7

Dorn

  1O hungh sieqv aac,
   meih daapc jienv nyei heh lorqc, meih nyei zaux nzueic haic.
  Meih nyei camh zuih junh
   hnangv zaangc mienh corx daaih nyei la'bieiv-jaaix.
  2Meih nyei ga'sie nutv junh nyei hnangv diuv-zaanv nor,
   haaix zanc yaac zaangh jienv peux daaih nyei diuv.
  Meih nyei ga'sie hnangv yietc ndui mbiauh witv,
   maaih baeqc horqc biangh weih gormx.
  3Meih nyei i norm nyorx hnangv yietc doix njaih dorn,
   se njaih nyeiz njiec nyei sung-dorn.
  4Meih nyei jaang hnangv longc zaangz-nyaah zoux daaih nyei laauh,
   meih nyei i norm m'zing hnangv yiem Hetv^mbon,
   Mbetc Lapv^mbim Zingh Gaengh ga'hlen nyei wuom-domh.
  Meih nyei mba'zorng hnangv Le^mbaa^norn nyei fanh taapv,
   mangc njiec Ndaa^matv^gatc Zingh.
  5Meih nyei m'nqorngv liepc zaqc hnangv Kaanmen Mbong,
   meih nyei mba'biei setv jieqv luoqc,
   mba'biei zungv baeng zuqc hungh diex nyei hnyouv mi'aqv.
  6O yie hnamv nyei mienh aac, meih za'gengh nzueic, horpc hnyouv haic,
   meih za'gengh yuoqc mienh hnamv.
  7Meih nyei sin-pei hnangv daau nyei ndiangx,
   meih nyei nyorx hnangv daau nyei biouv-joih.
  8Yie gorngv, “Yie oix faaux daau-ndiangx,
   yie oix nanv jienv ninh nyei nquaah.”
  Tov bun meih nyei nyorx hnangv a'ngunc biouv-joih,
   meih nyei qiex hnangv ba'jaauh biouv nyei qiex ndaang,
  9meih nyei nzuih hnangv gauh kuv jiex nyei a'ngunc diuv.

Sieqv

  Gunv bun naaiv longx nyei diuv baeng zaqc nyei mingh taux yie hnamv nyei mienh,
   yaac liouc bieqc nzuih meix caux nyaah qangx.
  10Yie benx yie hnamv nyei mienh nyei,
   ninh oix nyei se yie.
  11Yie hnamv nyei mienh aah! Daaih maah!
   Mbuo mingh wuov lomc-huaang,
   mbuo mingh wuov laangz bueix muonz.
  12Mbuo jiez sin nziouv nyei mingh a'ngunc huingx,
   mangc gaax a'ngunc hmei cuotv cunx butv biangh nyueiz fai maiv butv,
  a'ngunc nyei biangh nqoi fai maiv nqoi,
   ziqc liouh ndiangx nyei biangh yaac nqoi fai,
   yie ziouc yiem wuov zorqv yie hnamv nyei hnyouv bun meih.
  13Yie hnamv nyei mienh aac,
   ndu^ndaa^im jieh cuotv ndaang nyei qiex.
  Yiem mbuo nyei gaengh ndaangc maaih nyungc-nyungc kuv nyei biouv,
   liemh siang nyei, loz nyei,
   yie siou daaih liouh meih.