17

Y-Jôsaphat Ƀư Nâp Ƀon Bri Hađăch Păng

1Y-Jôsaphat kon buklâu păng chiă uănh thoi ntrok păng, jêh ri păng ăn bri dak păng jêng katang dơi tâm rdâng đah phung Israel. 2Păng dơm phung tahan tâm lĕ rngôch ƀon geh pôih tahan tâm n'gor Yuda, jêh ri ƀư pôih tahan tâm n'gor Yuda jêh ri tâm ăp ƀon Êphraim, ƀon mbơ̆ păng Y-Asa pit in jêh. 3Yêhôva gŭ ndrel ma Y-Jôsaphat, yorlah păng chuat hăn tĭng trong chô yau păng Y-David, hăn jêh tâm rnôk ntơm sa-ơm. Păng mâu joi brah Baal ôh, 4ƀiălah joi Brah Ndu phung che păng, tĭng kơt lĕ nau vay Păng ntăm, jêh ri mâu ƀư ôh kơt phung Israel. 5Yor ri Brah Ndu ƀư nâp ƀon bri hađăch tâm ti păng; jêh ri lĕ rngôch phung Yuda chê̆ pi ma Y-Jôsaphat. Păng geh nau ndrŏng toyh jêh ri nau yơk ma păng.
6Nuih n'hâm păng geh nau nâp răp jăp tĭng trong Yêhôva; jêh ri rlau ma nây păng ƀư rai lơi ntŭk prêh kalơ jêh ri rup brah Asêrim bơh bri Yuda.
7Tâm năm rơh pe rnôk păng chiă uănh, păng prơh hăn phung kôranh, oh mon păng, amoh Y-Ben-Hêl, Y-Ôbadia, Y-Sakari, Y-Nêthanel, jêh ri Y-Mikaya ăn nti tâm ƀon toyh n'gor Yuda; 8ndrel ma khân păng geh phung Lêvi, amoh Y-Sêmay a, Y-Nêthania, Y-Sêbadia, Y-Asabel, Y-Sêmiramôt, Y-Jônathan, Y-Adônija Y-Tôbija, jêh ri Y-Tôbadônija; geh đŏng Y-Êlisama jêh ri Y-Jôram, bar hê kôranh ƀư brah hăn ndrel lĕ. 9Khân păng djôt leo ndrom sămƀŭt Yêhôva, hăn nsong lam ƀon tâm n'gor Yuda nti lah ma phung ƀon lan.
10Nau klach ma Yêhôva tât ma lĕ rngôch puăn njônh bri dak văr jŭm n'gor Yuda, jêh ri khân păng mâu tâm lơh ôh đah Y-Jôsaphat. 11Ƀa ƀă phung Philistin djôt leo ndơ nhhơr ma Y-Jôsaphat jêh ri chê̆ pi ma prăk. Tâm ban lĕ phung Arabi leo ma păng pơh rbăn pơh rhiăng mlâm biăp nkuăng, jêh ri pơh rbăn pơh rhiăng mlâm be nkuăng. 12Y-Jôsaphat lơ nar lơ hao jêng toyh mro. Păng ndâk tâm n'gor Yuda pôih tahan jêh ri ƀon jay ăn drãp. 13Păng bun prăp âk ndô ndơ tâm ƀon n'gor Yuda. Păng geh phung tahan janh katang tâm ƀon Yêrusalem. 14Aơ jênh rnoh kơp ma khân păng tĭng nâm noi deh khân păng; bơh n'gor Yuda, phung kôranh tahan kôranh ma du rbăn nuyh: Y-Atna jêng kôranh, tâm pe rsen nuyh tahan janh katang, 15jêh ri nơm mrô bar Y-Jônathan jêng kôranh tahan, păng uănh bar rsen pham rmưn ƀiălah janh katang; 16nơm mrô pe jêng Y-Amasia kon buklâu Y-Sikri, du huê nơm pah kan ma Yêhôva ma nau duh nđơr, păng uănh bar rsen bunuyh janh katang. 17Bơh phung Benjamin: Y-Êliada jêng bunuyh janh katang, păng uănh bar rsen tahan djôt na jêh ri khêl, 18jêh ri nơm rơh bar Y-Jôsaphat geh du rsen pham rmưn tahan djôt ndơ tâm lơh. 19Phung aơ pah kan ma hađăch, jêng phung lĕ rmeh hađăch hŏ dơm jêh tâm ăp ƀon geh pôih tahan lam n'gor Yuda.