30

Ndaawitv Mborqv Hingh Aa^maa^lekv Mienh

1Nqa'haav taux da'faam hnoi, Ndaawitv caux jienv ninh nyei mienh daaih taux Sikc^laakv Zingh, Aa^maa^lekv Mienh zungv daaih luv ⟨Negepc⟩ yaac luv Sikc^laakv mi'aqv. Ninh mbuo mborqv hingh Sikc^laakv, yaac longc douz buov qui nzengc. 2Ninh mbuo zorqv yiem wuov norm mungv nyei yietc zungv m'sieqv dorn, liemh fu'jueiv caux domh mienh, maiv daix haaix dauh, yaac zorqv ninh mbuo dorh jienv mingh nzengc.
3Wuov zanc Ndaawitv caux jienv ninh nyei mienh daaih taux Sikc^laakv Zingh, ziouc buatc wuov norm zingh zuqc douz buov nzengc. Ninh mbuo nyei auv caux dorn sieqv zuqc Aa^maa^lekv Mienh dorh mingh nzengc. 4Ndaawitv caux jienv ninh nyei baeqc fingx nyiemv qiex mbui haic. Ninh mbuo nyiemv gau liemh maiv maaih qaqv aqv. 5Ndaawitv nyei i dauh auv se Yitv^le^en Mienh, Aa^hi^no^am, caux Kaanmen Mienh, Naa^mbaan nyei auv-guaav, mbuox heuc Aa^mbi^gaa^yin, yaac zuqc zorqv dorh jienv mingh mi'aqv. 6Ndaawitv kuonx hnyouv camv haic, weic zuqc baeqc fingx gorngv oix longc la'bieiv zong daic ninh aqv. Yietc zungv baeqc fingx weic ganh nyei dorn sieqv nzauh kouv haic. Mv baac Ndaawitv kaux Ziouv, ninh nyei Tin-Hungh, duqv qaqv faaux daaih.
7Ndaawitv gorngv mbuox Aa^hi^me^lekv nyei dorn, Aa^mbi^yaa^taa sai mienh, “Tov meih dorh ⟨efotv⟩ daaih bun yie.” Aa^mbi^yaa^taa ziouc dorh daaih bun Ndaawitv. 8Ndaawitv naaic Ziouv, “Yie horpc zuqc mingh zunc naaiv guanh zaqc baeng nyei fai? Yie mbuo haih zunc duqv zaaic ninh mbuo nyei fai?”
 Tin-Hungh dau ninh, “Gunv mingh zunc maah! Meih ndongc haaix zungv zunc duqv zaaic ninh mbuo yaac tengx duqv meih nyei mienh.”
9Ndaawitv ziouc caux jienv ninh nyei luoqc baeqv dauh mienh zunc jienv Aa^maa^lekv Mienh mingh. Ninh mbuo daaih taux Mbeso Ndoqv. Nqa'haav laai wuov deix baeng ziouc dingh jienv wuov. 10Mv baac Ndaawitv ganh caux feix baeqv dauh mienh zunc jienv Aa^maa^lekv Mienh mingh. Maaih nyic baeqv dauh mienh mau haic, jiex maiv duqv Mbeso Ndoqv, ziouc dingh jienv wuov.
11Ninh mbuo buangh zuqc dauh I^yipv Mienh yiem wuov ndau-njang ziouc dorh ninh daaih buangh Ndaawitv. Ninh mbuo bun njuov ninh nyanc, bun wuom ninh hopv, 12bun kuaaiv ngongh nyorx biouv nyei njuov ninh nyanc caux i ndunh a'ngunc biouv-nqaai. Ninh nyanc liuz ziouc henv jiez daaih, weic zuqc ninh maiv duqv nyanc hnaangx, maiv duqv hopv wuom duqv buo hnoi buo muonz aqv.
13Ndaawitv naaic ninh, “Meih haaix dauh nyei mienh yaac yiem haaix ndau daaih?”
 Ninh dau, “Yie I^yipv Mienh, zoux Aa^maa^lekv Mienh nyei nouh, dongh buo hnoi jiex daaih naaiv yie maiv longx. Yie nyei ziouv guangc jienv yie mingh mi'aqv.
14Yie mbuo daaih luv Ke^le^ti Mienh nyei Negepc, yaac luv Yu^ndaa Deic caux Kaalepv Deic nyei Negepc. Yie mbuo longc douz buov nzengc Sikc^laakv Zingh.”
15Ndaawitv naaic ninh, “Meih haih dorh yie mbuo njiec taux wuov guanh baeng nyei fai?”
 Ninh dau, “Meih oix zuqc ziangv jienv Tin-Hungh laengz waac gorngv meih maiv daix yie yaac maiv zorqv yie jiu bun yie nyei ziouv, yie ziouc dorh meih mingh taux wuov guanh zaqc baeng.”
16Ninh dorh Ndaawitv mbuo njiec taux wuov, mangc maah! Buangh wuov deix mienh yiem buangv nzengc wuov buoqv ndau. Ninh mbuo nyanc yaac hopv yaac cangx heix, weic zuqc ninh mbuo luv Fi^li^saa^die Deic-Bung caux Yu^ndaa Deic-Bung nyei nyanc hopv camv haic. 17Yiem da'nyeic ndorm lungh mbiouz-mbiouz njang nyei ziangh hoc, Ndaawitv daix jienv Aa^maa^lekv Mienh mingh taux lungh maanz-hmuangx. Maiv maaih haaix dauh duqv cuotv singx maengc cuotv liuz feix baeqv dauh mienh lunx mienh geh jienv lorh torh biaux. 18Aa^maa^lekv Mienh luv mingh nyei yietc zungv ga'naaiv Ndaawitv zorqv nzuonx nzengc daaih, liemh ninh nyei i dauh auv. 19Ninh maiv caa yietc nyungc, maiv gunv ga'naaiv cou fai ga'naaiv muonc, dorn fai sieqv, dongh ninh mbuo caangv mingh nyei ga'naaiv fai luv dorh mingh nyei ga'naaiv, Ndaawitv zorqv nzuonx nzengc. 20Ndaawitv aengx zorqv Aa^maa^lekv Mienh nyei yietc zungv ngongh guanh yungh guanh. Ninh nyei mienh ziouc zunc jienv yietc zungv saeng-kuv guanh nyei wuov ndaangc maengx yaac gorngv, “Naaiv se Ndaawitv caangv duqv daaih nyei buonc.”

Bun Nqoi Caangv Daaih Nyei Ga'naaiv

21Ndaawitv nzuonx taux mau kouv, maiv maaih qaqv gan Ndaawitv mingh ziouc liouh jienv yiem Mbeso Ndoqv wuov deix nyic baeqv dauh. Ninh mbuo ziouc cuotv daaih zipv Ndaawitv caux gan Ndaawitv mingh nyei mienh. Ndaawitv caux ninh nyei mienh taux fatv deix, ninh ziouc zorqv yieqv gorngv wuic buangh waac bun ninh mbuo. 22Gan Ndaawitv mingh nyei mienh maaih deix orqv mienh caux mienh waaic mienh gorngv, “Naaiv deix mienh maiv gan mbuo mingh. Mbuo caangv daaih nyei ga'naaiv mbuo maiv bun ninh mbuo. Kungx bun gorqv-mienh dorh gorqv-mienh nyei auv-jueiv mingh aqv.”
23Mv baac Ndaawitv gorngv, “Yie nyei gorx-youz aac, meih mbuo maiv dungx hnangv naaic nor zoux bun dongh Ziouv jiu bun mbuo caangv duqv daaih nyei ga'naaiv. Ninh beu jienv mbuo yaac zorqv dongh daaih luv mbuo wuov guanh zaqc baeng jiu bun yiem mbuo nyei buoz-ndiev. 24Naaiv deix sic maaih haaix dauh haih muangx meih mbuo? Mingh mborqv jaax nyei mienh duqv caangv daaih nyei ga'naaiv mbu'ziex, zuov ga'naaiv nyei mienh yaac horpc duqv mbuoqc wuov. Duqv camv zoqc, ninh mbuo oix zuqc duqv fih mbuoqc nzengc.” 25Yiem naaic daaih, Ndaawitv ziouc liepc naaiv diuc leiz-fingx benx I^saa^laa^en Mienh nyei leiz-latc taux ih jaax hnoi.
26Ndaawitv nzuonx taux Sikc^laakv Zingh, ninh zorqv deix caangv duqv daaih nyei ga'naaiv fungx bun ninh nyei doic, se dongh Yu^ndaa Deic-Bung nyei mienh gox. Ninh gorngv, “Yie zorqv naaiv deix zingh nyeic fungx bun meih mbuo, se yiem Ziouv nyei win-wangv caangv duqv daaih nyei ga'naaiv.”
27Ndaawitv fungx zingh nyeic bun yiem Mbetc^en Zingh nyei mienh, Negepc, Laamotv Zingh caux Yaatv^ti Mungv nyei mienh, 28yiem Aa^lo^e Zingh, Sipc^motv, Etc^te^mo^aa nyei mienh, 29yiem Laakaan Zingh nyei mienh caux yiem Ye^laa^me^en caux Kenai Mienh nyei zingh nyei mienh, 30yiem Homaa Zingh, Mbo^laa^qaan Mungv caux Aataakv Mungv nyei mienh, 31caux yiem He^mbo^lon Zingh nyei mienh. Ninh fungx ga'naaiv bun norm-norm dorngx nyei mienh, dongh Ndaawitv caux ninh nyei mienh jiex mingh jiex daaih nyei dorngx.