2

Phung Kôranh Nơm Nti Tih

1Geh jêh tâm phung ƀon lan phung kôranh nơm mbơh lor tih, jêh ri mra geh lĕ phung kôranh nơm nti tih tâm phung khân may. Khân păng mra ntŭng nkoch mbơh nau nti dơi ƀư rai. Khân păng dun ma nơm tâm chuai khân păng jêh ri khân păng rgum ma khân păng nơm nau ƀư rai gơnh. 2Âk bunuyh mra tĭng trong nau tih khân păng jêh ri yor khân păng yơh bu mra ngơi mhĭk ma trong nau ngăn ngên. 3Tâm nau kơnh ir khân păng mra ngơi ndơm gay ma sa drăp khân may, ƀiălah nau phat dôih ma khân păng thăm bơh jŏ jêh, jêh ri nau rai lôch khân păng mâu blau dŭt ôh.
4Yorlah tơlah Brah Ndu mâu nhhuach ma phung tông păr ueh ƀư tih, ƀiălah klŭp lơi khân păng tâm brŏng jru ntŭk ngo ngăn, gay krŭng prăp khân păng ma nau phat dôih; 5tơlah păng mâu nhhuach ma neh ntu ơm, ƀiălah ăn dak lip tâm rmal neh ntu phung tih jêh ri tâm rklaih knŏng Y-Nôê, du huê nơm nti sŏng, ndrel ma pơh nuyh êng; 6tơlah păng tâm rmal ƀon Sôdôm jêh ri ƀon Gômôrơ ƀư rai khân păng tât jêng ŭnh buh gay ma geh nau tâm ntĭt ma phung tih kăndơ̆; 7jêh ri tơlah păng tâm rklaih Y-Lot, nơm sŏng nơm rngot ngăn ma nau gŭ ngau krao sach mhĭk phung tih ƀai nĕ. 8Yorlah bunuyh sŏng aơ gŭ ta nklang khân păng, ăp nar tăng jêh ri saơ kan tih khân păng ƀư ji huêng sŏng păng. 9Yor Kôranh Brah blau tâm rklaih phung yơk ma Brah Ndu bơh nau rlong uănh, jêh ri păng prăp phung kue ma nau tâm rmal ta nar phat dôih. 10Rplay ngăn ma phung tĭng nau nglay săk ŭch ƀơ̆ ƀơch jêh ri rmot ma phung kôranh chiă uănh.
 Phung nĕ janh jêh ri sưr, khân păng mâu klach ôh suai rak ma phung toyh.
11Ƀiălah phung tông păr ueh phung ktang brah lơn mâu geh phat dôih ma nau suai rak ma phung toyh nĕ ôh ta năp Kôranh Brah. 12Bi phung tĭng nau nglay săk ŭch jêng nâm bu mpô mpa, mâu gĭt rbăng. Bu deh ma khân păng prăp ma bu nhŭp jêh ri ăn rai. Khân păng vay mưch ma nau khân păng mâu gĭt rbăng, jêh ri khân păng mra rai yot ma nau ƀơ̆ ƀơch khân păng. 13Pôri khân păng sŏk dơn rnoh nkhôm ma nau tih khân păng. Khân păng uănh nau ƀư tih dôl nar jêng nau maak; khân păng jêng ndơ ƀơ̆ ƀơch. Khân păng rŏng ngăn ma nau khân păng ndơm dôl gŭ sông sa ndrel ma khân may. 14Măt khân păng bêng ma nau kơnh jêh ri khân păng ƀư tih mâu blau dĭl ôh. Khân păng ndơm phung mâu nâp, khân păng geh nuih n'hâm mơng kơnh. Khân păng jêng phung kon nau rtăp rak! 15Jêh khân păng chalơi trong sŏng khân păng hiơt bri tĭng trong Y-Balam kon Y-Bôsôr, nơm rŏng rnoh nkhôm ma nau tih, 16ƀiălah păng geh nau nduyh jêh ma nau tih păng, du mlâm seh bri me mlo ngơi nâm bu du huê bunuyh buay nau rluk du huê nơm mbơh lor nĕ.
17Phung nĕ jêng nâm bu ntu dak sơh nâm bu tơm sial phŭt vănh ngo rvêt, krăk kher prăp ma khân păng. 18Khân păng dŏng nau ngơi bêng ma nau sưr. Ma nau nglay săk kơnh ƀơ̆ ƀơch khân păng ndơm phung mhe luh bơh phung tĭng trong tih. 19Khân păng ton nau kon me ma bu dôl khân păng nơm jêng dĭk ma nau rai yot; yorlah ăp nơm jêng dĭk ma nơm dơi jêh đah păng. 20Pôri yơh jêh bu luh tă bơh nau ƀơ̆ ƀơch neh ntu ma nau păng gĭt năl Kôranh Brah jêh ri Brah Krist, Nơm Tâm Rklaih, tơlah păng lăp jêh ri nau ƀơ̆ ƀơch dơi đah păng, nau păng jêng tâm kăndơ̆ mra mhĭk lơn tal lor. 21Yorlah ueh lơn khân păng mâu gĭt trong nau sŏng, ma jêh khân păng gĭt jêh ri vĭ vĭr bơh nau vay kloh ueh ăn jêh ma khân păng. 22Tât jêh ma khân păng di nâm bu nau hôr nâm pô aơ, "So plơ̆ sa mpa păng hŏ hok jêh," jêh ri "Sŭr me hŏ nđŭm jêh pung tay tâm dak rhang."