7

Geh Nau Nduyh Đŏng Ma Phung Israel

1Tơlah gâp ŭch ƀư bah Israel, pôri nau tih Êphraim jêh ri nau djơh mhĭk phung Samari hŏ mpơl jêh; yorlah khân păng ƀư ma nau mƀruh; phung ntŭng lăp tâm trôm jêh ri phung kâp pit ntơt padih aơ. 2Ƀiălah khân păng mâu mĭn ôh ma gâp kah gĭt ma lĕ kan mhĭk khân păng. Aƀaơ ri kan tih mhĭk nây nchueng khân păng nơm; kan khân păng gŭ panăp gâp.
3Khân păng ƀư maak ma hađăch ma nau ƀai khân păng, ma phung kôranh ma nau plĕch khân păng.
4Lĕ rngôch khân păng jêng phung văng tĭr, nâm bu năk ŭnh duh nơm gŭch nđông piăng let sinh ŭnh, dôl rlu nsâp ŭnh dôl păng piăch rli ranih kŏ tât păng ră jêh.
5Tât ta nar hađăch he, phung kôranh yor nhêt âk ir nau duh bơh ndrănh dĭng geh nau ji kuet: Hađăch tâm ban lĕ nhŭp ti ndrel phung mưch.
6Khân păng kâp rmiăt, nuih n'hâm khân păng jêng duh nâm bu nâk ŭnh hĭt phung gŭch nđông piăng let lĕ bêch jêh du măng kŏ ang; tât ang ôi; ŭnh năk hit nâm bu mpiăt ŭnh.
7Lĕ rngôch khân păng jêng duh nâm bu năk ŭnh hit, jêh ri khân păng kăp rvăn kôranh khân păng. Lĕ rngôch phung hađăch khân păng lĕ tô̆p jêh; mâu geh ôh du huê tâm phung khân păng kuăl mbơh sơm ma gâp.
8"Êphraim tâm pot lai khân păng nơm đah phung mpôl băl bunuyh;
 Êphraim jêng du glo ƀănh ê hŏ bu mâp rlơ̆ ôh.
9Phung bu năch ăn roh jêh nau katang păng, jêh ri păng mâu gĭt ôh nau nây! Sŏk ndra (mbra) hon jêh kalơ bôk păng, păng kŏ mâu gĭt lĕ nau nây! 10Nau sưr Israel mbơh ta năp măt păng; nđâp tơlah mâp nau nây tâm ban lĕ mâu plơ̆ sĭt ôh ma Yêhôva Brah Ndu khân păng. Jêh ri kôranh mâu joi lĕ Păng yor nau aơ!
11"Êphraim jêng nâm bu du mlâm plŭk rluk, mâu geh nau gĭt rbăng ôh; yorlah khân păng vơh vơl ma n'gor bri Êjipt, hăn tât ma bri Asiri.
12Dôl khân păng dâk hăn, gâp mra nthăng nuăl gâp ma khân păng, gâp mra ƀư ma khân păng văk prah nâm bu sĭm kalơ trôk; gâp mra tâm rmal khân păng kơt nâm bu ta nklang phung khân păng hŏ tăng.
13Rêh ni ngăn ma khân păng, yorlah khân păng nkhah du ngai đah gâp! Gâp mra ƀư rai khân păng! Yorlah khân păng hŏ ƀư tih tâm rdâng đah gâp; gâp ŭch ngăn tâm chuai khân păng, ƀiălah khân păng ngơi mƀruh ŭch tâm rdâng đah gâp. 14Khân păng mâu ŭch nter ôh ma gâp ma nuih n'hâm khân păng, ƀiălah khân păng gŭ nter kalơ sứng bêch khân păng. Khân păng tâm rƀŭn ndrel gay ŭch geh ba jêh ri dak play kriăk ƀâu mhe khân păng, jêh ri rlăng ma gâp. 15Nđâp tơlah gâp yơh nti ma khân păng, hŏ ƀư ăn katang nting tur ti khân păng, khân păng ăt mĭn ma nau mhĭk gay ƀư rlăng ma gâp. 16Khân păng rle n'gĭl, ƀiălah mâu n'gĭl ôh mpeh ma Nơm Prêh Kalơ. Khân păng leng nâm bu ntrŏng na mâu sŏng ôh. Phung kôranh khân păng chalôt ma đao yor mpiăt khân păng ngơi sưr.
 Nau nây mra ăn bu gơm mưch ma khân păng tâm n'gor bri Êjipt.