3

Ninave pob taag

¹Lub nroog kws lu ntshaav raug txom nyem lauj!
Yog lub nroog muaj kev daag
hab muaj tej hov txhua chaw kws txeeb tau
puv nkaus huv,
tsuas yog moog lws luas
tsw tseg tsw tu le xwb.
²Noog saib, suab paas nplawm neeg nrov quas nplab,
suab tsheb neeg nrov dig quas dawg,
neeg dha noj tuam pwm,
tsheb neeg dha yaa quas ntxag.
³Cov tub rog caij neeg
dha npoj quas log ceev kawg le,
nav ntaaj ci quas nplaag,
hauv muv ci quas npuaj.
Tuabneeg raug tua coob kawg,
cev tuag tej nam pawg,
cev tuag suav tsw txheeb,
puab dawm tej cev tuag.
⁴Qhov nuav yog vem Ninave ua nam puj muag cev
tsw txawj pov khawv le,
nwg zoo nkauj ntxwm sab
txawj haub txawj ntxag txawj ua khawv koob
rua luas qaug sab tuag rua nwg teg.
Nwg muab nwg lub cev muag
ntxag tau ib tsoom tebchaws
hab ua khawv koob
ntxag tau ib tsoom tuabneeg ua qhev.
⁵Yawmsaub kws muaj fwjchim luj kawg nkaus
has tas, “Saib maj, kuv tawm tsaam koj.
Kuv yuav yaws koj daim tab moog
npug nkaus koj lub ntsej muag,
kuv yuav ca ib tsoom tuabneeg saib koj lab qaab,
kuv yuav ca ib tsoom tebchaws
saib koj chaw txaaj muag.
⁶Kuv yuav muab tej nam kua lwj qas quas ntsuav
laim rua koj.
Kuv yuav saib tsw taug koj
hab ua rua suavdawg thuaj koj.
⁷Txhua tug kws pum koj
yuav ca le nkaum zog tswv rov qaab.
Puab yuav has tas, ‘Lub nroog Ninave
puam tsuaj taag do quas cuas le lawm.
Leejtwg yuav quaj ntsuag nwg?
Yuav nrhav leejtwg hovtwg tuaj nplig tau nwg?’ ”

⁸Koj⚓ tseed zoo dua lub moos Thenpe
kws nyob ntawm tug nam dej Nai lov?
Muaj dej vej lub moos hov,
hab muaj dej havtxwv thaiv quas saab nrau,
hab muaj dej thaiv ua ntsaa loog.
⁹Khuj⚓ tebchaws hab Iyi tebchaws
yog nwg le zug luj kawg tsw txawj taag.
Phuj tebchaws hab Linpia tebchaws
kuj paab nwg hab.
¹⁰Txawm yog le hov los nwg tseed raug muab
kuav hlo moog poob tebchaws lawm.
Nwg tej mivnyuas kuj raug muab
ntsawm ntsoog taag rua txhua txuj ncauj kev.
Puab muab cov kws muaj meej huv lub moos hov
rhu ntawv saib leejtwg tau tug twg,
cov kws ua hlub puavleej
raug muab saw hlau khi.
¹¹Ninave, koj yuav qaug cawv
ua tug nam vwm loj vwm leg feeb tsw meej hlo le.
Koj yuav moog nrhav chaw cawm sav
kuas dim koj cov yeeb ncuab.
¹²Koj tej chaw ruaj khov txhua lub
zoo le tsob txwv cua kws txwv sav thawj phaum,
yog daj mas cov txwv yuav zeeg
rua huv tug kws noj lub qhov ncauj.
¹³Saib maj, koj cov tub rog huv plawv mej
tsuas zoo le tej nam quaspuj xwb.
Koj tej rooj loog tub qheb quas lug
rua koj cov yeeb ncuab.
Suavtawg tub kub koj tej laag rooj taag lawm.

¹⁴Ca le nqaa dej lug ca,
vem yeeb ncuab yuav tuaj vej.
Khu koj tej chaw zuv khuav kuas ruaj khov.
Ca le nqeg plhawv rua huv nam qhov aav nplaum
tuav kag aav nplaum, coj lub daab thwv cib tuaj.
¹⁵Tassws suavtawg yuav kub koj hov ntawd
hab nav ntaaj nav rag yuav txav koj yuav noj koj
yaam nkaus le mivnyuas kooj ntaas noj.
Ca le fuam vaam coob le kooj txwg,
ca le fuam vaam coob le kooj ntaas.
¹⁶Koj cov tub laag tub luam fuam vaam coob
yaam nkaus le tej nub qub sau nruab ntug.
Puab zoo yaam le tej kooj ntaas
kws noj nroj tsuag taag es nthuav tis hlo
yaa pluj plag lawm.
¹⁷Koj cov thawj zoo nkaus le cov kooj ntaas,
koj cov num tswv zoo nkaus le ib npoj kooj ntaas
kws thaus tseed no
tes dai ntawm tej ntsaa laj kaab,
thaus nub tuaj lawd tes yaa taag nrho lawm
tsw muaj leejtwg paub tas dua hovtwg lawm.

¹⁸Cov Axilia tug vaajntxwv 'e,
koj cov tuabneeg yug yaaj tub tsaug zug lawm,
koj cov thawj tub moog ncaws daab ndub lawm.
Koj cov pejxeem tawg ua saab ua sua rua peg tej roob,
tsw muaj leejtwg qaws tau puab lug.
¹⁹Koj qhov mob tsw ntaug hlo le,
koj qhov kav txhaab mas saab kawg le khu tsw tau.
Txhua tug kws tau nov koj lub moo
mas yuav npuaj teg luag koj.
Muaj leejtwg txeev dim tau ntawm koj txujkev
tswm txom kws tsw txawj taag le?