4

Phung Kôranh Nơm Nti Tih

1Hơi phung gâp rŏng, lơi chroh ôh ma lĕ brah êng, ƀiălah lŏng nâl uănh huêng brah nây, gĭtlah tă Brah Ndu; yorlah geh âk kôranh nơm mbơh lor tih văch jêh tâm neh ntu. 2Ma nau aơ khân may dơi gĭt Brah Huêng Ueh Brah Ndu; lĕ rngôch brah mbơh Yêsu Krist văch jêh tâm nglay săk luh bơh Brah Ndu, 3jêh ri lĕ rngôch brah mâu mbơh Brah Yêsu mâu di luh bơh Brah Ndu ôh. Păng nĕ jêng rlăng đah Brah Krist. Khân may tăng jêh păng mra văch, jêh ri aƀaơ păng gŭ jêh tâm neh ntu.
4Hơi phung kon jê̆ khân may luh bơh Brah Ndu jêh ri dơi đah khân păng jêh, yorlah nơm gŭ tâm khân may jêng toyh lơn ma nơm gŭ tâm neh ntu. 5Khân păng luh bơh neh ntu, pôri khân păng ngơi nâm bu neh ntu, jêh ri neh ntu gŭ iăt khân păng. 6He luh bơh Brah Ndu. Mbu nơm gĭt năl Brah Ndu gŭ iăt nau he, jêh ri mbu nơm mâu luh bơh Brah Ndu mâu iăt nau he ôh. Ma nau nĕ he gĭt năl brah nau nanê̆, jêh ri brah nau vĭ.

Brah Ndu Jêng Nau Rŏng, Ăn He Rŏng Ma Brah Ndu Jêh Ri Ma Oh Nâu

7Hơi phung gâp rŏng, ăn he tâm rŏng ndrăng he, yorlah nau rŏng luh bơh Brah Ndu, jêh ri mbu nơm rŏng deh jêh bơh Brah Ndu, jêh ri gĭt năl Brah Ndu. 8Mbu nơm mâu blau tâm rŏng mâu mâp gĭt năl Brah Ndu ôh, yorlah Brah Ndu jêng nau rŏng. 9Nau Brah Ndu rŏng tâm mpơl jêh ma he tâm nau Brah Ndu njuăl jêh kon păng, geh knŏng du huê, tâm neh ntu gay ma he gŭ rêh yor păng. 10Tâm nau aơ jêng nau rŏng mâu di he rŏng jêh ma Brah Ndu ôh, ƀiălah Brah Ndu rŏng jêh ma he, jêh ri njuăl kon păng văch nâm bu ndơ ƀư brah ƀư kloh nau tih he.
11Hơi phung gâp rŏng, tơlah Brah Ndu rŏng jêh ma he, pôri, ăn he tâm rŏng lĕ ndrăng he. 12Mâu geh du huê bunuyh mâp saơ Brah Ndu ôh; tơlah he tâm rŏng ndrăng he, Brah Ndu gŭ tâm he jêh ri nau păng jêng rah vah tâm he. 13He gĭt năl he gŭ tâm păng jêh ri păng tâm he yorlah păng ăn jêh Brah Huêng Ueh păng ma he. 14Jêh ri he saơ jêh ri mbơh Brah Mbơ̆ njuăl văch jêh kon păng jêng nâm bu nơm tâm rklaih ma neh ntu. 15Mbu nơm mbơh Brah Yêsu jêng kon Brah Ndu, Brah Ndu gŭ tâm păng, jêh ri păng tâm Brah Ndu. 16Pôri he gĭt jêh ri chroh ma Brah Ndu geh nau rŏng ma he. Brah Ndu jêng nau rŏng. Mbu nơm gŭ tâm nau rŏng jêng păng gŭ tâm Brah Ndu, jêh ri Brah Ndu gŭ tâm păng.
17Nâm bu păng jêng, he jêng tâm ban lĕ tâm neh ntu aơ. Yor nau nĕ yơh nau rŏng jêng rah vah tâm he, gay ma he geh nau rnơm ta nar phat dôih. 18Nau klach mâu gŭ ôh tâm nau rŏng, ƀiălah nau rŏng rah vah mprơh lơi nau klach, yorlah nau klach mĭn ma nau tâm rmal, jêh ri mbu nơm klach mâu jêng rah vah ôh tâm nau rŏng. 19He rŏng ma păng yorlah păng rŏng jêh ma he lor. 20Tơlah du huê lah: "Gâp rŏng ma Brah Ndu", ƀiălah tâm rmot ma oh nâu păng, păng jêng du huê bunuyh mƀruh yơh; yorlah mbu nơm mâu rŏng ma oh nâu, nơm păng dơi saơ mâm păng dơi rŏng ma Brah Ndu, nơm păng mâu dơi saơ ôh? 21Jêh ri he geh bơh Păng nau ntăm aơ: Mbu nơm rŏng ma Brah Ndu, ăn păng rŏng ma oh nâu păng tâm ban lĕ.