12

Yiem Sikc^laakv Gan Ndaawitv Nyei Mben^yaa^min Mienh

1Ndaawitv mingh yiem Sikc^laakv weic biaux Kitv nyei dorn, Saulo Hungh. Naaiv se mingh Sikc^laakv gan ninh wuov deix mienh. Ninh mbuo zoux mborqv jaax henv nyei baeng, 2haih buonv juang-zinx nyei mienh. Ninh mbuo haih longc zaaix jieqv mbiaauc jieqv buoz nanv ndopv-hlaang bungx la'bieiv fai buonv juang-zinx yaac duqv. Ninh mbuo yietc zungv se caux Saulo juangc fingx nyei Mben^yaa^min Mienh.
3Maaih ninh mbuo nyei bieiv zeiv, Aa^hi^ye^se, caux ninh nyei youz Yo^aatc, se Gi^mbe^aa Mienh, Se^maa^aa, nyei dorn. Aengx maaih Atc^maa^wetv nyei dorn, Ye^si^en caux Peletc. Maaih Mbe^laa^kaa, maaih Aa^naa^totv Mienh, Ye^hu, 4caux Gi^mbe^on Mienh, Itc^mai^aa, dongh wuov deix Faah Ziepc Dauh henv haic nyei jun-zeiv mienh nyei yietc dauh, yaac zoux wuov deix Faah Ziepc Dauh nyei yietc dauh bieiv zeiv. Maaih Ye^le^mi, Yaa^haa^si^en, Yo^haa^nan, caux Ge^nde^laa Mienh, Yo^saa^mbaatc, 5E^lu^sai, Ye^li^motv, Mbe^an^yaa, Se^maa^li^yaa, caux Haalupv Mienh, Se^faa^ti^yaa, 6En^kaa^naa, Itc^si^yaa, Aa^saa^len, Yo^e^se, caux Kolaa Mienh, Yaa^so^mbe^am, 7yaac maaih Ge^ndo Mienh, Ye^lo^ham nyei dorn, Yo^e^laa, caux Se^mbaa^ndi^yaa.

Gan Ndaawitv Nyei Gaatc Mienh

8Maaih deix Gaatc Mienh biaux mingh Ndaawitv yiem wuov norm wuonv nyei dorngx, deic-bung-huaang wuov. Ninh mbuo se haih mborqv jaax henv nyei baeng, haih longc torngv-baaih caux cang liouc nyei. Ninh mbuo nyei hmien hnangv sienh nyei hmien, yaac haih tiux siepv hnangv yiem mbong nyei njaih nor.
9E^se zoux bieiv zeiv,
O^mbaa^ndi zoux da'nyeic,
E^li^apc zoux da'faam,
10Mitv^man^naa zoux da'feix,
Ye^le^mi zoux da'hmz,
11Atc^tai zoux da'luoqc,
E^li^en zoux da'cietv,
12Yo^haa^nan zoux da'betv,
En^saa^mbaatc zoux da'juov,
13Ye^le^mi zoux da'ziepc,
Makv^mban^nai zoux ziepc yietv wuov dauh.
14Naaiv deix Gaatc Mienh zoux baeng-bieiv. Zoux gauh faix wuov deix div duqv yietc baeqv dauh. Zoux hlo wuov deix div duqv yietc cin dauh. 15Se dongh naaiv deix baeng-bieiv jiex Jor^ndaen Ndaaih doix zuqc zih hlaax wuom hlo buangv kamx, ziouc bun ndoqv-hlen nyei mienh dong dauh fai dauh nyei biaux nzaanx nzengc.

Gan Ndaawitv Nyei Yu^ndaa Caux Mben^yaa^min Mienh

16Aengx maaih deix Mben^yaa^min Mienh caux Yu^ndaa Mienh mingh taux Ndaawitv weih wuonv nyei dorngx wuov. 17Ndaawitv cuotv mingh zipv ninh mbuo yaac gorngv mbuox ninh mbuo, “Se gorngv meih mbuo daaih zoux longx, tengx yie, yie a'hneiv caux meih mbuo jiu zuoqc. Mv baac se gorngv meih mbuo oix zorqv yie maaic bun win-wangv maiv gunv yie maiv maaih zuiz nor, tov mbuo nyei ong-taaix nyei Tin-Hungh mangc buatc yaac dingc meih mbuo nyei zuiz.”
18Wuov zanc Singx Lingh njiec wuov deix “Faah Ziepc Dauh” nyei bieiv zeiv, Aa^maa^saix. Ninh ziouc gorngv,
  O Ndaawitv aac, yie mbuo se meih nyei.
   Jetc^si nyei dorn aac, yie mbuo caux meih yiem.
  Tov bun meih duqv baengh orn, za'gengh baengh orn.
   Yaac tov bun tengx meih wuov deix duqv baengh orn,
    weic zuqc meih nyei Tin-Hungh tengx meih.
 Ndaawitv ziouc zipv ninh mbuo aengx liepc ninh mbuo zoux jun-baeng nyei baeng-bieiv.

Gan Ndaawitv Nyei Maa^natv^se Mienh

19Maaih deix Maa^natv^se Mienh yaac biaux mingh bieqc Ndaawitv, dongh ninh caux Fi^li^saa^die Mienh cuotv mingh mborqv Saulo wuov zanc. (Mv baac Ndaawitv mbuo maiv duqv tengx Fi^li^saa^die Mienh, weic zuqc Fi^li^saa^die Mienh nyei bieiv zeiv caangh laangh liuz ziouc gorngv, “Se gorngv ninh mbuo guangc mbuo, biaux mingh tengx Saulo nor, nziex Ndaawitv mbuo zorqv mbuo nyei m'nqorngv maaic bun Saulo.”) 20Ndaawitv mingh Sikc^laakv nyei ziangh hoc, naaiv se biaux mingh gan ninh wuov deix Maa^natv^se Mienh. Maaih yiem Maa^natv^se gunv yietc cin dauh baeng nyei baeng-bieiv, Atc^naa, Yo^saa^mbaatc, Ye^ndi^yaa^en, Mi^kaa^en, Yo^saa^mbaatc, E^li^hu caux Sinx^le^tai. 21Naaiv deix mienh tengx Ndaawitv mborqv guanh guanh zaqc baeng, weic zuqc ninh mbuo yietc zungv se henv haic nyei mborqv jaax baeng, yaac zoux ninh nyei baeng-bieiv. 22Hnoi-hnoi maaih mienh daaih tengx Ndaawitv, taux ninh maaih domh baeng-guanh hnangv Tin-Hungh nyei baeng-guanh nor.

Yiem He^mbo^lon Gan Ndaawitv Nyei Baeng-Guanh

23Naaiv se maaih nzoih mborqv jaax nyei wuoqc ginc mingh He^mbo^lon lorz Ndaawitv wuov deix baeng nyei soux mouc. Ninh mbuo oix zorqv Saulo nyei guoqv jiu bun Ndaawitv ziux Ziouv gorngv nyei waac.
24Yu^ndaa Mienh nanv torngv-baaih caux cang liuc leiz ziangx mborqv jaax, maaih juqv cin betv baeqv dauh.
25Si^me^on Mienh mborqv jaax henv haic nyei baeng, maaih siec cin yietc baeqv dauh.
26⟨Lewi Mienh,⟩ maaih biei cin luoqc baeqv dauh, 27liemh Aalon nyei douh zong nyei bieiv zeiv, Ye^ho^yaa^ndaa, caux gan ninh wuov deix buo cin cietv baeqv dauh. 28Aengx maaih dauh hnyangx-jeiv lunx, mborqv jaax henv nyei mienh, mbuox heuc Saax^ndokc, aengx caux ninh juangc fingx nyei baeng-bieiv nyic ziepc nyeic dauh.
29Caux Saulo juangc fingx nyei Mben^yaa^min Mienh maaih buo cin dauh. Naaiv deix gauh camv jiex zinh ndaangc tengx Saulo.
30E^faa^im Fingx henv haic nyei baeng, se yiem ninh mbuo ganh nyei bungh buonc maaih mengh dauh nyei mienh, maaih i waanc betv baeqv dauh.
31Maa^natv^se nyei ndaamv-fingx, dongh ziux mbuox paaiv mingh liepc Ndaawitv zoux hungh wuov deix, maaih yietc waanc hietc cin dauh.
32Itc^saax^kaa Mienh, dongh haih samx duqv cuotv wuov jaax lungh ndiev nyei ziangh hoc yaac hiuv duqv I^saa^laa^en Mienh oix zuqc hnangv haaix nor zoux, maaih nyic baeqv dauh bieiv zeiv caux yiem naaiv deix bieiv zeiv nyei buoz-ndiev nyei juangc fingx mienh.
33Se^mbu^lun Mienh maaih biaa waanc dauh hoqc liuz yaac liuc leiz ziangx cuotv mingh mborqv jaax. Ninh mbuo maaih nzoih nyungc-nyungc mborqv jaax nyei wuoqc ginc. Ninh mbuo maaih nduqc diuc hnyouv tengx Ndaawitv.
34Napv^taa^li Mienh maaih yietc cin dauh baeng-bieiv caux jienv buo waanc siec cin dauh nanv torngv-baaih caux cang mborqv jaax nyei baeng.
35Ndaan Fingx maaih mbenc ziangx mborqv jaax nyei mienh i waanc hietc cin luoqc baeqv dauh.
36Aa^se Fingx hoqc liuz mbenc ziangx mborqv jaax nyei mienh maaih biei waanc dauh.
37Yiem Jor^ndaen Ndaaih dong bung maengx nyei Lu^mben Mienh, Gaatc Mienh caux Maa^natv^se nyei ndaamv-fingx mienh maaih jienv nyungc-nyungc mborqv jaax nyei wuoqc ginc nyei baeng, maaih yietc sinx i waanc dauh.
38Naaiv deix yietc zungv baeng liuc leiz ziangx mborqv jaax. Ninh mbuo daaih taux He^mbo^lon buangv hnyouv oix liepc Ndaawitv zoux hungh, gunv nzengc I^saa^laa^en Deic-Bung. Zengc njiec nyei I^saa^laa^en Mienh yietc zungv fih hnangv nyei yaac dongh hnyouv oix liepc Ndaawitv zoux hungh. 39Ninh mbuo caux Ndaawitv yiem wuov buo hnoi, nyanc nyei hopv nyei, weic zuqc ninh mbuo nyei muoz-doic mbenc ziangx bun ninh mbuo. 40Yiem nitv fatv ninh mbuo nyei mienh caux yiem go nyei mienh, se yiem Itc^saax^kaa, Se^mbu^lun caux Napv^taa^li wuov deix, longc maaz-li caux lorh caux lorh torh caux ngongh tor jienv nyanc hopv daaih. Maaih mbuonv, ngongh nyorx biouv-nqaai, a'ngunc biouv-nqaai, a'ngunc diuv, ga'lanv youh, ngongh caux ba'gi yungh, weic zuqc I^saa^laa^en Mienh njien-youh haic.