4

Tatoam Pai

  1A‑ễm cứq ayooq ơi! Roâp riang a‑ễm o la‑ĩat.
   Moat a‑ễm o samoât chớm tariap, ỡt tâng clống aroâiq catáng mieiq.
   Sóc a‑ễm sapâr samoât tỗp mbễq cũm sễng tễ cuar cóh Ki-liat.
  2Canễng a‑ễm cloc samoât charán cữu mbỡiq chu tễ noau apơi dỡq toâq moâm noau cứt sóc.
   Dũ ŏ́c canễng bữn cáp nheq, tỡ bữn ŏ́c léq ỡt ống muoi ŏ́c sâng.
  3Tambớr a‑ễm cusâu samoât clo téh.
   Cứq hữm tamễng a‑ễm tâng clống aroâiq ca pul mieiq a‑ễm,
   cusâu ariang palâi e‑pớl chĩn.
  4Tacong a‑ễm la samoât ngôl kĩaq khong Davĩt,
   dếh clâm siel o.
  Sanoâc a‑ễm ngcuac la samoât muoi ngin lám khễl
   noau alễu tâng ngôl ki.
  5Bar ŏ́c tóh a‑ễm la samoât bar lám yỡt lơ-lơ,
   cớp samoât bar lám pỗih chuaq cha tâng ntốq piar par‑ũ.
  6Cứq ai yoc ỡt tâng cuar cóh ca bữn siet phuom cớp crơng phuom canŏ́h,
   yỗn toau toâq tarưp rưm-rưm,
   cớp ŏ́c canám ngcuai taiq.
  7Cũai cứq ai ayooq la o lứq,
   nheq dũ ramứh ŏ́q dếh ntốq tếq.
  8A‑ễm cứq ayooq ơi! Cóq a‑ễm sễng tễ cóh Lê-banôn,
   chơ pỡq cớp cứq ai.
  Cóq mới sễng tễ cóh Lê-banôn,
   chơ pỡq cớp cứq!
  Cóq mới sễng tễ anũol cóh A-mana, Sê-nir, cớp Her-môn,
   la ntốq bữn cưp cula samín cớp cula aruc ỡt.
  9Ỡi tamái ơi! Moat mới khoiq ti mứt pahỡm cứq ai.
   Sanoâc mới ngcuac táq yỗn mứt pahỡm cứq cỡt sarlốq.
  10Ŏ́c ayooq tễ a‑ễm táq yỗn cứq ai sâng bũi hỡr,
   ỡi tamái la cũai cứq ayooq ơi!
  Ŏ́c ayooq tễ a‑ễm ngiam hỡn tễ blŏ́ng nho.
   Hỡi phuom tễ tỗ a‑ễm clữi nheq tễ máh crơng phuom.
  11Cũai cứq ayooq ơi! Toâq cứq ai hũn a‑ễm,
   la cứq sâng ngiam samoât dỡq khĩal;
  lieih a‑ễm samoât dỡq tóh cớp dỡq khĩal.
  Máh tampâc a‑ễm tâc la phuom samoât siet aluang tễ cóh Lê-banôn.
  12Cũai cứq ayooq ơi! A‑ễm la samoât nưong viang noau cloaih,
   cớp samoât dỡq mec yỗn ống manoaq cứq sâng.
  13Tâng ntốq ki bữn palâi aluang o lứq,
   la palâi ỗiq-tâi cớp sa‑ữi thữ palâi aluang ca ễm hỡn tễ palâi canŏ́h.
  14Bữn nar, ngêq, tavễl, kễq, cớp máh crơng phuom canŏ́h hỡ.
  15Bữn sa‑ữi ntốq dỡq mec táq yỗn nưong cỡt thớm;
   cớp bữn sa‑ữi dỡq tũm hoi sễng tễ cóh Lê-banôn.

Cumũr Pai

  16Cuyal tễ angia pỡng cớp angia pưn ơi! Cóq tamỡ!
   Cóq toâq phát dững máh hỡi phuom tễ nưong cứq chu máh ntốq canŏ́h.
   Dŏq yỗn cũai cứq ayooq toâq pỡ nưong án cớp cha palâi aluang ca ễm lứq nâi.