3
H'Rut Jêh Ri Y-Bôas Ta Ntŭk Mprah Ba
1H'Naômi po păng lah ma păng. "Hơi yuh, di mâu jêng ueh joi du ntŭk ngih ma ay, gay ma ay gŭ maak?
2Pô nây mâu hĕ ay năl Y-Bôas jêng ndŭl mpôl he, đah phung oh mon bu ur păng ay lĕ gŭ ndrel jêh? Ta aơ păng mpruh ba măng aơ ta ntŭk mprah ba.
3Pô nây ŭm hom, mhĭng dak kôlônh, nsoh ao ueh lơn, jêh ri hăn rlet ma ntŭk mprah ba, ƀiă lah lơi ta ăn păng gĭt năl ay ôh tât jêh păng sông jêh ri nhêt.
4Ƀiă lah lah păng lâng bĭch, kâp uănh ntŭk păng bĭch, jêh ri hăn pơk phôi ta jâng păng jêh ri ăn ay bĭch. Jêh ri păng mra lah ma ay nau ay mra ƀư."
5Păng plơ̆ lah, "Gâp mra ƀư lĕ nau ay lah."
6Pô nây păng hăn ma ntŭk mprah ba jêh ri ƀư di tĭng nâm po păng lah jêh ma păng.
7Tơ lah jêh Y-Bôas sông jêh ri nhêt, nuih n'hâm păng maak. Jêh ri păng hăn bĭch ta bôl ntŭk bun ba. Rnôk nây H'Rut hăn rmiăt djoch pơk phôi ta jâng păng jêh ri bĭch.
8Ta n'gul măng bu klâu nây ndrŏt jêh ri rkêng săk. Ta aơ du huê bu ur bĭch ta jâng păng!
9Păng lah, "Mbu ay? Jêh ri păng plơ̆ lah, "Gâp H'Rut, oh mon bu ur may. Nkŭm lŭm hom ao jâr may ta kalơ oh mon bu ur may, yor lah may jêng ndŭl mpôl dơh dăch."
10Jêh ri păng lah, "Dăn ma Yêhôva ăn nau ueh lăng ma may. Hơi yuh. Ay tâm mpơl jêh nau ŭch aơ âk lơn ma kănđai, yor lah ay mâu tĭng joi ôh phung bu klâu ndăm gĭt lah trơi gĭt lah ndrŏng.
11Aƀaơ ri lơi klach ôh, hơi yuh, gâp mra ƀư ma ay lĕ nau ay dăn, yor lah lĕ rngôch bunuyh ƀon lan gâp gĭt ma ay jêng du huê bu ur geh nau mĭn ueh.
12Nanê̆ ngăn gâp jêng du huê ndŭl mpôl dăch, biă lah geh nơm dăch lơn ma gâp.
13Gŭ ta aơ măng aơ, jêh ri ôi taơ, tơ lah păng ŭch nau di ma du huê ndŭl mpôl dăch. Ueh yơh, ăn păng ƀư nau nây. Ƀiă lah lah păng mâu ŭch ôh nau di ma du huê ndŭl mpôl dăch ma may. Pô nây tĭng nâm Yêhôva gŭ rêh, gâp mra ƀư nau di ma du huê ndŭl mpôl dăch ma ay. Bĭch hom tât ôi."
14Pô nây păng bĭch ta jâng păng tât ang, ƀiă lah păng dâk lor ma bu dơi tâm năl. Jêh ri păng: "Lơi ăn bu gĭt ôh ma du huê bu ur văch jêh ma ntŭk mprah ba."
15Jêh ri păng lah, "Sŏk leo ao ay nsoh nây jêh ri ling păng." Pô nây păng ling ao nây. Jêh ri veh ba prao ra-i ba orgơ ăn păng jêh ri chông leo sĭt rlet ma ƀon.
16Tơ lah H'Rut tât ta po păng, păng lah, "Hơi yuh, moh nau tât jêh ma ay?" Păng nkoch bri ma păng lĕ nau bu klâu nây ƀư ma păng lah.
17Păng ăn ma gâp prao ra-i ba orgơ aơ, yor lah păng lah, "Ay mâu geh sĭt ti dơm ôh ma po ay."
18Păng plơ̆ lah, "Hơi yuh, gŭ kâp hom tât ay gĭt moh nau aơ mra jêng, yor lah bu klâu nây mâu mra rlu ôh, ƀiă lah păng mra ăn jêh nau aơ nar aơ."