3

¹"Aơ, gâp prơh hăn nơm ntŭh bâr ma gâp, păng mra nkra trong panăp gâp; jêh ri Kôranh Brah nơm khân may joi mra văch ƀât lât lăp tâm ngih brah Păng, nâm bu ntĭt tông păr ueh, nơm mbơh ma nau tâm rnglăp, jêng nau kâp gân. Aơ, Păng mra văch tât." Yêhôva phung tahan lah. ²Ƀiălah mbu nơm dơi dơn nar păng văch tât? Jêh ri mbu nơm dơi dâk tơlah păng tâm mpơl? Yorlah Păng jêng nâm bu ŭnh nuh ntŭk bbu chiăr prăk ăn păng chrêk, nâm bu kaƀu bu pih bok. ³Păng mra gŭ nâm bu bunuyh chiăr prăk jêh ri tôl ăn chrêk, jêh ri Păng mra sâm rpôt ăn kloh phung kon bulâu Lêvi, ăn khân păng chrêk kloh nâm bu miah jêh ri prăk; khân păng mra nhhơr ndơ nhhơr ƀư brah ma Yêhôva tâm nau sŏng. ⁴Rnôk nây ndơ nhhơr phung Yuda jêh ri phung ƀon lan Yêrusalem nhhơr mra ƀư maak ma Yêhôva, nâm bu tâm nar kăl e, jêh ri nâm bu rnôk ntơm saơm.
⁵Gâp mra văch dăch khân may ma nau phat dôih; jêh ri gâp mra jêng du huê nuyh ndal mbơh nau tâm rdâng đah phung n' hŭm, đah phung văng tĭr, phung sơm săk mƀrŭh, phung nkhăng nau nkhôm ma phung pah kan, phung tŭn jot bu ur ndrô khĭt sai jêh ri phung kon đơi, phung ƀư djơh đah phung bu năch, jêh ri phung mâu klach yơk ma gâp, Yêhôva phung tahan lah.

Nau Nhhơr Du Kô̆ Tâm Jê̆t

⁶"Yorlah gâp jêng Yêhôva, mâu blau rgâl ôh; yor nây, khân may jêng kon bu klâu Y-Yakôb, mâu rai lôch ôh.
⁷Ntơm bơh rnôk chô yau khân may, khân may chalơi lĕ nau vay gâp jêh ri mâu djôt prăp ôh nau gâp ntăm. Plơ̆ sĭt hom ma gâp, pôri mơ gâp plơ̆ sĭt tay ma khân may." Yêhôva phung tahan." Ƀiălah khân may lah, 'Mbah tă ndơ hên mra plơ̆ sĭt?' ⁸Bunuyh mra sŏk ntŭng tă bơh Brah Ndu lĕ? Ƀiălah kanŏng ntŭng jêh ndơ gâp." Khân may lah: Moh nau hên ntŭng ndơ may? Khân may hŏ ntŭng tâm lĕ ndơ du kô̆ tâm jê̆t jêh ri tâm lĕ ndơ nhhơr.
⁹Bu mra rak rtăp ma khân may, yor ma khân may nơm, lĕ ntil mpơl bunuyh, ntŭng ndơ gâp da dê. ¹⁰Lĕ ndơ du kô̆ tâm jê̆t, ăn khân may nhhơr ăn nŭm ta jay prăp, gay ăn ngih brah gâp geh ndơ sa. Kôranh Brah nơm dŭt toyh păng lah pô aơ: Ăn khân may lŏng nâl uănh, gĭt lah gâp pơk mpông bloh tâm trôk, nkhŭt nau ueh lăng ma khân may âk ngăn kŏ tât mâu tŏng ntŭk khân may ma dơ.
¹¹Yor khân may gâp mra nduyh ma ndơ ƀư rai, păng mâu mra ƀư rai ôh play do tă bơh neh khân may; jêh ri tơm play kriăk ƀâu khân may tâm mir mâu mra rŭng ôh play tât yan păng, Yêhôva lah. ¹²Rnôk nây lĕ rngôch phung ntil mpôl bunuyh mra ntơ ma khân may geh nau ƀŭn lap, yorlah khân may jêng du n' gor bri nau răm maak. Yêhôva phung tahan lah.

Nau Êng Đah Phung Sŏng Jêh ri Phung Djơh

¹³Nau khân may hŏ ngơi janh ŭch tâm rdâng đah gâp. Ƀiălah khân may lah: Mâm nau hên ngơi hŏ tâm rdâng jêh đah may? ¹⁴Khân may lah, mâu khlay ôh pah kan ma Brah Ndu. Moh khlay nau hên tông nau păng ntăm mâu lah chuat hăn nau rngot klâng ta năp măt Yêhôva phung tahan? ¹⁵Pôri aƀaơ hên ntơ phung sưr jêng ueh ngăn, phung ƀư nau djơh, nau mhĭk jêng nau chăt hao: khân păng rlong uănh Brah Ndu, jêh ri hŏ dơi klaih jêh! ¹⁶Rnôk nây phung klach yơk ma Yêhôva ngơi lah ndrăng khân păng; Yêhôva rkêng tôr iăt nau khân păng; jêh ri bu chih du ndrom săm ƀŭt ăn kah gĭt ta năp Yêhôva ăn ma phung klach yơk ma Păng jêh ri mĭn jêh ma amoh Păng, ¹⁷Yêhôva phung tahan lah: Khân păng mra jêng ndơ gâp. Jêh ri khân păng mra jêng ndơ prăp êng ma gâp tâm nar gâp ƀư, jêh ri gâp mra nhhuach ma khân păng nâm bu du huê mbơ̆ nhhuach ma kon bu klău păng pah kan ma păng. ¹⁸Rnôk nây khân may mra plơ̆ sĭt jêh ri mra tâm rnglah lơi ta nklang phung sŏng srăng đah phung djơh mhĭk, ta nklang phung pah kan ma Brah Ndu jêh ri đah phung mâu pah kan ma Păng.