8

Saa^lo^morn Zoux Nyei Nyungc-Nyungc Gong

(Beiv mangc 1 Hungh Douh 9:10-28)

1Saa^lo^morn longc nyic ziepc hnyangx ceix zaangc Ziouv nyei biauv caux ninh ganh nyei hungh dinc. 2Nqa'haav Saa^lo^morn siang-ceix jiez dongh Hilaam jiu bun ninh wuov deix zingh yaac bun I^saa^laa^en Mienh yiem. 3Saa^lo^morn mingh Haamatv So^mbaa yaac caangv duqv mi'aqv. 4Ninh ceix yiem deic-bung-huaang nyei Tatv^mo Zingh caux yiem Haamatv ceix daaih weic siou ga'naaiv nyei norm-norm zingh. 5Ninh aengx ceix Wuov Jiex nyei Mbetc Holon Zingh caux Wuov Ndiev nyei Mbetc Holon Zingh benx weih wuonv nyei zingh, maaih zingh laatc, maaih laatc gaengh caux gaengh sorn. 6Ninh yaac ceix Mbaa^aa^latv Zingh caux Saa^lo^morn siou ga'naaiv nyei yietc zungv zingh, aengx caux siou mborqv jaax nyei maaz-cie caux zaangv maaz-cie nyei baeng nyei yietc zungv zingh, caux ninh maaih hnyouv yiem Ye^lu^saa^lem caux Le^mbaa^norn caux ninh gunv gormx nyei guoqv nyei norm-norm dorngx ceix nyei nyungc-nyungc.
7Zengc njiec nyei Hitv^tai Mienh, Aa^mo^lai Mienh, Be^litv^si Mienh, Hiwai Mienh caux Ye^mbutc Mienh, dongh maiv zeiz I^saa^laa^en Mienh, 8se dongh I^saa^laa^en Mienh maiv haih mietc maiv nzengc, corc yiem deic-bung wuov deix mienh nyei zeiv-fun, Saa^lo^morn aapv zoux gong-bou-hniev nyei nouh taux ih jaax hnoi. 9Mv baac Saa^lo^morn maiv bun I^saa^laa^en Mienh zuqc zoux nouh. Ninh mbuo zoux ninh nyei baeng, zoux jun-baeng-bieiv, caux gunv maaz-cie nyei domh baeng-bieiv, caux zaangv maaz-cie nyei baeng. 10Aengx maaih nyic baeqv hmz ziepc dauh zoux Saa^lo^morn Hungh nyei domh jien gunv gong-mienh.
11Saa^lo^morn dorh Faalo nyei sieqv yiem Ndaawitv nyei Zingh faaux daaih yiem Saa^lo^morn weic ninh ceix wuov norm hungh dinc. Saa^lo^morn gorngv, “Yie nyei auv maiv horpc zuqc yiem I^saa^laa^en Guoqv nyei hungh, Ndaawitv, nyei hungh dinc, weic zuqc Ziouv nyei ⟨Laengz Ngaengc Waac Faang⟩ taux jiex nyei dorngx se cing-nzengc.”
12Saa^lo^morn yiem ninh ceix daaih nyei ziec-dorngh, se yiem Ziouv nyei biauv nyei gaengh ndaangc capv cuotv nyei dorngx nza'hmien maengx nyei ziec-dorngh, fongc horc buov ziec nyei ga'naaiv bun Ziouv. 13Ninh ziux Mose paaiv ziangx weic hnoi-hnoi ziec nyei ga'naaiv, se weic ⟨Dingh Gong Hnoi,⟩ bieqc Siang-Hlaax, caux yietc hnyangx jiex nyei buo norm zipv. Wuov deix buo norm zipv se Maiv An Bingv nyei Njuov nyei Zipv caux Siou Gaeng-Zuangx nyei Zipv caux ⟨Dingh Gong Hnoi,⟩ 14Ei ninh nyei die, Ndaawitv, liepc daaih nyei leiz ninh paaiv ziangx sai mienh benx yietc guanh yietc guanh ziux ninh mbuo nyei gong. Ninh yaac paaiv ⟨Dingh Gong Hnoi,⟩ baaux nzung ceng Tin-Hungh yaac tengx sai mienh ziux ninh mbuo hnoi-hnoi qiemx zuqc longc. Ninh yaac paaiv ziangx zuov gaengh mienh benx yietc guanh yietc guanh zuov jienv dauh dauh gaengh weic zuqc Tin-Hungh nyei mienh, Ndaawitv, hatc ziangx oix zuqc hnangv naaiv nor zoux. 15Ninh mbuo ei jienv hungh paaiv zuangx sai mienh caux Lewi Mienh, weic siou jaaix nyei ga'naaiv nyei dorngx ninh mbuo maiv bungx ndortv.
16Yiem ninh mbuo liepc zaangc Ziouv nyei biauv nyei gorn-ndoqv taux ih hnoi, ninh mbuo ei jienv Saa^lo^morn paaiv nyei waac zoux. Hnangv naaic zaangc Ziouv nyei biauv ceix ziangx nzengc aqv.
17Nqa'haav Saa^lo^morn mingh E^ndom nyei koiv-hlen nyei E^si^on Ge^mbe caux Elatv. 18Hilaam paaiv deix ninh ganh nyei nzangv caux nzangv-jien, dongh guenx koiv nyei mienh mingh caux Saa^lo^morn nyei nzangv-jien nzaeng nzangv mingh taux Ofi. Ninh mbuo dorh nduoh cin feix baeqv hmz ziepc joih jiem nzuonx Saa^lo^morn Hungh wuov.