12

I^saa^laa^en Mienh Ngaengc Le^hox^mbo^am

(Beiv mangc 2 Zunh Doic Douh 10:1-19)

1Le^hox^mbo^am mingh Sekem Zingh weic zuqc I^saa^laa^en nyei zuangx mienh mingh Sekem liepc ninh zoux hungh. 2(Wuov zanc Ne^mbatc nyei dorn, Ye^lo^mbo^am, corc yiem I^yipv Deic-Bung weic zuqc ninh biaux Saa^lo^morn Hungh mingh yiem I^yipv.) Ye^lo^mbo^am yietv haiz ninh mbuo oix liepc Le^hox^mbo^am zoux hungh, ninh yiem I^yipv nzuonx. 3Zuangx mienh ziouc bun mienh mingh heuc Ye^lo^mbo^am daaih. Ye^lo^mbo^am caux yietc zuangx gapv zunv nyei I^saa^laa^en Mienh mingh lorz Le^hox^mbo^am. Ninh mbuo gorngv, 4“Meih nyei die, Saa^lo^morn, hoic yie mbuo kouv, hnangv gaaz ⟨ndiangx-gaaz⟩ hniev nor. Ih zanc tov meih zanv njiec yie mbuo zuqc kouv nyei jauv yaac bun yie mbuo gaaz nyei ndiangx-gaaz gauh heng, yie mbuo yietc zungv ziouc fu-sux meih.”
5Le^hox^mbo^am gorngv mbuox ninh mbuo, “Meih mbuo nzuonx aqv. Jiex liuz buo hnoi aengx daaih lorz yie.” Zuangx mienh ziouc nzuonx aqv.
6Le^hox^mbo^am ziouc caux zinh ndaangc ninh nyei die, Saa^lo^morn, yiem seix zaangc wuov zanc tengx ninh nyei die zoux gong nyei mienh gox mienh caangh laangh. Ninh gorngv, 7“Meih mbuo tengx yie hnamv gaax, yie oix zuqc hnangv haaix nor dau naaiv deix mienh?”
 Ninh mbuo dau, “Se gorngv ih hnoi hungh diex oix zoux bou fu-sux naaiv deix baeqc fingx nor, dau longx ninh mbuo, ninh mbuo yietc liuz oix zoux meih nyei bou aqv.”
8Mv baac Le^hox^mbo^am maiv longc naaiv deix mienh gox mienh caangh laangh daaih nyei waac. Ninh mingh lorz caux ninh hlo daaih wuov baan mienh, dongh ih zanc fu-sux ninh wuov deix mienh lunx mienh. 9Le^hox^mbo^am naaic ninh mbuo, “Meih mbuo tengx yie hnamv mangc gaax, yie oix zuqc hnangv haaix nor dau naaiv deix mienh? Ninh mbuo gorngv, ‘Meih nyei die bun yie mbuo gaaz ndiangx-gaaz hniev nyei, tov meih guangc heng deix.’+”
10Caux ninh hlo daaih naaiv deix mienh lunx mienh gorngv, “Naaiv deix baeqc fingx gorngv mbuox hungh diex, ‘Meih nyei die bun yie mbuo gaaz ndiangx-gaaz hniev, tov meih bun yie mbuo heng deix.’ Hungh diex oix zuqc mbuox naaiv deix mienh, ‘Yie nyei buoz-ndoqv-dorn gauh hoz yie nyei die nyei jaaiv. 11Yie nyei die bun meih mbuo gaaz ndiangx-gaaz hniev. Yie zungv oix bun meih mbuo gauh hniev. Yie nyei die longc biaav-bin mborqv meih mbuo. Yie oix longc ziepc nyeic ndaangh bin mborqv meih mbuo.’+”
12Jiex liuz buo hnoi, Ye^lo^mbo^am caux zuangx baeqc fingx aengx daaih lorz Le^hox^mbo^am hnangv hungh diex gorngv nor. Ninh gorngv, “Jiex liuz buo hnoi aengx daaih lorz yie.” 13Hungh diex longc waac ciouv nyei dau baeqc fingx. Ninh maiv longc wuov deix mienh gox mienh caangh laangh nyei waac. 14Ninh longc mienh lunx mienh caangh laangh nyei za'eix. Ninh gorngv, “Yie nyei die bun meih mbuo gaaz ndiangx-gaaz hniev. Yie zungv oix bun meih mbuo gaaz gauh hniev. Yie nyei die longc biaav-bin mborqv meih mbuo. Yie oix longc ziepc nyeic ndaangh bin mborqv meih mbuo.” 15Hungh diex ziouc maiv muangx baeqc fingx tov nyei waac, weic zuqc naaiv se Ziouv nyei za'eix bun sic cuotv doix Ziouv longc Silo Mienh, Aa^hi^yaa, douc bun Ne^mbatc nyei dorn, Ye^lo^mbo^am, nyei waac.
16I^saa^laa^en nyei zuangx mienh buatc hungh diex maiv muangx ninh mbuo, ninh mbuo gorngv mbuox hungh diex,
  “Yie mbuo caux Ndaawitv maaih haaix nyungc buonc?
   Yie mbuo caux Jetc^si maiv maaih yie mbuo nzipc nyei buonc.
  O I^saa^laa^en Mienh aac, gorqv-mienh nzuonx gorqv-mienh nyei biauv aqv.
   O Ndaawitv aac, goux meih ganh nyei hungh douh maah!”
I^saa^laa^en Mienh ziouc nzuonx biauv mi'aqv.
17Mv baac Le^hox^mbo^am corc gunv yiem Yu^ndaa Deic nyei zingh nyei I^saa^laa^en Mienh.
18Le^hox^mbo^am Hungh paaiv gunv aapv zoux gong nyei mienh wuov dauh Aa^ndo^ni^lam mingh I^saa^laa^en Mienh wuov, mv baac I^saa^laa^en Mienh zoi la'bieiv zong daic ninh. Le^hox^mbo^am ziouc siepv-siepv nyei faaux ninh nyei mborqv jaax maaz-cie biaux nzuonx Ye^lu^saa^lem. 19Hnangv naaic, I^saa^laa^en Mienh ngaengc jienv Ndaawitv nyei hungh douh taux ih jaax hnoi.
20I^saa^laa^en nyei zuangx mienh haiz gorngv Ye^lo^mbo^am yiem I^yipv nzuonx daaih, ninh mbuo paaiv mienh mingh heuc ninh daaih taux. Gapv zunv nyei zuangx mienh ziouc liepc ninh zoux hungh gunv I^saa^laa^en nyei yietc zungv mienh. Maiv maaih haaix fingx gan Ndaawitv nyei douh zong cuotv liuz Yu^ndaa Fingx hnangv.

Se^mai^aa Douc Tin-Hungh Nyei Waac

(Beiv mangc 2 Zunh Doic Douh 11:1-4)

21Le^hox^mbo^am yietv nzuonx taux Ye^lu^saa^lem, ninh heuc Yu^ndaa nyei zeiv-fun yietc zungv caux Mben^yaa^min Fingx gapv zunv daaih. Yietc zungv maaih yietc sinx hietc waanc dauh ginv daaih nyei mborqv jaax baeng, weic mingh caux I^saa^laa^en nyei zeiv-fun mborqv jaax, nzaeng guoqv nzuonx bun Saa^lo^morn nyei dorn, Le^hox^mbo^am.
22Mv baac Tin-Hungh nyei mienh, Se^mai^aa, duqv zipv Tin-Hungh nyei waac hnangv naaiv gorngv, 23“Oix zuqc mbuox Yu^ndaa nyei hungh, Saa^lo^morn nyei dorn, Le^hox^mbo^am, caux Yu^ndaa nyei yietc zungv zeiv-fun, caux Mben^yaa^min nyei zeiv-fun, caux zengc njiec nyei mienh, 24Ziouv hnangv naaiv nor gorngv. ‘Maiv dungx mingh caux meih nyei gorx-youz, I^saa^laa^en Mienh, mborqv jaax. Gorqv-mienh oix zuqc nzuonx gorqv-mienh nyei biauv weic zuqc naaiv se yie zoux nyei sic.’+” Ninh mbuo ziouc muangx Ziouv nyei waac aengx nzuonx biauv hnangv Ziouv hatc ninh mbuo nor.

Ye^lo^mbo^am Dorh I^saa^laa^en Mienh Baamz Zuiz

25Ye^lo^mbo^am yiem E^faa^im nyei mbong-aiv dorngx ceix Sekem Zingh yaac yiem jienv wuov. Ninh aengx cuotv wuov norm dorngx mingh ceix Be^ni^en.
26Ye^lo^mbo^am yiem hnyouv hnamv, “Nziex naaiv norm guoqv haih goiv nzuonx benx Ndaawitv nyei fun-faqv nyei. 27Se gorngv naaiv deix mienh mingh taux Ye^lu^saa^lem Zingh yiem zaangc Ziouv nyei biauv fongc horc ziec, ninh mbuo aengx tiuv hnyouv mingh gan ninh mbuo nyei loz-ziouv, Yu^ndaa nyei hungh, Le^hox^mbo^am, ninh mbuo ziouc daix yie aengx nzuonx Yu^ndaa nyei hungh, Le^hox^mbo^am.”
28Hungh diex ziouc caangh laangh dingc. Ninh zoux i dauh jiem-ngongh dorn aengx gorngv mbuox baeqc fingx, “Meih mbuo mingh Ye^lu^saa^lem lauh haic. Gaux aqv. I^saa^laa^en Mienh aac, mangc gaax naaiv! Naaiv se dorh meih mbuo cuotv I^yipv Deic-Bung nyei zienh.” 29Ye^lo^mbo^am ziouc zorqv dauh jiem-ngongh dorn an Mbetc^en Zingh, aengx zorqv dauh an Ndaan Zingh. 30Naaiv yaac benx zuiz mi'aqv, weic zuqc baeqc fingx mingh Mbetc^en baaix wuov dauh, aengx mingh go nyei taux Ndaan Zingh baaix wuov dauh.
31Ye^lo^mbo^am yaac yiem ziex norm hlang nyei dorngx ceix zaangc zienh nyei biauv. Yiem zuangx mienh mbu'ndongx ninh orn ziex nyungc mienh zoux sai mienh, maiv gunv ninh mbuo maiv zeiz ⟨Lewi Mienh.⟩ 32Ye^lo^mbo^am aengx dingc betv hlaax ziepc hmz weic benx zipv hnangv yiem Yu^ndaa jiex nyei zipv nor. Ninh yaac fongc horc ga'naaiv yiem ziec-dorngh ziec. Ninh yiem Mbetc^en hnangv naaiv nor zoux, dorh ga'naaiv ziec ninh zoux daaih nyei ngongh gouv dorn. Ninh yaac orn sai mienh yiem Mbetc^en, dongh ninh ceix daaih wuov deix hlang nyei dorngx. 33Betv hlaax ziepc hmz wuov hnoi, se ninh ganh dingc daaih nyei hnoi, ninh mingh Mbetc^en, ninh ceix daaih nyei ziec-dorngh wuov. Ninh liepc benx I^saa^laa^en Mienh nyei zipv yaac yiem wuov norm ziec-dorngh buov hung.