13

Nzaaux Zuiz Caux Saax Uix Nyei Jauv

1“Wuov hnoi oix maaih norm wuom-zingv koi nqoi weic Ndaawitv nyei zeiv-fun caux Ye^lu^saa^lem nyei mienh nzaaux zuiz, saax uix.”
2Nernh Jiex nyei Ziouv gorngv, “Wuov hnoi yie oix pai guangc yiem deic-bung nyei miuc-fangx nyei mbuox, weic maiv bun haaix dauh aengx haih jangx duqv ninh mbuo. Yie oix zunc nqoi ⟨jaav douc waac mienh⟩ caux hnyouv maiv cing-nzengc nyei mienh, maiv bun yiem deic-bung. 3Se gorngv maaih naaiv nyungc douc waac mienh aengx cuotv daaih, ninh nyei cien die maa oix zuqc mbuox ninh, ‘Meih oix zuqc daic aqv, weic zuqc meih dengv Ziouv nyei mengh gorngv-baeqc.’ Ninh douc waac nyei ziangh hoc ninh ganh nyei die maa oix zuqc nzopv tong ninh.
4“Wuov hnoi dauh dauh douc waac mienh laaix ninh mbuo douc waac gorngv laauc yaangh nyei sic zuqc nyaiv. Ninh mbuo ziouc maiv zuqv maaih biei nyei lui weic nduov mienh. 5Ninh zungv oix gorngv, ‘Yie maiv zeiz douc waac mienh. Yie se zoux liangx-ndeic nyei mienh, weic zuqc yiem yie lunx nyei ziangh hoc naaiv deix ndau m'daaih benx yie nyei.’ 6Se gorngv maaih mienh naaic ninh, ‘Meih nyei la'kuotv zoux haaix nyungc maaih naanx?’ ninh ziouc dau, ‘Naaiv deix naanx yie yiem yie nyei doic nyei biauv zuqc daaih.’+”

Tin-Hungh Nyei Goux Ba'gi Yungh Mienh Zuqc Mborqv

7Nernh Jiex nyei Ziouv gorngv,
  “Nzuqc ndaauv aah! Jiez daaih caux yie nyei goux ba'gi yungh mienh mborqv jaax,
   se caux yie zuoqc doic mborqv jaax.
  Mborqv goux yungh mienh,
   ba'gi yungh guanh ziouc nzaanx nzengc.
  Yie yaac oix hluotv buoz daaih mborqv ba'gi yungh dorn.”
  8Ziouv gorngv, “Yiem gormx deic-bung nyei mienh,
   buo gouv nyei i gouv oix zuqc pai guangc, zuqc mietc,
   liouh njiec nyei maaih buo gouv nyei yietc gouv.
  9Yie oix zorqv wuov deix buo gouv nyei yietc gouv jiex douc
   sinx ninh mbuo hnangv sinx nyaanh,
   seix ninh mbuo hnangv seix jiem.
  Ninh mbuo oix heuc jienv jouh yie nyei mengh,
   yie ziouc dau ninh mbuo.
  Yie oix gorngv, ‘Ninh mbuo se yie nyei baeqc fingx.’
   Ninh mbuo yaac oix gorngv, ‘Ziouv se yie mbuo nyei Tin-Hungh.’+”