105

Kan Khlay Yêhôva Ƀư Gay Kơl Phung Israel

1Tâm rnê hom ma Yêhôva, kuăl mbơh sơm ma amoh Păng;
 Mbơh ăn gĭt ta nklang phung mpôl băl kan Păng.
2Mprơ hom ma Păng; mprơ tâm rnê hom ma Păng;
 Ngơi hom ma lĕ kan khlay Păng
3Ăn khân may tâm rnê ma khân may nơm, tâm amoh kloh ueh Păng:
 Ăn nuih n'hâm phung joi Yêhôva răm maak.
4Joi hom Yêhôva jêh ri nau katang Păng;
 Joi hom ƀaƀơ muh măt Păng.
5Ăn khân may kah gĭt nau khlay Păng ƀư jêh.
 Nau khlay Păng, jêh ri nau phat dôih bơh bâr mbung Păng,
6Ơ phung kon sau Abraham oh mon păng,
 Phung kon Y-Yakôb, phung păng săch jêh.
7Păng jêng Yêhôva, Brah Ndu he,
 Nau păng phat dôih gŭ lam neh ntu.
8Păng kah gĭt ƀaƀơ ma nau Păng tâm rnglăp,
 Nau Păng ton prăp ma rbăn rnôk,
9Nau tâm rnglăp Păng ƀư jêh đah Abraham.
 Jêh ri nau păng sân săk đah Isak,
10Păng nanê̆ jêh nau nây ma Yakôb jêng nau vay.
 Ma phung Israel jêng nau rnglăp n'ho ro,
11lah gâp mra ăn ma may n'gor Kanan.
 Jêng drăp dơn di ma khân may.
12Rnôk nây khân păng jêng kanŏng phung djê̆,
 Nanê̆, djê̆ ngăn, jêh ri jêng bu năch tâm n'gor.
13Khân păng hăn tă bơh ndŭl mpôl aơ, ma ndŭl mpôl êng bơh ƀon bri hađăch aơ ma ƀon bri hađăch ri.
14Yêhôva mâu ăn bu tŭn jot khân păng ôh;
 Jêh ri păng nduyh phung hađăch yor khân păng,
15lah, lơi pah phung gâp troch dak ngi ôh,
 Jêh ri lơi ƀư djơh ma phung kôranh mbơh lor gâp.
16Păng kuăl an nau sa sât ji ngot tât ta n'gor;
 Păng sŏk lơi lĕ ndơ sông sa.
17Păng njuăl du huê bunuyh hăn lor ma khân păng;
 Bu tăch jêh Yôsep jêng du huê dĭk;
18Bu klêng jâng păng;
 Bu kât păng ma rse rvăk loih.
19Kŏ tât nar nau păng ngơi tât ngăn,
 Nau Yêhôva ngơi rlong uănh păng.
20Hađăch njuăl bu doh păng;
 Nơm chiă uănh phung ƀon lan sâm rklaih păng.
21Păng njêng nơm nây kôranh ngih păng,
 Jêh ri kôranh chiă uănh lĕ rngôch drăp păng;
22Gay păng dơi kât phung kon hađăch păng tĭng nâm ŭch.
 Jêh ri sâm nti nau blau mĭn ma phung bu ranh păng.
23Rnôk nây Israel hăn ta bri Êjipt;
 Yakôb gŭ tâm bri Cham.
24Păng ăn phung ƀon lan păng jêng bĭk ngăn,
 Jêh ri ăn phung nây, jêng katang lơn ma phung tŭn jot khân păng.
25Jêh ri păng tâm rgâl nuih n'hâm phung Êjipt, ăn tâm rmot ma phung ƀon lan păng,
 Ŭch ƀư ƀlăch ƀlêr ma phung oh mon Păng.
26Păng njuăl Y-Môise oh mon păng, jêh ri Y-Arôn nơm păng săch jêh.
27Khân păng tâm mbên Brah Ndu ta nklang phung nây,
 Jêh ri nau khlay tâm bri Cham.
28Păng njuăl nau ngo, jêh ri ngo lĕ;
 Jêh ri phung nây, mâu hôm tâm rdâng ôh đah bâr păng ngơi.
29Brah Ndu tâm rgâl dak khân păng jêng mham,
 Jêh ri nkhĭt lơi ka khân păng.
30Neh khân păng bêng ma kĭt.
 Kŏ tât tâm jrô hađăch khân păng.
31Păng lah, jêh ri phung rhuay tât ro.
 Geh si tâm lam bri khân păng.
32Păng ăn geh pler tŭp tâm bri khân păng ntrok mih.
 Geh mpiăt ŭnh tâm bri.
33Păng dong tơm play kriăk ƀâu khân păng, jêh ri tơm play rvi khân păng.
 Păng ƀư deh tơm si tâm bri khân păng.
34Păng ngơi, jêh ri geh krah, krah mâu dơi kơp,
35Krah sa lĕ gơ̆ tâm bri, jêh ri sa play tâm mir khân păng.
36Păng dong lĕ rngôch, phung kon bu klâu bôk rah tâm bri khân păng.
 Lĕ play lor nau katang khân păng.
37Păng ngluh phung ƀon lan păng, djôt prăk jêh ri mah;
 Jêh ri mâu geh du huê jêng rdja ôh, tâm phung mpôl băl păng.
38Phung Êjipt maak ma nau khân păng hăn,
 Yorlah nau tâm nhhu, ƀư jêh ma khân păng.
39Yêhôva lăk ndâr tŭk gay nkŭm khân păng,
 Jêh ri ŭnh ŭch ƀư ăn khân păng ang dôl tâm măng.
40Khân păng dăn, jêh ri Yêhôva ăn phung sĭm gôi văch.
 Păng ăn sĭm sa hơm kapŭng bơh trôk.
41Păng pơk lŭ, jêh ri dak luh hoch;
 Khân păng hoch rgăn rdrĭch rdah, nâm bu du n'hor dak krong.
42Yorlah păng kah gĭt ma nau păng ngơi kloh ueh,
 Jêh ri Abraham, oh mon păng.
43Păng ngluh phung ƀon lan păng, ma nau răm maak.
 Phung păng săch ma nau mprơ.
44Păng ăn ma bu n'gor bri phung mpôl băl êng;
 Jêh ri khân păng sŏk play bơh kan phung ƀon lan;
45Gay ma khân păng djôt prăp nau vay păng,
 Jêh ri tông nau vay păng. Alêluya.