15

Aasaax Goiv Yienc Buoqc Zaangc Nyei Jauv

(Beiv mangc 1 Hungh Douh 15:13-15)

1Tin-Hungh nyei Singx Lingh njiec daaih yiem O^ndetc nyei dorn, Aa^saa^li^yaa. 2Ninh ziouc cuotv mingh buangh Aasaax, gorngv mbuox ninh, “Aasaax Hungh caux Yu^ndaa caux Mben^yaa^min nyei yietc zungv mienh aah! Tov muangx yie gorngv maah! Da'faanh meih mbuo gan Ziouv, ninh ziouc caux meih mbuo yiem. Se gorngv meih mbuo lorz ninh, ninh ziouc bun meih mbuo lorz duqv buatc. Mv baac se gorngv meih mbuo guangc ninh, ninh ziouc guangc meih mbuo. 3Zinh ndaangc I^saa^laa^en Mienh maiv maaih zien Tin-Hungh, maiv maaih sai mienh njaaux, yaac maiv maaih leiz-latc lauh haic aqv. 4Mv baac ninh mbuo buangh zuqc kouv nyei ziangh hoc ninh mbuo huin nzuonx daaih lorz Ziouv, I^saa^laa^en Mienh nyei Tin-Hungh. Ninh ziouc bun ninh mbuo lorz duqv buatc aqv. 5Wuov deix ziangh hoc, mienh bieqc bieqc cuotv-cuotv maiv maaih baengh orn weic zuqc maaih faanv lunc nyei jauv camv nyei hoic wuov deix norm-norm guoqv nyei yietc zungv mienh kouv. 6Ninh mbuo zuqc bun nqoi nzengc. Naaiv norm guoqv caux wuov norm guoqv, naaiv norm zingh caux wuov norm zingh bun nqoi, weic zuqc Tin-Hungh bun nyungc-nyungc zeqc naanc hoic ninh mbuo lunc. 7Mv baac meih mbuo oix zuqc henv, maiv dungx suei weic zuqc meih mbuo nyei gong oix duqv zipv zingh nyeic.”
8Aasaax yietv haiz O^ndetc nyei dorn, Aa^saa^li^yaa, douc daaih naaiv deix waac, ninh nyei hnyouv ziouc henv jiez daaih. Ninh ziouc yiem Yu^ndaa Deic caux Mben^yaa^min Deic, liemh yiem E^faa^im Mbong-aiv dorngx caangv daaih nyei norm-norm zingh caeqv nqoi ninh mbuo nyei gamh nziev haic nyei miuc-fangx. Ninh yaac zorc yiem zaangc Ziouv nyei biauv capv cuotv nyei dorngx nza'hmien maengx, Ziouv nyei ziec-dorngh.
9Ninh yaac heuc Yu^ndaa Mienh caux Mben^yaa^min Mienh, yaac heuc dongh caux ninh yiem wuov deix E^faa^im, Maa^natv^se caux Si^me^on daaih nyei baeqc fingx, gapv zunv daaih. Maaih naaiv deix mienh camv nyei yiem I^saa^laa^en cuotv daaih lorz ninh weic zuqc ninh mbuo buatc Ziouv, ninh nyei Tin-Hungh, caux ninh yiem.
10Aasaax zoux hungh duqv ziepc hmz hnyangx wuov hnyangx faah hlaax, ninh mbuo gapv zunv yiem Ye^lu^saa^lem. 11Dongh wuov hnoi ninh mbuo zorqv mborqv jaax caangv daaih nyei ga'naaiv, ngongh cietv baeqv dauh, ba'gi yungh siec cin dauh, fongc horc buov ziec bun Ziouv. 12Ninh mbuo ziouc liepc jiez ngaengc waac gorngv ninh mbuo buangv hnyouv buangv eix oix lorz Ziouv, ninh mbuo nyei ong-taaix nyei Tin-Hungh. 13Da'faanh haaix dauh maiv kangv lorz Ziouv, I^saa^laa^en Mienh nyei Tin-Hungh, wuov dauh zungv oix zuqc daix guangc aqv, maiv gunv hlo faix, m'jangc m'sieqv. 14Ninh mbuo ziouc qiex hlo nyei heuc yaac biomv nzatc biomv jorng houv jienv laengz waac bun Ziouv. 15Yu^ndaa nyei zuangx mienh weic ninh mbuo houv jienv waac a'hneiv, weic zuqc ninh mbuo buangv hnyouv zoux. Ninh mbuo yaac buangv eix lorz Ziouv. Ninh ziouc bun ninh mbuo lorz duqv buatc. Ziouv yaac bun ninh mbuo bung-bung baengh orn.
16Aasaax Hungh yaac bun ninh nyei gux, Maa^aa^kaa, tuix weic, maiv duqv zoux hungh gux, weic zuqc ninh zoux gamh nziev haic nyei ⟨Aa^se^laa⟩ zienh nyeiz nyei fangx. Aasaax goix wuov norm fangx, mborqv muonc nzengc, aengx yiem Kitc^lon Horngz buov guangc. 17Maiv gunv ninh maiv caeqv guangc I^saa^laa^en Deic-Bung yiem hlang zaangc zienh nyei dorngx, yiem Aasaax nyei seix zeiv ninh nyei hnyouv ziepc zuoqv nyei gan Ziouv. 18Ninh zorqv dongh ninh nyei die caux ninh ganh fongc horc bun nyei jiem nyaanh caux jaa-dorngx fungx bieqc zaangc Tin-Hungh nyei biauv.
19Yiem naaiv mingh taux Aasaax zoux hungh faah ziepc hmz hnyangx wuov hnyangx, maiv maaih mborqv jaax nyei sic.