15

Dorh Laengz Ngaengc Waac Faang Taux Ye^lu^saa^lem

(Beiv mangc 2 Saa^mu^en 6:12-23)

1Ndaawitv yiem Ndaawitv Zingh weic ganh ceix ziangx hungh dinc, ninh ziouc liuc leiz dorngx aengx corng ndopv-liuh an Tin-Hungh nyei ⟨Laengz Ngaengc Waac Faang.⟩ 2wuov zanc Ndaawitv gorngv, “Cuotv liuz ⟨Laengz Ngaengc Waac Faang.⟩ maiv maaih haaix dauh maaih leiz gaeng Tin-Hungh nyei Laengz Ngaengc Waac Faang, weic zuqc Ziouv ginv ninh mbuo gaeng Ziouv nyei Laengz Ngaengc Waac Faang yaac yietc liuz fu-sux ninh.”
3Ndaawitv ziouc heuc I^saa^laa^en nyei zuangx mienh gapv zunv yiem Ye^lu^saa^lem weic dorh Ziouv nyei Laengz Ngaengc Waac Faang daaih an ninh liuc leiz ziangx nyei dorngx. 4Ninh heuc Aalon nyei zeiv-fun caux Lewi Mienh daaih gapv zunv.
5Yiem Ko^haatv nyei zeiv-fun daaih maaih U^li^en zoux bieiv zeiv yaac maaih yietc baeqv nyic ziepc dauh ninh nyei bungh buonc mienh.
6Yiem Me^laa^li nyei zeiv-fun daaih maaih Aa^saax^yaa zoux bieiv zeiv yaac maaih nyic baeqv nyic ziepc dauh ninh nyei bungh buonc mienh. 7Yiem Geson Mienh nyei zeiv-fun daaih maaih Yo^en zoux bieiv zeiv yaac maaih yietc baeqv faah ziepc dauh ninh nyei bungh buonc mienh. 8Yiem E^li^saa^faan nyei zeiv-fun daaih maaih Se^mai^aa zoux bieiv zeiv yaac maaih nyic baeqv dauh ninh nyei bungh buonc mienh. 9Yiem He^mbo^lon nyei zeiv-fun daaih maaih E^li^en zoux bieiv zeiv yaac maaih betv ziepc dauh ninh nyei bungh buonc mienh. 10Yiem Utc^si^en nyei zeiv-fun daaih maaih Am^mi^naa^ndapc zoux bieiv zeiv yaac maaih yietc baeqv ziepc nyeic dauh ninh nyei bungh buonc mienh.
11Ndaawitv aengx heuc sai mienh, Saax^ndokc caux Aa^mbi^yaa^taa, yaac heuc Lewi Mienh, U^li^en, Aa^saax^yaa, Yo^en, Se^mai^aa, E^li^en caux Am^mi^naa^ndapc. 12Ndaawitv gorngv mbuox ninh mbuo, “Meih mbuo se Lewi Mienh nyei bungh buonc bieiv zeiv. Meih mbuo caux meih mbuo juangc fingx nyei gorx-youz oix zuqc saax ganh cing-nzengc, meih mbuo ziouc haih dorh Ziouv, I^saa^laa^en Mienh nyei Tin-Hungh, nyei Laengz Ngaengc Waac Faang taux yie liuc leiz ziangx nyei dorngx. 13Se laaix meih mbuo Lewi Mienh zinh ndaangc wuov nzunc maiv mingh gaeng naaiv norm Laengz Ngaengc Waac Faang daaih, Ziouv, mbuo nyei Tin-Hungh, cingx daaih qiex jiez mbuo, weic zuqc mbuo maiv naaic ninh oix zuqc hnangv haaix nor ei dingc daaih nyei leiz zoux.” 14Sai mienh caux Lewi Mienh ziouc saax ganh cing-nzengc weic dorh Ziouv, I^saa^laa^en Mienh nyei Tin-Hungh, nyei Laengz Ngaengc Waac Faang daaih. 15Lewi Mienh longc gaeng Laengz Ngaengc Waac Faang nyei ndiangx gaeng Tin-Hungh nyei Laengz Ngaengc Waac Faang ziux Ziouv longc Mose paaiv nyei waac.
16Ndaawitv mbuox Lewi Mienh nyei bieiv zeiv paaiv ninh mbuo nyei gorx-youz zoux baaux nzung nyei mienh, longc ziex nyungc zoux nzung nyei jaa-sic, patv domh daanh baah, fiuv-daanh baah, nqaapv caauh zeiv, zoux njien-youh nyei qiex mbui.
17Lewi Mienh ziouc paaiv Yo^en nyei dorn, Hemaan, caux dauh ninh nyei gorx-youz, Mbe^le^ki^yaa nyei dorn, Aasaapc, caux ninh mbuo nyei gorx-youz Me^laa^li Mienh, Ku^saa^yaa nyei dorn, Etaan. 18Ninh mbuo aengx ginv deix ninh mbuo nyei gorx-youz weic tengx ninh mbuo. Maaih Se^kaa^li^yaa, Yaa^aa^si^en, Se^mi^laa^motv, Ye^hi^en, Unni, E^li^apc, Mbe^nai^yaa, Maa^aa^se^aa, Matv^ti^ti^yaa, E^li^fe^le^hu, Mikv^ne^yaa, caux zuov gaengh mienh O^mbetc E^ndom caux Ye^hi^en.
19Baaux nzung nyei mienh, Hemaan, Aasaapc caux Etaan oix zuqc nqaapv dongh siqv caauh zeiv. 20Se^kaa^li^yaa, Aa^si^en, Se^mi^laa^motv, Ye^hi^en, Unni, E^li^apc, Maa^aa^se^aa caux Mbe^nai^yaa oix zuqc patv daanh baah ziux ⟨aa^laa^motv.⟩ 21Matv^ti^ti^yaa, E^li^fe^le^hu, Mikv^ne^yaa, O^mbetc E^ndom, Ye^i^en caux Aa^saa^si^yaa oix zuqc patv daanh baah dorh nzung ziux ⟨aa^laa^motv.⟩ 22Lewi Mienh nyei bieiv zeiv Ke^naa^ni^yaa, se dorh nzung nyei bieiv, dorh ninh mbuo baaux nzung weic zuqc ninh haih haic.
23Mbe^le^ki^yaa caux En^kaa^naa zoux zuov gaengh mienh zuov Laengz Ngaengc Waac Faang. 24Qe^mbaa^ni^yaa, Yo^saa^fatv, Ne^tan^en, Aa^maa^saix, Se^kaa^li^yaa, Mbe^nai^yaa, E^li^ ye^se, caux sai mienh oix zuqc yiem Tin-Hungh nyei Laengz Ngaengc Waac Faang nza'hmien biomv nzatc. O^mbetc E^ndom caux Ye^hi^yaa yaac zoux Laengz Ngaengc Waac Faang nyei zuov gaengh mienh.

Dorh Laengz Ngaengc Waac Faang Mingh Ye^lu^saa^lem

(Beiv mangc 2 Saa^mu^en 6:12-22)

25Ndaawitv caux I^saa^laa^en Mienh nyei mienh gox caux gunv yietc cin dauh baeng nyei baeng-bieiv ziouc mingh O^mbetc E^ndom nyei biauv, njien-youh nyei dorh Ziouv nyei Laengz Ngaengc Waac Faang daaih. 26Weic zuqc Tin-Hungh tengx gaeng Ziouv nyei Laengz Ngaengc Waac Faang nyei Lewi Mienh, ninh mbuo longc siec dauh ngongh gouv caux siec dauh yungh gouv ziec. 27Ndaawitv zuqv jienv la'maah ndie-muonc zoux daaih nyei lui-ndaauv. Gaeng Laengz Ngaengc Waac Faang nyei Lewi Mienh caux baaux nzung mienh nyei bieiv, Ke^naa^ni^yaa, caux baaux nzung nyei yietc zungv mienh, fih hnangv nyei zuqv jienv la'maah ndie-muonc. Ndaawitv yaac zuqv jienv la'maah ndie-muonc nyei ⟨efotv.⟩ 28I^saa^laa^en nyei zuangx mienh ziouc njien-youh nyei heuc mbui, biomv jorng biomv nzatc, nqaapv caauh zeiv, aengx patv domh daanh baah, fiuv-daanh baah zoux cuotv qiex mbui dorh Ziouv nyei Laengz Ngaengc Waac Faang daaih.
29Dorh Ziouv nyei Laengz Ngaengc Waac Faang daaih taux Ndaawitv nyei Zingh nyei ziangh hoc, Saulo nyei sieqv, Mikaan, mangc cuotv fong muonh, buatc Ndaawitv Hungh zoux nauc nyitc cangx heix, ninh ziouc yiem hnyouv mangc piex Ndaawitv.