26

Zuov Gaengh Nyei Mienh

1Zuov gaengh nyei guanh guanh mienh maaih hnangv naaiv.
Kolaa Mienh maaih Ko^le nyei dorn, Me^se^le^mi^yaa, se yietc dauh Aasaapc nyei zeiv-fun.
2Me^se^le^mi^yaa maaih dorn nyei.
Dorn-hlo, Se^kaa^li^yaa,
da'nyeic dauh, Ye^ndi^yaa^en,
da'faam dauh, Se^mbaa^ndi^yaa,
da'feix dauh, Yaatv^ni^en,
3da'hmz dauh, Elaam,
da'luoqc dauh, Ye^ho^haa^nan,
da'cietv dauh, E^li^ho^nai.
4O^mbetc E^ndom yaac maaih dorn nyei.
Dorn-hlo, Se^mai^aa,
da'nyeic dauh, Ye^ho^saa^mbaatc,
da'faam dauh, Yo^aa,
da'feix dauh, Saax^kaa,
da'hmz dauh, Ne^tan^en
5da'luoqc dauh, Am^mi^en,
da'cietv dauh, Itc^saax^kaa,
da'betv dauh, Be^un^le^tai,
weic zuqc Tin-Hungh ceix fuqv bun O^mbetc E^ndom.
6Ninh nyei dorn, Se^mai^aa, yaac maaih dorn nyei. Ninh mbuo gunv ninh mbuo nyei die nyei jaa-dingh weic zuqc ninh mbuo haih haic. 7Se^mai^aa nyei dorn maaih Otc^ni, Le^faa^en, O^mbetc caux En^saa^mbaatc. Ninh mbuo nyei gorx-youz, E^li^hu caux Se^maa^ki^yaa, yaac zoux maaih banh zeic nyei mienh. 8Naaiv deix yietc zungv se O^mbetc E^ndom nyei zeiv-fun. Ninh mbuo caux ninh mbuo nyei dorn caux ninh mbuo nyei gorx-youz maaih banh zeic, maaih qaqv puix zoux singx dinc nyei gong. O^mbetc E^ndom nyei zeiv-fun yietc zungv maaih luoqc ziepc nyeic dauh.
9Me^se^le^mi^yaa maaih dorn caux gorx-youz zoux maaih banh zeic nyei mienh yietc zungv maaih ziepc betv dauh.
10Me^laa^li nyei zeiv-fun, Hosaax, maaih dorn nyei. Da'yietv dauh Simli, (maiv gunv ninh maiv zeiz dorn-hlo, ninh nyei die paaiv ninh zoux bieiv zeiv), 11da'nyeic dauh Hin^ki^yaa, da'faam dauh Te^mbaa^li^yaa, da'feix dauh Se^kaa^li^yaa. Hosaax nyei dorn caux gorx-youz yietc zungv maaih ziepc faam dauh.
12Naaiv deix zuov gaengh nyei guanh ziux ninh mbuo nyei bieiv zeiv maaih gong yiem zaangc Ziouv nyei biauv fu-sux hnangv ninh mbuo nyei gorx-youz nor. 13Maiv gunv hlo faix, ninh mbuo ziux bungh buonc dingc maengc mangc gaax haaix dauh zuov haaix dauh gaengh.
14Ndortv zuqc Se^le^mi^yaa zuov Dong Bung Gaengh. Ninh mbuo yaac weic ninh nyei dorn, Se^kaa^li^yaa, dingc maengc mangc, se yietc dauh caangh laangh nyei mienh guai mienh, maaih cong-mengh nyei mienh. Ndortv zuqc ninh oix zuqc zuov Baqv Bung Gaengh. 15Ndortv zuqc O^mbetc E^ndom zuov Naamh Bung Gaengh. Ndortv zuqc ninh nyei dorn zuov siou ga'naaiv nyei biauv. 16Ndortv zuqc Supv^bim caux Hosaax zuov Fai Bung Gaengh caux yiem faaux wuov jiex nyei jauv nyei San^le^ketv Gaengh.
 Ninh mbuo zuov gaengh yietc guanh jiex yietc guanh.
17Mouz hnoi zuov zaangc Tin-Hungh nyei biauv dong bung maaih juqv dauh, baqv bung maaih biei dauh, naamh bung maaih biei dauh. Yaac maaih i dauh zuov siou ga'naaiv wuov biauv. 18Yiem fai bung maengx, maaih biei dauh zuov wuov jauv, maaih i dauh zuov yiem biauv nyei ga'nyiec maengx, laatc gu'nyuoz.
19Naaiv se Kolaa caux Me^laa^li nyei zeiv-fun ziux ninh mbuo bun nqoi zoux zuov gaengh nyei guanh.

Zuov Siou Ga'naaiv Nyei Dorngx Nyei Lewi Mienh

20Lewi Mienh, Aa^hi^yaa, gunv zaangc Tin-Hungh nyei biauv siou jaaix nyei ga'naaiv nyei dorngx caux fungx bun Tin-Hungh nyei ga'naaiv nyei dorngx.
21Geson Mienh, Laa^ndaan nyei zeiv-fun, se Geson Mienh, Laa^ndaan, nyei bungh buonc bieiv zeiv, maaih Laa^ndaan nyei dorn, Ye^hi^e^li, 22caux Ye^hi^e^li nyei i dauh dorn, Setaam, caux ninh nyei youz, Yo^en. Ninh mbuo gunv zaangc Ziouv nyei biauv nyei siou jaaix nyei ga'naaiv nyei dorngx.
23Yiem Amlaam Mienh, Itc^haa Mienh, He^mbo^lon Mienh caux Utc^si^en Mienh nyei zeiv-fun maaih
24Mose nyei dorn, Geson, nyei zeiv-fun, Su^mbaa^en, zoux bieiv gunv zaangc Tin-Hungh nyei biauv, siou jaaix nyei ga'naaiv nyei dorngx. 25Aengx maaih ninh nyei gorx-youz, E^li^ye^se nyei dorn, Le^hapc^yaa, Le^hapc^yaa nyei dorn, Ye^saa^yaa, Ye^saa^yaa nyei dorn, Yolam, Yolam nyei dorn, Sikc^li, Sikc^li nyei dorn, Se^lo^mitv. 26Se^lo^mitv caux ninh nyei gorx-youz goux siou fungx bun Tin-Hungh nyei yietc zungv ga'naaiv nyei dorngx, se Ndaawitv caux bungh buonc bieiv zeiv caux gunv yietc cin dauh baeng, yietc baeqv dauh baeng nyei baeng-bieiv caux jun-baeng-bieiv fongc horc nyei ga'naaiv. 27Ninh mbuo zorqv deix ninh mbuo mborqv jaax caangv daaih nyei ga'naaiv fongc horc weic zorc zaangc Ziouv nyei biauv. 28Douc waac mienh, Saa^mu^en, caux Kitv nyei dorn, Saulo, caux Ne nyei dorn, Apc^ne, caux Se^lu^yaa nyei dorn, Yo^aapc, fongc horc nyei yietc zungv ga'naaiv Se^lo^mitv caux ninh nyei gorx-youz gunv.
29Itc^haa Mienh, Ke^naa^ni^yaa, caux ninh nyei dorn mbuo ninh mbuo paaiv gunv zaangc Tin-Hungh nyei biauv ga'nyiec maengx nyei sic, se zoux I^saa^laa^en nyei jien caux domh jien.
30He^mbo^lon Mienh, Haa^saa^bi^yaa, caux ninh nyei gorx-youz yietc cin cietv baeqv dauh maaih banh zeic nyei mienh, yiem I^saa^laa^en, Jor^ndaen Ndaaih fai bung maengx, liuc leiz Ziouv caux hungh diex nyei yietc zungv gong. 31He^mbo^lon Mienh, Ye^li^yaa, ziux ninh mbuo nyei bungh buonc nyei douh zong daan zoux He^mbo^lon Mienh nyei bieiv zeiv. (Doix Ndaawitv zoux hungh feix ziepc hnyangx wuov hnyangx, mienh yiem ninh mbuo nyei douh zong lorz buatc maaih banh zeic nyei He^mbo^lon Mienh yiem Gi^le^aatc Deic, Yaase wuov.) 32Ye^li^yaa maaih i cin cietv baeqv dauh gorx-youz, yietc zungv maaih banh zeic nyei mienh yaac zoux bungh buonc nyei bieiv zeiv. Ndaawitv paaiv ninh mbuo yiem Lu^mben Mienh, Gaatc Mienh, caux Maa^natv^se ndaamv-fingx mienh mbu'ndongx gunv Tin-Hungh caux hungh diex nyei yietc zungv gong.