16

Ndaawitv Caux Si^mbaa

1Ndaawitv jiex ziqc mbong-ningv maiv go, Me^fi^mbo^setv nyei bou, Si^mbaa, ken jienv i dauh buic jienv orn nyei lorh daaih buangh ninh. Lorh tor jienv nyic baeqv norm njuov, yietc baeqv ndunh a'ngunc biouv-nqaai, yietc baeqv norm nqaai gorng nyei biouv, caux yietc ndopv-mbuoqc a'ngunc diuv daaih.
2Hungh diex naaic Si^mbaa, “Meih dorh naaiv deix ga'naaiv daaih zoux haaix nyungc?”
 Si^mbaa dau, “Lorh se weic bun hungh diex nyei biauv zong mienh geh. Njuov caux nqaai gorng biouv se weic gan nyei mienh nyanc, a'ngunc diuv se weic bun yiem deic-bung-huaang mau kouv nyei mienh hopv.”
3Hungh diex aengx naaic, “Meih nyei ziouv nyei fun yiem haaix?”
 Si^mbaa dau, “Ninh yiem jienv Ye^lu^saa^lem weic zuqc ninh gorngv, ‘Ih hnoi I^saa^laa^en Mienh zungv oix zorqv yie nyei ong nyei guoqv tuix nzuonx guei yie.’ ”
4Hungh diex gorngv mbuox Si^mbaa, “Ih zanc Me^fi^mbo^setv maaih nyei yietc zungv benx meih nyei mi'aqv.”
 Si^mbaa gorngv, “Yie zorqv yieqv baaix hungh diex. Yie nyei ziouv, hungh diex aah! Tov bun yie yiem hungh nyei nza'hmien bun hungh diex a'hneiv.”

Ndaawitv Zuqc Si^me^i Zioux

5Ndaawitv Hungh taux Mbaa^hu^lim wuov zanc, maaih dauh Saulo nyei cien-ceqv, se Gelaa nyei dorn, Si^me^i, cuotv daaih yietc binc yangh, yietc binc zioux jienv mingh. 6Ninh zorqv la'bieiv zoi Ndaawitv caux hungh diex nyei zuangx jien, maiv gunv baeqc fingx caux mborqv jaax henv nyei baeng yiem ninh nyei mbiaauc maengx zaaix maengx. 7Si^me^i zioux waac gorngv, “Meih naaiv dauh ga'naaiv-waaic daix mienh nyei mienh aah! Mingh nqoi aqv. Mingh nqoi aqv. 8Ih zanc Ziouv jaauv win bun meih weic meih yiem Saulo nyei biauv zong mienh liouc cuotv nyei yietc zungv nziaamv, div ninh zoux hungh. Ziouv yaac zorqv meih nyei guoqv jiu bun meih nyei dorn, Apc^saa^lom, mi'aqv. Mangc maah! Meih zuqc baaic mi'aqv, weic zuqc meih se daix mienh bun nziaamv liouc cuotv nyei mienh.”
9Se^lu^yaa nyei dorn, Aa^mbi^qai, gorngv mbuox hungh diex, “Fungc bun naaiv dauh juv-daic zioux yie nyei ziouv, hungh diex? Tov bun yie jiex mingh hngaqv ninh nyei m'nqorngv ndutv.”
10Mv baac hungh diex gorngv, “Se^lu^yaa nyei i dauh dorn aah! Yie caux meih mbuo maaih haaix nyungc guen zuqc? Se gorngv ninh zioux weic zuqc Ziouv mbuox ninh ‘Oix zuqc zioux Ndaawitv maah!’ wuov nyungc haaix dauh haih gorngv, ‘Meih weic haaix diuc hnangv naaiv zoux?’+”
11Ndaawitv aengx gorngv mbuox Aa^mbi^qai caux ninh nyei zuangx jien, “Mangc maah! Yie nyei cien dorn oix zorqv yie nyei maengc. Hnangv naaic, naaiv dauh Mben^yaa^min Mienh sueih ninh zioux weic zuqc Ziouv heuc ninh zoux. 12Nziex Ziouv haih buatc yie nyei kouv naanc,Ziouv yaac weic yie ih hnoi zuqc naaiv deix zioux nyei waac haih winh bun yie duqv longx.”
13Ndaawitv caux ninh nyei mienh ziouc gan jienv jauv mingh. Si^me^i yiem Ndaawitv nyei doix-ngaanc gan zorng yietc binc mingh yietc binc zioux. Ninh zorqv la'bieiv zoi ninh mbuo yaac nyau nie-mbung faatv ninh mbuo. 14Hungh diex caux gan ninh wuov deix zuangx mienh ziouc taux Jor^ndaen Ndaaih kouv nzengc. Ninh mbuo ziouc yiem naaic hitv kuonx.

Apc^saa^lom Yiem Ye^lu^saa^lem

15Apc^saa^lom caux I^saa^laa^en nyei zuangx mienh ziouc daaih taux Ye^lu^saa^lem. Aa^hi^to^fen yaac caux jienv daaih. 16Ndaawitv nyei loz-gaeng doic, Aanki Mienh, Husai, mingh lorz Apc^saa^lom. Husai gorngv, “Tov bun hungh diex ziangh duqv maanc fuix. Tov bun hungh diex ziangh duqv maanc fuix.”
17Apc^saa^lom naaic Husai, “Meih hnangv naaiv nor ziepc zuoqv nyei zoux bun meih nyei loz-gaeng doic? Meih weic haaix diuc maiv gan ninh mingh?”
18Husai gorngv mbuox Apc^saa^lom, “Maiv zeiz. Ziouv caux naaiv deix baeqc fingx caux I^saa^laa^en nyei zuangx mienh ginv haaix dauh, yie ziouc gan wuov dauh yaac caux ninh yiem. 19Aengx maaih diuc. Yie horpc zuqc fu-sux haaix dauh? Yie maiv zeiz oix fu-sux wuov dauh nyei dorn fai? Yie hnangv haaix nor fu-sux meih nyei die, yie oix hnangv wuov nor fu-sux meih.”
20Apc^saa^lom gorngv mbuox Aa^hi^to^fen “Tengx hnamv mangc gaax, yie mbuo oix zuqc hnangv haaix nor zoux?”
21Aa^hi^to^fen gorngv mbuox Apc^saa^lom, “Oix zuqc mingh bueix dongh meih nyei die liouh jienv zuov hungh dinc wuov deix jaav-zeih auv. I^saa^laa^en nyei yietc zungv mienh ziouc hiuv duqv meih bun meih nyei die nzorng meih. Da'faanh gan meih nyei mienh ziouc henv jienv faaux.” 22Ninh mbuo ziouc corng ndopv-liuh yiem hungh dinc nyei biauv-ngorh gu'nguaaic. Apc^saa^lom ziouc dorng jienv I^saa^laa^en nyei zuangx mienh bieqc mingh bueix ninh nyei die nyei jaav-zeih auv.
23Yiem wuov deix hnoi-nyieqc, Aa^hi^to^fen caangh laangh daav nyei za'eix se hnangv mienh duqv Tin-Hungh nyei waac. Liemh Ndaawitv caux Apc^saa^lom taaih ninh caangh laangh nyei za'eix.