28

1Wuov deix ziangh hoc. Fi^li^saa^die Mienh gapv zunv oix mingh caux I^saa^laa^en Mienh mborqv jaax. Aakitv gorngv mbuox Ndaawitv, “Meih oix zuqc bieqc hnyouv, meih caux gan meih nyei mienh oix zuqc caux jienv yie cuotv mingh mborqv jaax.”
2Ndaawitv dau Aakitv, “Longx aqv. Meih ziouc hiuv duqv yie meih nyei bou, haih zoux duqv haaix nyungc.”
 Aakitv gorngv mbuox Ndaawitv, “Longx nyei. Yie oix orn meih yietc liuz zoux yie nyei sin-hlen mienh.”

Saulo Mingh Naaic Gaanv Hei Nyei M'sieqv Dorn

3Saa^mu^en guei seix mi'aqv. I^saa^laa^en nyei zuangx mienh weic ninh nzauh nyiemv yaac dorh ninh mingh zangx jienv ninh ganh nyei buonv-mungv, Laamaa. Saulo zunc cuotv nzengc gaanv hei mienh caux mbouv guaax nyei mienh, maiv bun yiem deic-bung.
4Fi^li^saa^die Mienh gapv zunv daaih liepc ciangv yiem Sunem. Saulo yaac heuc I^saa^laa^en nyei zuangx mienh gapv zunv daaih ziouc liepc ciangv yiem Gin^mbo^aa Mbong. 5Saulo mangc buatc Fi^li^saa^die Mienh nyei jun-baeng guanh ziouc haeqv ninh gamh nziex haic. Ninh nyei hnyouv yaac lunc nzengc. 6Saulo naaic Ziouv mv baac Ziouv maiv dau ninh, maiv box mbeix bun ninh, yaac maiv longc Ulim fai douc waac mienh dau. 7Saulo gorngv mbuox ninh nyei bou, “Tov lorz dauh gaanv hei nyei m'sieqv dorn, weic bun yie duqv mingh naaic ninh.”
 Saulo nyei bou dau, “Yiem En^ndo Laangz maaih dauh gaanv hei nyei m'sieqv dorn.”
8Saulo yienc ninh nyei lui-houx zorng benx ganh dauh ziouc caux i dauh m'jangc dorn lungh muonz zanc mingh lorz wuov dauh gaanv hei nyei m'sieqv dorn. Hungh diex gorngv, “Tov tengx yie naaic dauh daic mingh nyei mienh nyei wuonh. Yie gorngv haaix dauh nyei mbuox, meih heuc wuov dauh cuotv daaih oc.”
9Wuov dauh m'sieqv dorn gorngv mbuox hungh diex, “Meih zungv hiuv duqv Saulo hnangv haaix nor zoux. Ninh pai guangc yiem deic-bung nyei gaanv hei nyei mienh caux mbouv guaax nyei mienh, maiv bun ninh mbuo yiem deic-bung. Wuov nyungc meih weic haaix diuc daaih nduov yie, hnangv zaeng koux hlopv oix zorqv yie nyei maengc?”
10Saulo ziangv jienv Ziouv houv waac gorngv mbuox wuov dauh m'sieqv dorn, “Yie ziangv jienv ziangh jienv nyei Ziouv laengz meih zungv maiv zuqc weic naaiv deix sic dingc zuiz.”
11Wuov dauh m'sieqv dorn naaic, “Meih oix yie heuc haaix dauh cuotv daaih?”
 Saulo dau, “Tengx yie heuc Saa^mu^en cuotv daaih.”
12Wuov dauh m'sieqv dorn yietv buatc Saa^mu^en, ninh ziouc heuc qiex mbui! nyei. Ninh gorngv Saulo, “Meih weic haaix diuc nduov yie? Meih se Saulo Hungh.”
13Saulo gorngv mbuox ninh, “Maiv dungx gamh nziex oc. Meih buatc haaix nyungc?”
 Wuov dauh m'sieqv dorn dau Saulo, “Yie buatc dauh zienh yiem ndau-ndiev cuotv daaih.”
14Saulo naaic wuov dauh m'sieqv dorn, “Buatc ninh nyei fangx zeiv hnangv haaix nor?”
 Wuov dauh m'sieqv dorn dau, “Maaih dauh mienh gox mienh zuqv jienv domh lui-ndaauv cuotv daaih”
 Saulo ziouc hiuv duqv se Saa^mu^en. Saulo ziouc mbaapv njiec ndau baaix.
15Saa^mu^en naaic Saulo, “Meih la'nyauv yie, heuc yie cuotv daaih zoux haaix nyungc?”
 Saulo dau, “Yie maaih kuonx hnyouv nyei sic hniev haic, weic zuqc Fi^li^saa^die Mienh daaih oix caux yie mborqv jaax. Tin-Hungh yaac guangc maiv mangc yie, maiv dau yie daux gaux nyei waac. Ninh maiv longc douc waac mienh fai mbeix nyei mbeix dau yie. Weic naaiv yie cingx daaih heuc meih cuotv daaih mbuox yie, yie yaac oix zuqc hnangv haaix nor zoux?”
16Saa^mu^en dau, “Meih weic haaix diuc naaic yie? Weic zuqc Ziouv guangc, maiv mangc meih yaac benx meih nyei win-wangv mi'aqv. 17Ziouv zoux bun meih hnangv ninh longc yie gorngv mbuox meih nor. Ziouv zungv caangv meih nyei guoqv mingh jiu bun Ndaawitv mi'aqv, 18weic zuqc meih maiv muangx Ziouv nyei waac. Ninh qiex jiez! haic Aa^maa^lekv Mienh. Meih yaac maiv ei ninh hatc nyei waac mietc ninh mbuo. Weic naaiv ih hnoi Ziouv cingx daaih hnangv naaiv nor zoux bun meih. 19Maiv daan mbuoqc naaiv. Ziouv oix zorqv I^saa^laa^en caux jienv meih jiu bun yiem Fi^li^saa^die Mienh nyei buoz-ndiev. Njang hnoi meih ganh caux meih nyei dorn mbuo ziouc caux yie yiem naaiv. Ziouv yaac oix zorqv I^saa^laa^en nyei jun-baeng jiu bun yiem Fi^li^saa^die Mienh nyei buoz-ndiev.”
20Saulo haiz Saa^mu^en hnangv naaiv nor gorngv, ziouc liemh zeih haeqv ninh gamh nziex haic, king njiec ndau mingh. Ninh mau haic, maiv maaih yietc deix qaqv, weic zuqc duqv yietc hnoi caux yietc muonz ninh maiv nyanc haaix nyungc.
21Wuov dauh m'sieqv dorn mingh taux Saulo wuov, buatc ninh za'gengh! gamh nziex haic. Wuov dauh m'sieqv dorn ziouc gorngv, “Yie, meih nyei m'sieqv bou, maiv longc maengc nyei ei jienv meih nyei waac zoux. 22Ih zanc tov meih muangx yie, meih nyei m'sieqv bou, nyei waac. Tov bun yie mbenc diqv dien ga'naaiv bun meih nyanc. Weic bun meih haih maaih qaqv cuotv jauv.”
23Saulo maiv kangv. Ninh gorngv, “Yie maiv nyanc.”
 Mv baac ninh nyei bou caux wuov dauh m'sieqv dorn kuinx ninh. Ninh ziouc muangx ninh mbuo nyei waac, yiem ga'ndiev ndau jiez sin daaih zueiz jienv coux.
24Wuov dauh m'sieqv dorn maaih dauh ngongh dorn junc yiem wuov biauv ziouc siepv-siepv nyei daix daaih. Ninh yaac zorqv mbuonv caix daaih zoux maiv an ⟨bingv⟩ nyei njuov ziqv ziangx. 25Ninh ziouc dorh daaih mbenc bun Saulo caux ninh nyei bou mbuo nyanc. Ninh mbuo nyanc liuz, dongh naaic muonz ninh mbuo ziouc mingh mi'aqv.