17

E^li^yaa Gorngv Lungh Oix Haanz

1Maaih dauh Titv^mbi Mienh, mbuox heuc ⟨E^li^yaa,⟩ yiem Gi^le^aatc Deic, Titv^mbi wuov norm dorngx daaih gorngv mbuox Aa^hapc Hungh, “Yie ziangv jienv yietc liuz ziangh nyei Ziouv, I^saa^laa^en Mienh nyei Tin-Hungh, dongh yie fu-sux wuov dauh, laengz waac. Naaiv deix i ziex hnyangx lungh maiv duih mbiungc yaac maiv maaih mbiungc-suiv, cuotv liuz yie gorngv.”
2Ziouv gorngv mbuox E^li^yaa, 3“Cuotv naaiv norm dorngx hungx jienv dong bung maengx mingh Jor^ndaen Ndaaih nyei dong bung maengx bingx jienv Ke^litv^taa Ndoqv-hlen. 4Meih ziouc duqv hopv ndoqv nyei wuom. Yie yaac paaiv norqc aa yiem naaic uix meih.”
5E^li^yaa ziouc ei jienv Ziouv nyei waac zoux. Ninh mingh yiem Jor^ndaen Ndaaih dong bung maengx, Ke^litv^taa Ndoqv-hlen. 6Lungh ndorm caux lungh maanz-hmuangx norqc aa dorh njuov caux orv daaih bun ninh nyanc. Ninh yaac hopv ndoqv nyei wuom. 7Yiem gau, ndoqv nyei wuom nqaai mi'aqv, weic zuqc yiem wuov norm deic-bung lungh maiv duih mbiungc.

E^li^yaa Tengx Saax^le^fatv Mungv Nyei Auv-Guaav

8Ziouv ziouc gorngv mbuox ninh, 9“Ih zanc mingh Sai^ndorn nyei Saax^le^fatv Mungv yiem jienv wuov. Yie paaiv ziangx yiem wuov nyei yietc dauh auv-guaav juang meih.” 10E^li^yaa ziouc mingh Saax^le^fatv. Taux mungv nyei laatc gaengh, ninh buatc dauh auv-guaav yiem wuov nzauz zaangh. Ninh ziouc heuc naaiv dauh auv-guaav, “Tov zaangh deix wuom daaih bun yie hopv oc.” 11Auv-guaav mingh zaangh wuom wuov zanc, E^li^yaa heuc jienv gorngv, “Tov meih yaac dorh diqv dien njuov daaih bun yie nyanc oc.”
12Naaiv dauh auv-guaav dau, “Yie ziangv jienv yietc liuz ziangh nyei Ziouv, meih nyei Tin-Hungh, mbuox meih, yie maiv maaih njuov. Yie kungx maaih nduqc nyau mbuonv yiem wuov ongx, yaac maaih diqv dien ga'lanv youh yiem wuov baengh hnangv. Yie nzauz zaangh dorh nzuonx mingh zoux njuov weic yie caux yie nyei dorn. Yie mbuo nyanc liuz ziouc zuov jienv daic aqv.”
13E^li^yaa gorngv mbuox ninh, “Maiv dungx gamh nziex. Gunv nzuonx mingh ei meih gorngv nyei waac zoux. Longc meih maaih nyei zoux norm njuov-dorn aengx dorh daaih bun yie ndaangc. Nqa'haav zoux weic meih caux meih nyei dorn. 14Weic zuqc Ziouv, I^saa^laa^en Mienh nyei Tin-Hungh, hnangv naaiv nor gorngv, ‘Yiem ongx nyei mbuonv maiv haih nzengc, baengh nyei youh yaac maiv dangx, taux Ziouv bun lungh duih mbiungc njiec naaiv norm deic-bung.’+”
15Ninh ziouc mingh ei jienv E^li^yaa nyei waac zoux. E^li^yaa caux wuov dauh m'sieqv dorn caux ninh nyei hmuangv doic ziouc maaih gaux nyanc ziex ziex hnoi nyei. 16Ongx nyei mbuonv maiv nzengc. Baengh nyei youh yaac maiv dangx, ziux Ziouv longc E^li^yaa gorngv nyei waac.
17Yiem gau, nqa'haav biauv-ziouv nyei dorn, se naaiv dauh auv-guaav nyei dorn, butv baengc. Baengc yaac hniev haic, gunv zoux gunv kouv, taux ninh nyei qiex dangx mi'aqv. 18Auv-guaav gorngv mbuox E^li^yaa, “Tin-Hungh nyei mienh aah! Meih buatc yie zoux haaix nyungc dorngc meih fai? Meih daaih naaiv bun yie jangx zuqc yie nyei zuiz yaac bun yie nyei dorn daic?”
19E^li^yaa dau, “Zorqv meih nyei dorn bun yie maah!” E^li^yaa ziouc zorqv wuov dauh dorn yiem auv-guaav nyei buoz hlorpv daaih dorh faaux gu'nguaaic taux ninh yiem wuov qongx, an jienv coux. 20Ninh ziouc longc qiex mbui nyei heuc Ziouv, “O Ziouv, yie nyei Tin-Hungh aac, yie yiem naaiv dauh auv-guaav nyei biauv, meih yaac bun ninh zuqc zeqc naanc, bun ninh nyei dorn daic?” 21E^li^yaa ziouc mbaapv njiec wuov dauh dorn nyei sin buo nzunc yaac heuc Ziouv, “O Ziouv, yie nyei Tin-Hungh aac, tov bun naaiv dauh dorn nyei maengc nzuonx daaih yiem ninh nyei sin.”
22Ziouv muangx E^li^yaa nyei qiex. Naaiv dauh dorn nyei maengc ziouc nzuonx daaih yiem ninh nyei sin, ninh ziouc nangh daaih aqv. 23E^li^yaa yiem gu'nguaaic wuov nzangh biauv hlorpv naaiv dauh dorn njiec daaih bieqc biauv mingh, jiu naaiv dauh dorn bun ninh nyei maa yaac gorngv, “Mangc maah! Meih nyei dorn nangh daaih aqv.” 24Wuov dauh m'sieqv dorn gorngv mbuox E^li^yaa, “Ih zanc yie hiuv duqv meih se Tin-Hungh nyei mienh. Ziouv longc meih nyei nzuih gorngv nyei waac yaac za'gengh zien nyei.”