11

Saa^lo^morn Leih Tin-Hungh

1Saa^lo^morn hnamv haic ganh fingx mienh nyei sieqv camv haic. Cuotv liuz Faalo Hungh nyei sieqv ninh longc Mo^apc Mienh, Ammon Mienh, E^ndom Mienh, Sai^ndorn Mienh caux Hitv^tai Mienh nyei sieqv. 2Naaiv se Ziouv gorngv mbuox I^saa^laa^en Mienh, “Maiv dungx caux naaiv deix Janx dorng jaa, yaac maiv dungx bun ninh mbuo caux meih mbuo dorng jaa, weic zuqc ninh mbuo zungv oix baeng meih mbuo mingh gan ninh mbuo nyei zienh.” Mv baac Saa^lo^morn za'gengh hnamv duqv nyouh haic naaiv deix sieqv. 3Ninh longc cietv baeqv dauh hungh sieqv zoux auv, yaac maaih faam-baeqv dauh jaav-zeih auv. Ninh nyei auv yaac baeng ninh nyei hnyouv mingh ganh bung. 4Saa^lo^morn hnyangx-jeiv gox nyei ziangh hoc, ninh nyei auv mbuo baeng ninh nyei hnyouv mingh gan nyiec nyei zienh. Ninh maiv longc nzengc hnyouv gan Ziouv, ninh nyei Tin-Hungh, hnangv ninh nyei die, Ndaawitv, longc nzengc hnyouv gan nor. 5Saa^lo^morn gan Sai^ndorn Mienh nyei Atc^taa^lotv zienh nyeiz, yaac gan Ammon Mienh gamh nziev haic nyei ⟨Molekv zienh.⟩ 6Hnangv naaic, ziux Ziouv buatc, Saa^lo^morn zoux orqv haic nyei sic. Ninh maiv longc nzengc hnyouv gan Ziouv hnangv ninh nyei die, Ndaawitv, gan nor.
7Yiem Ye^lu^saa^lem dong bung maengx nyei mbong gu'nguaaic, Saa^lo^morn zoux norm hlang nyei dorngx zaangc Mo^apc Mienh nyei gamh nziev haic nyei Kemotv zienh caux Ammon Mienh nyei gamh nziev haic nyei Molekv zienh. 8Ninh aengx fih hnangv nyei zoux weic bun ninh nyei yietc zungv ganh fingx auv haih buov hung fongc horc ga'naaiv ziec ninh mbuo nyei zienh.
9Ziouv qiex jiez haic Saa^lo^morn, weic zuqc Saa^lo^morn nyei hnyouv leih Ziouv, I^saa^laa^en Mienh nyei Tin-Hungh, dongh hinc cuotv bun ninh buatc i nzunc nyei Tin-Hungh. 10Maiv gunv Ziouv hatc Saa^lo^morn maiv dungx gan nyiec nyei zienh, ninh maiv ei Ziouv hatc nyei waac zoux. 11Weic naaiv Ziouv gorngv mbuox Saa^lo^morn. “Laaix meih hnangv naaiv nor hnamv, meih yaac maiv ei jienv yie laengz nyei ngaengc waac caux yie hatc nyei leiz-latc, yie zungv oix zorqv meih nyei guoqv betv mingh jiu bun dauh meih nyei jien. 12Mv baac weic meih nyei die, Ndaawitv, yiem meih ziangh jienv nyei ziangh hoc, yie maiv gaengh zoux. Zuov meih nyei dorn zoux hungh nyei ziangh hoc yie cingx betv cuotv. 13Mv baac yie maiv zorqv ziangh norm guoqv betv cuotv. Weic yie nyei bou, Ndaawitv, yaac weic yie ginv daaih nyei zingh, Ye^lu^saa^lem, yie ziouc liouh yietc fingx bun meih nyei dorn.”

Saa^lo^morn Nyei Win-Wangv

14Ziouv bun dauh E^ndom Mienh, se E^ndom Hungh nyei yietc dauh fun-faqv, mbuox heuc Haa^ndatc, zoux Saa^lo^morn nyei win-wangv. 15Zinh ndaangc Ndaawitv yiem E^ndom mborqv jaax, domh baeng-bieiv, Yo^aapc, faaux mingh biopv zuqc daix daic nyei mienh wuov zanc, ninh yaac daix nzengc E^ndom nyei yietc zungv m'jangc dorn. 16Yo^aapc caux I^saa^laa^en nyei zuangx mienh yiem naaic juqv hlaax nyieqc zuov taux ninh mbuo daix nzengc E^ndom Mienh nyei yietc zungv m'jangc dorn. 17Wuov zanc Haa^ndatc corc faix nyei. Ninh caux deix E^ndom Mienh, se ninh nyei die nyei jien, biaux mingh yiem I^yipv Deic-Bung. 18Ninh mbuo yiem Mi^ndien cuotv jauv mingh taux Baalaan. Yiem Baalaan ninh mbuo aengx dorh deix mienh mingh taux I^yipv, mingh lorz I^yipv Deic-Bung nyei Faalo Hungh. Hungh diex bun biauv caux lingh deic aengx juang nyanc hopv bun Haa^ndatc.
19Haa^ndatc horpc Faalo nyei hnyouv haic, Faalo ziouc zorqv ninh ganh nyei auv nyei nziez, se Taa^be^netv Hungh Maac nyei nziez, bun Haa^ndatc longc zoux auv. 20Taa^be^netv nyei nziez yungz dauh dorn bun Haa^ndatc. Naaiv dauh dorn nyei mbuox heuc Ge^nu^mbatc. Taa^be^netv bun Ge^nu^mbatc yiem Faalo nyei hungh dinc guangc nyorx. Ninh ziouc caux Faalo ganh nyei dorn yiem wuov.
21Yiem gau I^yipv Deic-Bung, Haa^ndatc haiz gorngv Ndaawitv guei seix mi'aqv, domh baeng-bieiv, Yo^aapc, yaac daic mi'aqv. Haa^ndatc ziouc gorngv mbuox Faalo, “Tov bun yie mingh aqv, bun yie duqv nzuonx yie ganh nyei guoqv.”
22Faalo naaic gaax, “Meih caux yie yiem naaiv meih caa haaix nyungc cingx daaih ih zanc oix nzuonx meih ganh nyei deic-bung?”
 Haa^ndatc dau, “Maiv caa haaix nyungc. Mv baac tov meih bun yie nzuonx.”
23Tin-Hungh aengx bun dauh mienh, se E^li^yaa^ndaa nyei dorn, Leson, zoux Saa^lo^morn nyei win-wangv. Zinh ndaangc Leson biaux ninh nyei ziouv, So^mbaa nyei hungh, Haa^ndatc^e^se. 24Ndaawitv mborqv baaic, daix nzengc So^mbaa Mienh wuov zanc, Leson ziouc yuoqc duqv guanh mienh faanv deic-bung. Ninh ganh zoux bieiv. Naaiv guanh mienh mingh Ndaa^matv^gatc Zingh, yiem naaic liepc ninh zoux hungh. 25Yiem Saa^lo^morn ziangh jienv nyei hnoi-nyieqc, Leson zoux I^saa^laa^en Mienh nyei win-wangv, ceux lunc deic-bung hnangv Haa^ndatc nor. Leson zoux hungh gunv Silie Deic-Bung yaac nzorng I^saa^laa^en Mienh.

Ziouv Caux Ye^lo^mbo^am Laengz Waac

26Aengx maaih Ne^mbatc nyei dorn, Ye^lo^mbo^am, ngaengc Saa^lo^morn. Ye^lo^mbo^am zoux Saa^lo^morn nyei jien, se yiem Se^le^ndaa daaih nyei E^faa^im Mienh. Ninh nyei maa se auv-guaav, mbuox heuc Se^lu^waa.
27Yiem naaiv mingh gorngv Ye^lo^mbo^am hnangv haaix nor ngaengc hungh diex nyei jauv-louc. Saa^lo^morn zorc Minlo yaac zorc ninh nyei die, Ndaawitv, nyei zingh, se zorc zingh laatc tong nyei dorngx. 28Ye^lo^mbo^am se maaih banh zeic nyei mienh. Saa^lo^morn buatc naaiv dauh hnyangx-jeiv lunx nyei m'jangc dorn, Saa^lo^morn ziouc paaiv ninh gunv aapv zoux gong, Yosepv nyei zeiv-fun nyei yietc zungv gong-mienh.
29Maaih hnoi Ye^lo^mbo^am yiem Ye^lu^saa^lem cuotv mingh. Yiem Silo nyei douc waac mienh, Aa^hi^yaa, yiem jauv zaangc buangh zuqc ninh. Aa^hi^yaa zuqv jienv siang-lui. Ninh mbuo i dauh yiem wuov naah, lengh nyei dorngx. 30Aa^hi^yaa zorqv ninh ganh zuqv jienv nyei siang-lui betv zoux ziepc nyeic kuaaiv. 31Ninh ziouc gorngv mbuox Ye^lo^mbo^am, “Gunv zorqv ziepc kuaaiv mingh weic zuqc Ziouv, I^saa^laa^en nyei Tin-Hungh, gorngv, ‘Yie oix zorqv yiem Saa^lo^morn nyei buoz-ndiev nyei guoqv betv cuotv mingh yaac bun ziepc fingx meih. 32Mv baac weic yie nyei bou, Ndaawitv, yaac weic yie yiem I^saa^laa^en nyei zuangx fingx ginv naaiv norm Ye^lu^saa^lem Zingh, yie liouh yietc fingx bun Saa^lo^morn gunv. 33Yie hnangv naaiv zoux weic zuqc ninh guangc yie mingh zaangc Sai^ndorn Mienh nyei Atc^taa^lotv zienh nyeiz, caux Mo^apc Mienh nyei Kemotv zienh, caux Ammon Mienh nyei Molekv zienh. Ninh maiv yangh yie nyei doz-leiz. Ei yie mangc ninh yaac zoux maiv horpc, maiv gan yie nyei lingc caux leiz-latc hnangv ninh nyei die, Ndaawitv, nor.
34“ ‘Mv baac yie maiv zorqv zuangx guoqv yiem Saa^lo^morn nyei buoz-ndiev cuotv. Yie weic yie ginv daaih nyei bou, Ndaawitv, gan longx yie nyei lingc caux leiz-latc, bun Saa^lo^morn ziangh seix duqv gunv. 35Yie oix zorqv guoqv yiem ninh nyei dorn nyei buoz-ndiev cuotv yaac zorqv ziepc fingx jiu bun meih. 36Yie oix jiu yietc fingx bun ninh nyei dorn weic bun yie nyei bou, Ndaawitv, zanc-zanc maaih zeiv-fun yiem yie ginv daaih weic liepc yie nyei Mengh naaiv norm Ye^lu^saa^lem Zingh. 37Ye^lo^mbo^am aac, yie bun meih sueih eix gunv taux haaix yaac liepc meih zoux hungh gunv I^saa^laa^en Mienh. 38Se gorngv meih muangx yie hatc meih nyei yietc zungv waac yaac yangh yie nyei doz-leiz, gan yie nyei lingc caux leiz-latc, ziouc ei yie mangc zoux duqv horpc hnangv yie nyei bou, Ndaawitv, zoux nor, yie oix caux meih yiem. Yie ziouc liepc wuonv meih nyei hungh douh hnangv yie liepc Ndaawitv nyei nor, yaac zorqv I^saa^laa^en jiu bun meih. 39Laaix Saa^lo^morn nyei zuiz, yie oix bun Ndaawitv nyei zeiv-fun zuqc dingc zuiz, mv baac maiv zeiz yietc liuz.’+”
40Saa^lo^morn lorz qangx daix Ye^lo^mbo^am, mv baac Ye^lo^mbo^am biaux mingh I^yipv, taux I^yipv nyei Sisakv Hungh, yiem naaic taux Saa^lo^morn daic mingh.

Saa^lo^morn Guei Seix

(2 Zunh Doic Douh 9:29-31)

41Cuotv liuz naaiv deix sic, Saa^lo^morn zoux nyei yietc zungv caux ninh nyei cong-mengh waac fiev jienv Saa^lo^morn nyei hungh douh daan. 42Saa^lo^morn yiem Ye^lu^saa^lem gunv I^saa^laa^en Mienh feix ziepc hnyangx. 43Saa^lo^morn guei seix mi'aqv, yaac zangx jienv ninh nyei die, Ndaawitv, nyei Zingh. Ninh nyei dorn, Le^hox^mbo^am, nzipc jienv ninh zoux hungh.