10

Ndaawitv Mborqv Hingh Ammon Mienh Caux Silie Mienh

(Beiv mangc 1 Zunh Doic Douh 19:1-19)

1Jiex daaih nqa'haav, Ammon Mienh nyei hungh, daic mi'aqv. Ninh nyei dorn, Haanun, nzipc jienv zoux hungh. 2Ndaawitv gorngv, “Yie oix caux Naa^haatc nyei dorn, Haanun, zoux longx, weic zuqc ninh nyei die zoux longx bun yie.” Ndaawitv ziouc paaiv deix douc fienx mienh mingh tengx ninh jaiv nzauh weic zuqc ninh nyei die daic.
 Ndaawitv nyei douc fienx mienh mingh taux Ammon Deic wuov zanc,
3zoux hlo nyei Ammon Mienh gorngv mbuox ninh mbuo nyei ziouv, Haanun, “Meih hnamv daaih Ndaawitv paaiv mienh daaih tengx meih jaiv nzauh se weic taaih meih nyei die fai? Ninh nyei mienh maiv zeiz daaih caaiv juoqv, zaah deic-bung oix mbienv naaiv norm zingh fai?” 4Haanun ziouc zorqv Ndaawitv nyei mienh daaih, teix yietc buonc ninh mbuo nyei siaam yaac japv ninh mbuo nyei lui-houx nangv taux ndaamv-guh kuotv-norm aengx bungx ninh mbuo nzuonx.
5Maaih mienh zorqv naaiv deix mienh nyei sic mingh mbuox Ndaawitv wuov zanc, Ndaawitv paaiv mienh mingh zipv ninh mbuo weic zuqc ninh mbuo za'gengh! nyaiv haic aqv. Hungh diex gorngv, “Gunv yiem Ye^li^ko zuov siaam aengx ndaauv cingx nzuonx.”
6Ammon Mienh hiuv duqv Ndaawitv qiex jiez ninh mbuo, ninh mbuo ziouc cingv yiem Mbetc Le^hopc caux So^mbaa nyei Silie baeng, se i waanc dauh yangh ndau baeng, yaac cingv Maa^aa^kaa Hungh caux yietc cin dauh baeng, aengx caux yiem Topv Deic-Bung daaih nyei yietc waanc i cin dauh.
7Ndaawitv muangx haiz naaiv deix sic, ninh paaiv Yo^aapc caux ninh nyei yietc zungv mborqv jaax henv nyei baeng cuotv mingh. 8Ammon Mienh cuotv daaih yiem ninh mbuo nyei zingh gaengh ndaangc ziux mborqv jaax nyei yietc nyeic mbaih jienv. Yiem So^mbaa caux Le^hopc nyei Silie Mienh caux Topv Mienh, Maa^aa^kaa Mienh aengx ganh yiem norm dorngx njang nyei, se yiem norm dorngx nyei ndau-huaang.
9Yo^aapc buatc mborqv jaax nyei mienh mbaih jienv yiem ninh nyei wuov ndaangc maengx caux ninh nyei nqa'haav nqaang, ninh ziouc ginv ziangx yiem I^saa^laa^en gauh henv jiex nyei baeng bun ninh mbuo doix Silie Mienh mbaih jienv mborqv Silie nyei baeng. 10Zengc njiec nyei baeng ninh jiu bun ninh nyei youz, Aa^mbi^qai, gunv yaac paaiv ninh mbuo mingh mborqv Ammon Mienh. 11Yo^aapc gorngv, “Se gorngv Silie Mienh nyei qaqv gauh henv jiex yie, meih oix zuqc daaih tengx yie. Mv baac se gorngv Ammon Mienh nyei qaqv gauh henv jiex meih, yie ziouc mingh tengx meih. 12Oix zuqc henv yaac oix zuqc weic mbuo nyei mienh caux mbuo nyei Tin-Hungh nyei zingh zoux jun-zeiv mienh. Tov Ziouv zoux ziux ninh buatc horpc zuqc zoux nyei.”
13Yo^aapc caux gan ninh wuov deix baeng cuotv mingh mborqv Silie Mienh. Silie Mienh ziouc yiem Yo^aapc nyei wuov ndaangc maengx tiux biaux. 14Ammon Mienh buatc Silie Mienh tiux biaux, ninh mbuo yaac yiem Yo^aapc nyei youz, Aa^mbi^qai nyei wuov ndaangc maengx biaux bieqc zingh gu'nyuoz. Yo^aapc ziouc guangc maiv mborqv Ammon Mienh. Ninh nzuonx Ye^lu^saa^lem mi'aqv.
15Silie Mienh buatc ninh mbuo ganh suei I^saa^laa^en Mienh, ninh mbuo ziouc aengx gapv zunv daaih. 16Haa^ndatc^e^se Hungh paaiv douc fienx mienh mingh lorz Yu^fe^ditc Ndaaih dong bung maengx nyei Silie Mienh daaih. Ninh mbuo ziouc daaih taux Helaam yaac maaih Haa^ndatc^e^se nyei jun-baeng nyei domh baeng-bieiv, So^mbakc, dorh ninh mbuo.
17Maaih mienh gorngv mbuox Ndaawitv, Ndaawitv ziouc heuc I^saa^laa^en nyei zuangx mienh gapv zunv jiex wuov ngaanc ziqc Jor^ndaen Ndaaih mingh caux Silie Mienh doix hmien ziux mborqv jaax nyei yietc nyeic mbaih jienv. Ndaawitv mbaih ziangx baeng ziouc mingh mborqv Silie Mienh. Silie Mienh aengx caux ninh mbuo mborqv. 18Mv baac Silie Mienh yiem I^saa^laa^en Mienh nyei wuov ndaangc maengx tiux biaux. Ndaawitv yaac daix Silie Mienh zaangv mborqv jaax nyei maaz-cie nyei baeng cietv baeqv dauh, caux geh maaz baeng biei waanc dauh, aengx bun Silie Mienh nyei jun-baeng-bieiv, So^mbakc, zuqc mun. Ninh ziouc yiem naaic mborqv jaax ciangv daic mi'aqv. 19Yiem Haa^ndatc^e^se nyei buoz-ndiev wuov deix yietc zungv hungh buatc ninh mbuo zuqc I^saa^laa^en Mienh mborqv baaic, ninh mbuo ziouc caux I^saa^laa^en Mienh gorngv horpc, aengx yiem ninh mbuo nyei buoz-ndiev.
 Weic naaiv, nqa'haav Silie Mienh maiv gaamv tengx Ammon Mienh aqv.