7

Tatoam Pai

  1A‑ễm la ariang con mansễm puo;
   ayững a‑ễm o lứq bo a‑ễm sớp cỡp.
   Nlu a‑ễm, o samoât tamáu moat ca cũai chiang táq yỗn clâm.
  2Taluih a‑ễm cỡt samoât muoi bễng tangan poân vuvỡ blŏ́ng
   khoiq carchốc cớp crơng phuom.
  Púng a‑ễm pũl-lũl samoât bốq saro mi,
   ca bữn piar par‑ũ ỡt lavíng.
  3Bar ŏ́c tóh a‑ễm la samoât bar lám yỡt lơ-lơ cartuan.
  4Tacong a‑ễm cỡt samoât ngôl kĩaq
   noau pasang toâq paluac achĩang.
  Bar coah moat a‑ễm la samoât dỡq amống
   pỡ vil Hê-sabôn, cheq Ngoah Toong Bat Rabim.
  Múh a‑ễm nhôiq samoât ngôl kĩaq
   tâng cóh Lê-banôn, ỡt pỡng vil Damac.
  5Plỡ a‑ễm la samoât anũol cóh Car-mel.
  Sóc a‑ễm nêuq o lứq;
   têq án cỗp mứt pahỡm puo.
  6Roâp a‑ễm la‑ĩat lứq, o luat ngư!
   A‑ễm táq yỗn mứt cứq ai sâng bũi.
  7Tỗ a‑ễm la samoât nỡm tarễc;
   tóh a‑ễm la samoât tangcóq palâi.
  8Cứq ai ễ poah chỗn tâng nỡm tarễc ki,
   cớp ễ yống bar ŏ́c palâi ki.
  Tóh a‑ễm la samoât tangcóq palâi nho;
   cớp carhỡ a‑ễm tangứh la phuom samoât palâi aluang.
  9Bỗq a‑ễm samoât riang blŏ́ng nho cỗt lứq.

Cumũr Pai

  Khân ngkíq, sễq blŏ́ng nho hoi tanoang chu án ca cứq ayooq,
   hoi chu tambớr cớp canễng án.
  10Cứq cỡt khong cũai cứq ayooq;
   cớp án yoc ễ bữn lứq cứq.
  11Ơ cũai cứq a‑ễm ayooq ơi! Hâi! Hái pỡq yáng tiah vil,
   bếq mpứng dĩ máh piar tâng ruang.
  12Hái tamỡ tễ cláih pỡq nhêng voar nho báiq ma tỡ yũah.
  Hái pỡq nhêng piar bỗn-rabỗn paliang ma tỡ yũah,
   cớp pỡq nhêng nỡm ỗiq-tâi palâi ma tỡ yũah.
  Ntốq ki cứq a‑ễm chiau ŏ́c ayooq yỗn ai.
  13Hái bữn sâng hỡi phuom tễ piar ca radững yỗn cũai sâng ayooq.
  Cheq ngoah toong dống hái,
   cứq khoiq thrũan dŏq dũ ramứh palâi tiaq cớp palâi tamái yỗn ai;
   máh palâi ki táq yỗn hái sâng bũi.