15

Yu^ndaa Nyei Hungh, Aa^saa^li^yaa

(Beiv mangc 2 Zunh Doic Douh 26:1-23)

1Ye^lo^mbo^am zoux I^saa^laa^en nyei hungh nyic ziepc cietv hnyangx wuov hnyangx, Aa^maa^si^yaa nyei dorn, Aa^saa^li^yaa, faaux weic zoux Yu^ndaa nyei hungh. 2Faaux weic zoux hungh wuov zanc ninh nyei hnyangx-jeiv duqv ziepc luoqc hnyangx. Ninh yaac yiem Ye^lu^saa^lem gunv hmz ziepc nyeic hnyangx. Ninh nyei maa nyei mbuox heuc Ye^ko^li^yaa, se Ye^lu^saa^lem Mienh. 3Ziux Ziouv mangc ninh zoux duqv horpc hnangv ninh nyei die, Aa^maa^si^yaa nor. 4Mv baac yiem hlang zaangc zienh nyei dorngx ninh maiv caeqv. Baeqc fingx corc yiem wuov fongc horc ziec yaac buov hung.
5Ziouv bun Aa^maa^si^yaa zuqc zeqc naanc, bun ninh butv ⟨gomh huv baengc,⟩ butv taux ninh daic yaac oix zuqc yiem ganh norm hungh dinc gu'nyuoz. Ninh nyei dorn, Yotaam, goux hungh dinc yaac gunv guoqv zaangc nyei baeqc fingx.
6Aa^saa^li^yaa zoux zengc njiec nyei sic, caux ninh zoux nyei yietc zungv, fiev jienv Yu^ndaa hungh nyei hungh douh daan. 7Aa^saa^li^yaa guei seix mi'aqv, yaac caux ninh nyei ong-taaix zangx jienv yiem Ndaawitv nyei Zingh. Ninh nyei dorn, Yotaam, yaac nzipc jienv ninh zoux hungh.

I^saa^laa^en Nyei Hungh, Se^kaa^li^yaa

8Aa^saa^li^yaa zoux Yu^ndaa nyei hungh faah ziepc betv hnyangx wuov hnyangx, Ye^lo^mbo^am nyei dorn, Se^kaa^li^yaa, yiem Saa^maa^lie faaux weic zoux I^saa^laa^en nyei hungh yaac gunv juqv hlaax nyieqc. 9Ziux Ziouv mangc, ninh zoux waaic sic, hnangv ninh nyei ong-taaix nor. Ninh maiv guangc Ne^mbatc nyei dorn, Ye^lo^mbo^am, zoux nyei zuiz, dongh ninh bun I^saa^laa^en Mienh baamz nyei zuiz.
10Yaa^mbetc nyei dorn, Sanlum, beic ndiev caangh laangh ngaengc Se^kaa^li^yaa. Ninh dorng jienv baeqc fingx daix Se^kaa^li^yaa aengx div ninh zoux hungh. 11Se^kaa^li^yaa zoux liuz zengc njiec nyei sic fiev jienv I^saa^laa^en hungh nyei hungh douh daan. 12Naaiv se cuotv daaih doix-diuc Ziouv caux Ye^hu gorngv jiex nyei waac. Ninh gorngv, “Meih nyei zeiv-fun duqv zueiz I^saa^laa^en nyei weic taux da'feix doic.”

I^saa^laa^en Nyei Hungh, Sanlum

13Utc^si^yaa zoux Yu^ndaa nyei hungh faah ziepc juov hnyangx wuov hnyangx, Yaa^mbetc nyei dorn, Sanlum, yiem Saa^maa^lie faaux weic gunv yietc hlaax nyieqc. 14Gaa^ndi nyei dorn, Me^naa^hem, yiem Ti^laa^saa Zingh mingh taux Saa^maa^lie yaac yiem wuov daix Yaa^mbetc nyei dorn, Sanlum, aengx nzipc jienv ninh zoux hungh.
15Sanlum zoux liuz zengc njiec nyei sic, caux ninh dorh mienh beic ndiev caangh laangh nyei sic, fiev jienv I^saa^laa^en hungh nyei hungh douh daan.
16Me^naa^hem yiem Ti^laa^saa mingh wuov zanc, ninh mborqv Tipv^saax caux huing nzuonx nyei dorngx nyei zuangx mienh, weic zuqc ninh mbuo maiv kangv koi zingh laatc nyei gaengh. Ninh luv nzengc wuov norm zingh yaac piqv nqoi dauh dauh maaih gu'nguaaz nyei m'sieqv dorn.

I^saa^laa^en Nyei Hungh, Me^naa^hem

17Aa^saa^li^yaa zoux Yu^ndaa nyei hungh faah ziepc juov hnyangx wuov hnyangx, Gaa^ndi nyei dorn, Me^naa^hem, faaux weic zoux I^saa^laa^en nyei hungh, yiem Saa^maa^lie gunv ziepc hnyangx. 18Ziux Ziouv mangc ninh zoux waaic sic. Yiem ninh zoux hungh nyei ziangh hoc ninh maiv guangc Ne^mbatc nyei dorn, Ye^lo^mbo^am, zoux nyei waaic sic, dongh ninh dorh I^saa^laa^en Mienh baamz nyei zuiz.
19Atc^si^lie nyei hungh, Bulaa, bieqc daaih mborqv I^saa^laa^en Mienh. Me^naa^hem ziouc bun i waanc yietc cin joih nyaanh weic bun Bulaa tengx ninh nyei guoqv wuonv. 20Me^naa^hem mingh beqv I^saa^laa^en Mienh bun wuov deix nyaanh. Dauh dauh butv-zoih mienh, yietc dauh oix zuqc bun ziepc hmz lungz nyaanh weic jiu bun Atc^si^lie nyei hungh. Atc^si^lie nyei hungh ziouc tuix baeng nzuonx nzengc mi'aqv. Maiv yiem wuov norm guoqv aqv. 21Me^naa^hem zoux liuz zengc njiec nyei sic, caux ninh zoux nyei yietc zungv, fiev jienv I^saa^laa^en hungh nyei hungh douh daan. 22Me^naa^hem guei seix mi'aqv. Ninh nyei dorn, Be^kaa^hi^yaa, yaac nzipc jienv ninh zoux hungh.

I^saa^laa^en Nyei Hungh, Be^kaa^hi^yaa

23Aa^saa^li^yaa zoux Yu^ndaa nyei hungh hmz ziepc hnyangx wuov hnyangx, Me^naa^hem nyei dorn, Be^kaa^hi^yaa, faaux weic zoux I^saa^laa^en nyei hungh yaac gunv i hnyangx. 24Ziux Ziouv mangc, Be^kaa^hi^yaa zoux waaic sic. Ninh maiv guangc Ne^mbatc nyei dorn, Ye^lo^mbo^am, baamz nyei zuiz, dongh ninh bun I^saa^laa^en Mienh baamz nyei zuiz. 25Maaih dauh ninh nyei domh baeng-bieiv, Le^maa^li^yaa nyei dorn, Bekaa, beic ndiev caangh laangh ngaengc ninh. Ninh dorh hmz ziepc dauh Gi^le^aatc Mienh caux ninh mingh Saa^maa^lie, yiem hungh dinc gu'nyuoz yietc norm wuonv nyei dorngx, daix ninh caux Aan^gopc caux Aa^li^e. Daix liuz, Bekaa faaux weic div Be^kaa^hi^yaa zoux hungh.
26Be^kaa^hi^yaa zoux zengc njiec nyei sic, caux ninh zoux nyei yietc zungv, fiev jienv I^saa^laa^en hungh nyei hungh douh daan.

I^saa^laa^en Nyei Hungh, Bekaa

27Aa^saa^li^yaa zoux Yu^ndaa nyei hungh hmz ziepc nyeic hnyangx wuov hnyangx, Le^maa^li^yaa nyei dorn, Bekaa, yiem Saa^maa^lie faaux weic zoux I^saa^laa^en nyei hungh yaac gunv nyic ziepc hnyangx. 28Ziux Ziouv mangc, Bekaa zoux waaic sic. Ninh maiv guangc Ne^mbatc nyei dorn, Ye^lo^mbo^am, zoux nyei zuiz, dongh ninh bun I^saa^laa^en Mienh baamz nyei zuiz.
29Bekaa zoux jienv I^saa^laa^en nyei hungh nyei ziangh hoc, Atc^si^lie nyei hungh, Tikv^latv Bi^le^se, daaih caangv I^yon, Aa^mben Mbetc Maa^aa^kaa, Yaa^no^aa, Ke^ndetc caux Haaso Zingh yaac caangv Gi^le^aatc, Gaa^li^li, caux gormx Napv^taa^li Deic. Ninh yaac guaatv wuov deix dorngx nyei baeqc fingx mingh Atc^si^lie. 30Utc^si^yaa nyei dorn, Yotaam, zoux Yu^ndaa nyei hungh nyic ziepc hnyangx wuov hnyangx, Elaa nyei dorn, Ho^se^yaa, beic ndiev caangh laangh ngaengc Le^maa^li^yaa nyei dorn, Bekaa, ziouc daix ninh yaac faaux weic zoux hungh div ninh.
31Bekaa zoux zengc njiec nyei sic, caux ninh zoux nyei yietc zungv, fiev jienv I^saa^laa^en hungh nyei hungh douh daan.

Yu^ndaa Nyei Hungh, Yotaam

(Beiv mangc 2 Zunh Doic Douh 27:1-9)

32Le^maa^li^yaa nyei dorn, Bekaa, zoux I^saa^laa^en nyei hungh da'nyeic hnyangx wuov hnyangx, Utc^si^yaa nyei dorn, Yotaam, faaux weic zoux Yu^ndaa nyei hungh. 33Wuov zanc ninh nyei hnyangx-jeiv duqv nyic ziepc hmz hnyangx. Ninh yiem Ye^lu^saa^lem gunv ziepc luoqc hnyangx. Ninh nyei maa nyei mbuox heuc Ye^lu^saa, se Saax^ndokc nyei sieqv. 34Ziux Ziouv mangc ninh zoux duqv horpc, hnangv ninh nyei die, Utc^si^yaa, nor. 35Mv baac ninh maiv caeqv yiem hlang zaangc zienh nyei dorngx guangc. Baeqc fingx corc yiem naaic fongc horc ziec yaac buov hung. Yotaam ceix zaangc Ziouv nyei biauv Wuov Jiex Bung nyei Laatc Gaengh.
36Yotaam zoux zengc njiec nyei sic caux ninh zoux nyei yietc zungv, fiev jienv Yu^ndaa hungh nyei hungh douh daan. 37(Yiem Yotaam zoux hungh nyei ziangh hoc, Ziouv paaiv Silie nyei hungh, Lesin, caux I^saa^laa^en nyei hungh, Le^maa^li^yaa nyei dorn, Bekaa, daaih mborqv Yu^ndaa.) 38Yotaam guei seix mi'aqv, yaac caux ninh nyei ong-taaix zangx jienv ninh nyei ong-taaix, Ndaawitv, nyei Zingh. Ninh nyei dorn, Aa^hatc, yaac nzipc jienv ninh zoux hungh.