19

Yo^aapc Gorngv Ndaawitv

1Maaih mienh mbuox Yo^aapc, “Hungh diex nyiemv yaac nzauh Apc^saa^lom.” 2Wuov hnoi zuangx baeqc fingx duqv hingh nyei njien-youh tiuv benx nzauh nyiemv nyei jauv weic zuqc wuov hnoi baeqc fingx haiz gorngv, “Hungh diex hnyouv mun, nzauh haic ninh nyei dorn.” 3Wuov hnoi zuangx mienh sekv-sekv nyei nzuonx daaih bieqc zingh hnangv mborqv jaax bingx jienv biaux, nyaiv haic nyei mienh nor. 4Hungh diex buang jienv hmien nyiemv mbui nyei gorngv, “O yie nyei dorn, Apc^saa^lom aah! Apc^saa^lom, yie nyei dorn, yie nyei dorn aah!”
5Yo^aapc bieqc hungh dinc gorngv mbuox hungh diex, “Meih ih hnoi zoux bun meih nyei yietc zungv jien zuqc nyaiv. Ninh mbuo ih hnoi njoux meih nyei maengc, caux meih nyei dorn sieqv, meih nyei auv caux meih nyei jaav-zeih auv mbuo nyei maengc, 6weic zuqc meih hnamv nzorng meih wuov deix mienh. Hnamv meih wuov deix, meih yaac nzorng. Meih ih hnoi zoux duqv mengh nyei. Meih maiv funx meih nyei baeng-bieiv caux meih nyei jien longc jienv. Ih hnoi yie buatc duqv mengh nyei. Se gorngv Apc^saa^lom ih hnoi corc ziangh jienv, yie mbuo yietc zungv zuqc daic, meih a'hneiv nyei. 7Ih zanc tov meih cuotv mingh caux meih nyei jien gorngv waac longx. Yie ziangv jienv Ziouv gorngv, se gorngv meih maiv hnangv naaic zoux, ih muonz maiv maaih yietc dauh mienh caux meih yiem naaiv. Naaiv deix sic ziouc weic meih gauh kouv meih zoux mienh lunx mienh taux ih zanc buangh nyei zeqc naanc.”
8Hungh diex ziouc jiez sin daaih cuotv mingh zueiz jienv zingh gaengh. Wuov deix mienh haiz gorngv, “Hungh diex zueiz jienv zingh gaengh.” Zuangx mienh ziouc daaih yiem ninh nyei nza'hmien.

Ndaawitv Nzuonx Ye^lu^saa^lem

 I^saa^laa^en Mienh, gorqv-mienh biaux jienv nzuonx gorqv-mienh nyei biauv. 9Gormx I^saa^laa^en Deic-Bung nyei fingx-fingx mienh, zuangx baeqc fingx laanh caux laanh nzaeng gorngv, “Hungh diex njoux yie mbuo biaux ndutv yie mbuo nyei win-wangv nyei buoz-ndiev, yaac njoux yie mbuo biaux ndutv Fi^li^saa^die Mienh nyei buoz-ndiev. Mv baac ih zanc ninh biaux Apc^saa^lom cuotv deic-bung aqv. 10Yie mbuo longc youh orn Apc^saa^lom zoux hungh gunv yie mbuo mv baac ninh yiem mborqv jaax nyei ziangh hoc daic mi'aqv. Wuov nyungc meih mbuo weic haaix diuc maiv gorngv yietc joux taux oix dorh hungh diex nzuonx?”
11Ndaawitv Hungh paaiv mienh mingh mbuox Saax^ndokc sai mienh caux Aa^mbi^yaa^taa sai mienh gorngv, “Oix zuqc mingh mbuox Yu^ndaa nyei mienh gox, ‘Meih mbuo weic haaix diuc taux nqa'haav laai cingx tov hungh diex nzuonx ninh ganh nyei hungh dinc? I^saa^laa^en nyei zuangx mienh zungv maaih waac tov hungh diex nzuonx. 12Meih mbuo zoux yie nyei gorx-youz, juangc nziaamv-fei nyei mienh. Wuov nyungc meih mbuo weic haaix diuc zoux nqa'haav laai nyei mienh dorh hungh diex nzuonx?’ 13Aengx gorngv mbuox Aa^maa^saax, ‘Meih caux yie juangc nziaamv-fei maiv zeiz? Se gorngv yiem naaiv mingh meih maiv duqv div Yo^aapc zoux yie nyei jun-baeng nyei baeng-bieiv, tov Tin-Hungh hniev-hniev nyei dingc yie nyei zuiz.’+”
14Ndaawitv nyei waac baeng duqv Yu^ndaa nyei zuangx mienh dongh diuc hnyouv. Ninh mbuo ziouc paaiv mienh mingh mbuox hungh diex, “Tov hungh diex caux hungh diex nyei yietc zungv jien nzuonx daaih.” 15Hungh Diex ziouc nzuonx taux Jor^ndaen Ndaaih.

Si^me^i Mingh Zipv Ndaawitv

 Yu^ndaa Mienh mingh taux Gin^gaan, zipv hungh diex jiex Jor^ndaen Ndaaih. 16Yiem Mbaa^hu^lim nyei Mben^yaa^min Mienh, Gelaa nyei dorn, Si^me^i, caux jienv Yu^ndaa Mienh siepv-siepv nyei njiec daaih zipv Ndaawitv Hungh. 17Aengx maaih yietc cin dauh Mben^yaa^min Mienh caux jienv ninh daaih. Aengx maaih Saulo nyei biauv nyei bou, Si^mbaa, caux ninh nyei ziepc hmz dauh dorn, nyic ziepc dauh bou. Ninh mbuo ziouc siepv-siepv nyei mingh taux Jor^ndaen Ndaaih doix hungh diex yiem nyei dorngx. 18Ninh mbuo ziouc yiem jauv-bouc jiex mingh zipv hungh diex yaac ei jienv hungh diex nyei hnyouv zoux.
 Hungh diex jang-jang oix jiex ndaaih nyei ziangh hoc, Gelaa nyei dorn, Si^me^i, puoqv njiec hungh diex nyei nza'hmien
19gorngv, “Yie nyei ziouv aac, tov maiv dungx longc yie nyei zuiz. Yie nyei ziouv, hungh diex, cuotv Ye^lu^saa^lem wuov hnoi yie zoux nyei zuiz, tov maiv dungx jangx. Tov hungh diex maiv dungx hietv hnyouv. 20Weic zuqc yie, meih nyei bou, hiuv duqv yie zoux dorngc zuiz. Weic naaiv yiem Yosepv nyei zeiv-fun yie ih hnoi zoux da'yietv dauh daaih zipv yie nyei ziouv, hungh diex.”
21Wuov zanc Se^lu^yaa nyei dorn, Aa^mbi^qai, gorngv, “Si^me^i zioux Ziouv longc youh orn daaih nyei mienh. Maiv horpc zuqc daix daic fai?”
22Ndaawitv dau, “Se^lu^yaa nyei i dauh dorn aah! Yie caux meih mbuo maaih haaix nyungc guen zuqc fai? Ih hnoi meih mbuo duqv zoux yie nyei win-wangv. Ih hnoi yiem I^saa^laa^en horpc zuqc maaih haaix dauh zuqc daix daic fai? Yie ih hnoi maiv hiuv duqv yie zoux I^saa^laa^en nyei hungh fai?” 23Hungh diex gorngv mbuox Si^me^i, “Meih maiv zuqc daic.” Hungh diex ziouc caux ninh houv waac laengz.

Me^fi^mbo^setv Daaih Zipv Ndaawitv

24Saulo nyei fun, Me^fi^mbo^setv, yaac daaih zipv hungh diex. Yiem hungh diex cuotv Ye^lu^saa^lem taux baengh orn nyei nzuonx daaih wuov hnoi, Me^fi^mbo^setv maiv nzaaux zaux, maiv teix siaam, maiv nzox lui-houx. 25Me^fi^mbo^setv daaih taux Ye^lu^saa^lem zipv hungh diex wuov zanc, hungh diex naaic ninh, “Me^fi^mbo^setv aac, meih weic haaix diuc maiv caux yie mingh?”
26Me^fi^mbo^setv gorngv, “O yie nyei ziouv, hungh diex aac, yie nyei bou nduov yie. Yie, meih nyei bou, mbuox ninh, ‘Buic lorh bun yie geh, weic bun yie geh jienv caux hungh diex mingh,’ weic zuqc yie, meih nyei bou, zaux mbai nyei. 27Yie nyei bou gorngv jaav mbuox hungh diex. Mv baac yie nyei ziouv, hungh diex, se hnangv Tin-Hungh nyei fin-mienh. Hungh diex buatc haaix nyungc horpc hnyouv, hungh diex gunv hnangv naaic zoux bun yie. 28Yie nyei ong nyei zeiv-fun zic duqv yie nyei ziouv, hungh diex, daix hnangv. Mv baac meih bun yie, meih nyei bou, juangc meih nyei dieh nyanc hnaangx. Yie maiv maaih haaix nyungc leiz aengx tengx hungh diex tov haaix nyungc.”
29Hungh diex gorngv, “Meih gorngv mbuoqc naaiv gaux aqv. Yie dingc bun meih caux Si^mbaa bun nqoi Saulo nyei ndau aqv.”
30Me^fi^mbo^setv gorngv mbuox hungh diex, “Sueih Si^mbaa longc nzengc aqv. Yie duqv yie nyei ziouv, hungh diex, baengh orn nyei nzuonx taux hungh dinc weic yie se gaux aqv.”

Mbaa^sin^lai Fungx Hungh Jiex Ndaaih

31Gi^le^aatc Mienh, Mbaa^sin^lai, yiem Lo^ge^lim njiec daaih caux hungh diex mingh taux Jor^ndaen, oix fungx hungh diex njiec ndaaih. 32Mbaa^sin^lai gox haic, hnyangx-jeiv duqv betv ziepc hnyangx. Hungh diex yiem Maa^haa^naa^im wuov zanc, Mbaa^sin^lai dorh nyanc hopv daaih bun hungh diex weic zuqc Mbaa^sin^lai butv zoih haic. 33Hungh diex gorngv mbuox Mbaa^sin^lai, “Caux yie jiex mingh aengx caux yie yiem Ye^lu^saa^lem yie ziouc ziux goux meih.”
34Mv baac Mbaa^sin^lai mbuox hungh diex, “Yie corc haih ziangh duqv mbu'ziex hnyangx weic bun yie haih duqv caux hungh diex yiem Ye^lu^saa^lem fai? 35Yie ih zanc duqv betv ziepc hnyangx aqv. Yie haih bun duqv nqoi haaix nyungc se yaauc fai maiv yaauc? Yie haih seix cuotv haaix nyungc nyanc hopv kuv fai maiv kuv? Yie corc haih muangx duqv haiz m'jangc m'sieqv baaux nzung nyei fai? Hnangv naaic yie, meih nyei bou, weic haaix diuc oix zuqc bun yie nyei ziouv, hungh diex, jaa la'nyauv? 36Yie, meih nyei bou, kungx fungx hungh diex jiex Jor^ndaen Ndaaih mingh douc jauv maiv go. Hungh diex weic haaix diuc oix bun zingh nyeic yie ndongc naaiv hlo? 37Tov bun yie, meih nyei bou, nzuonx yiem ganh nyei zingh guei seix, zangx jienv yie nyei diex maac nyei zouv ga'hlen. Mv baac naaiv maaih hungh nyei bou, Kim^haam. Gunv bun ninh caux yie nyei ziouv, hungh diex, jiex mingh. Ziux hungh diex buatc haaix nyungc horpc, gunv hnangv wuov nor tengx ninh.”
38Hungh diex gorngv, “Gunv bun Kim^haam caux yie jiex. Ziux meih buatc horpc, yie ziouc hnangv wuov nor tengx ninh. Meih oix yie hnangv haaix nor zoux weic meih, yie ziouc hnangv wuov nor zoux.”
39Zuangx mienh ziouc jiex Jor^ndaen Ndaaih. Hungh diex yaac caux jienv jiex. Hungh diex zom Mbaa^sin^lai yaac buang waac bun ninh. Nqa'haav Mbaa^sin^lai nzuonx ninh ganh nyei biauv mi'aqv.
40Hungh diex aengx jiex mingh taux Gin^gaan. Kim^haam yaac gan ninh jiex. Yu^ndaa nyei zuangx mienh caux yietc buonc I^saa^laa^en Mienh fungx hungh diex jiex.

Yu^ndaa Caux I^saa^laa^en Nzaeng

41Nqa'haav I^saa^laa^en nyei zuangx mienh daaih buangh hungh diex, gorngv mbuox ninh, “Yie mbuo nyei gorx-youz, Yu^ndaa Mienh, weic haaix diuc bingx jienv dorh hungh diex caux hungh diex nyei biauv zong mienh caux gan hungh diex nyei yietc zungv mienh jiex Jor^ndaen Ndaaih?”
42Yu^ndaa nyei zuangx mienh dau I^saa^laa^en Mienh, “Weic zuqc hungh diex se caux yie mbuo cien. Meih mbuo weic haaix diuc laaix naaiv deix sic qiex jiez? Yie mbuo duqv bangc hungh diex nyanc fai? Hungh diex bun haaix nyungc zingh nyeic yie mbuo nyei fai?”
43I^saa^laa^en Mienh dau Yu^ndaa Mienh, “Yie mbuo caux hungh diex maaih ziepc gouv nyei buonc. Yie mbuo maaih leiz duqv Ndaawitv gauh camv meih mbuo. Wuov nyungc meih mbuo weic haaix diuc mangc piex yie mbuo? Yie mbuo gorngv ndaangc oix dorh yie mbuo nyei hungh diex nzuonx maiv zeiz?”
 Mv baac Yu^ndaa Mienh nyei waac gauh ngaengc I^saa^laa^en Mienh nyei.