngơi jêh kăl e ma phung che he ma phung kôranh nơm mbơh lor; 2Ƀiălah tâm nar dăch lôch aơ Păng ngơi jêh ma he đah Kon Păng Nơm, Brah Ndu ăn Păng jêng Nơm dơn lĕ rngôch drăp ndơ, jêh ri Păng đŏng rhăk njêng neh ntu. 3Kon Păng aơ jêng nau nchrat ral bơh nau chrêk rmah Păng, jêh ri jêng rup ma Brah Ndu. Păng kuăn rdâng lĕ rngôch ndơ ma nau Păng ngơi geh brah. Jêh Păng ƀư kloh nau tih, Păng gŭ mpeh pama nau chrêk rmah ta klơ.

Kon Brah Ndu Jêng Toyh Lơn Ma Phung Tông Păr Ueh

4Păng jêng toyh lơn ma phung tông păr ueh Brah Ndu nâm bu amoh Păng jêng khlay lơn ma amoh khân păng. 5Yorlah ma mbu nơm tông păr ueh Brah Ndu mâp lah jêh pô aơ:
 "May jêng Kon bu klâu gâp, gâp deh jêh ma may tâm nar aơ.
 "Jêh ri:
 "Gâp jêng Mbơ̆ Păng, jêh ri Păng mra jêng Kon bu klâu gâp?"
6Jêh ri tơlah Păng ăn du huê mhe deh tal lor lăp tâm neh ntu, Păng lah: "Ăn lĕ rngôch phung tông păr ueh Brah Ndu yơk mbah ma Păng." 7Păng lah ma phung tông păr ueh Brah Ndu:
 "Păng ăn phung tông păr ueh
 Păng jêng sial, jêh ri ma phung pah kan ma
 Păng jêng mpiăt ŭnh."
8Ƀiălah, Păng lah ma Kon bu klâu Păng:
 "Ơ Brah Ndu, sưng hđăch may gŭ ƀaƀơ n'ho ro.
 Jêh ri mâng hđăch may, jêng mâng hđăch sŏng srăng.
9May rŏng jêh ma nau sŏng, jêh ri may tâm rmot jêh ma nau tih.
 Yor nây ơ Brah Ndu, Brah Ndu may, troch jêh ta may dak ngi nau răm maak, ăn may jêng toyh lơn ma phung băl may."
10Jêh ri:
 "May, ơ Kôranh Brah, kăl e ri rhăk njêng neh ntu, jêh ri trôk jêng kan bơh ti may.
11Khân păng mra rai lôch, ƀiălah may ăt hôm; khân păng mra mŭnh nâm bu bok ao,
12May mra klôt khân păng nâm bu du blah ao mbâl; jêh ri khân păng mra tâm rgâl.
 Ƀiălah may ăt hôm, jêh ri năm may mâu mra blau lôch ôh."
13Jêh ri ma mbu phung tông păr ueh Brah Ndu mâp lah jêh nâm pô aơ: "Gŭ hom may pama Gâp, kŏ tât Gâp ăn phung rlăng đah may jêng rnơl may chrong jâng."
14Mâu di hĕ, lĕ rngôch khân păng jêng huêng brah, Brah Ndu njuăl hăn pah kan ma phung mra dơn nau tâm rklaih.