21

Yu^ndaa Nyei Hungh, Maa^natv^se

(Beiv mangc 2 Zunh Doic Douh 33:1-20)

1Maa^natv^se faaux weic zoux hungh wuov zanc, ninh duqv ziepc nyeic hnyangx. Ninh yiem Ye^lu^saa^lem gunv hmz ziepc hmz hnyangx. Ninh nyei maa nyei mbuox heuc Hepv^si^mbaa. 2Ziux Ziouv mangc ninh zoux waaic sic. Ninh ei jienv Ziouv zunc cuotv I^saa^laa^en Mienh nyei wuov ndaangc maengx wuov deix fingx-fingx mienh zoux gamh nziev haic nyei sic. 3Ninh aengx ceix jiez dongh ninh nyei die, He^se^ki^yaa, baaic waaic wuov deix yiem hlang zaangc zienh nyei dorngx. Ninh aengx weic ⟨Mbaa^an zienh⟩ ceix ziec-dorngh, yaac zoux ⟨Mbaa^an zienh⟩ zienh nyeiz nyei fangx, hnangv I^saa^laa^en nyei hungh, Aa^hapc, nor. Ninh baaix yaac zaangc lungh zaangc nyei nyungc-nyungc. 4Ninh yiem zaangc Ziouv nyei biauv ceix ziec-dorngh, se yiem Ziouv gorngv, “Yie oix liepc yie nyei Mengh yiem Ye^lu^saa^lem,” wuov norm dorngx. 5Ninh yiem zaangc Ziouv nyei biauv i norm laatc gu'nyuoz nyei dorngx weic lungh zaangc nyei nyungc-nyungc ceix ziec-dorngh. 6Ninh zorqv ninh ganh nyei dorn buov ziec, yaac zoux faatv, mangc maengc, gaanv hei, mbouv guaax. Ziux Ziouv mangc ninh zoux waaic sic camv haic, cuoqv Ziouv qiex jiez haic.
7Ninh zorqv ninh zuqc daaih wuov norm ⟨Aa^se^laa⟩ zienh nyeiz nyei fangx an jienv zaangc Ziouv nyei biauv gu'nyuoz. Se naaiv norm biauv Ziouv gorngv mbuox Ndaawitv caux ninh nyei dorn, Saa^lo^morn, “Se naaiv norm biauv caux Ye^lu^saa^lem Zingh yie yiem fingx-fingx I^saa^laa^en Mienh mbu'ndongx ginv cuotv daaih liepc yie ganh nyei Mengh weic yietc liuz. 8Se gorngv I^saa^laa^en Mienh faix fim ei jienv yie hatc nyei yietc zungv waac zoux yaac ei jienv yie nyei bou, Mose, jiu bun ninh mbuo nyei yietc zungv leiz-latc, yie zungv maiv bun ninh mbuo zuqc zunc cuotv.” 9Mv baac ninh mbuo maiv muangx. Maa^natv^se baeng ninh mbuo zoux waaic sic gauh camv Ziouv yiem I^saa^laa^en Mienh nyei wuov ndaangc maengx mietc wuov deix fingx-fingx mienh.
10Ziouv longc ninh nyei bou, douc waac mienh, gorngv, 11“Yu^ndaa nyei hungh, Maa^natv^se, zoux naaiv deix gamh nziev haic, youx haic nyei sic. Ninh zoux gauh waaic yiem ndaangc ninh wuov deix Aa^mo^lai Mienh. Ninh longc ninh nyei miuc-fangx bun Yu^ndaa Mienh baamz zuiz camv haic. 12Weic naaiv, Ziouv, I^saa^laa^en Mienh nyei Tin-Hungh, gorngv, ‘Yie oix bun Ye^lu^saa^lem caux Yu^ndaa zuqc domh zeqc naanc. Haaix dauh haiz naaiv deix sic, m'normh ziouc nqingx nzengc wuov. 13Yie oix dingc Ye^lu^saa^lem nyei zuiz hnangv yie dingc Saa^maa^lie nyei zuiz nor, yaac hnangv yie dingc Aa^hapc nyei zeiv-fun nyei zuiz. Yie oix sortv Ye^lu^saa^lem hnangv mienh sortv yienv nor. Sortv liuz aengx nqopv jienv. 14Yie oix guangc yie zengc njiec nyei mienh, zorqv ninh mbuo jiu bun ninh mbuo nyei win-wangv. Ninh mbuo ziouc zuqc win-wangv luv ninh mbuo, caangv ninh mbuo, 15weic zuqc ei yie mangc, ninh mbuo zoux waaic sic yiem ninh mbuo nyei ong-taaix cuotv I^yipv taux ih hnoi.’+”
16Maiv daan mbuoqc naaiv. Maa^natv^se daix kuv mienh, bun nziaamv liouc cuotv camv, zungv buangv Ye^lu^saa^lem yiem naaiv bung mingh taux wuov bung. Cuotv liuz naaiv, ninh bun Yu^ndaa Mienh baamz zuiz, ziux Ziouv mangc ninh mbuo ziouc zoux waaic sic.
17Maa^natv^se gunv nyei ziangh hoc zoux liuz zengc njiec nyei sic, caux ninh zoux nyei yietc zungv, caux ninh baamz nyei zuiz, fiev jienv Yu^ndaa hungh nyei hungh douh daan. 18Maa^natv^se guei seix mi'aqv, yaac zangx jienv yiem ninh nyei hungh dinc nyei huingx, se Utc^saa nyei huingx. Ninh nyei dorn, Aamon, nzipc jienv ninh zoux hungh.

Yu^ndaa Nyei Hungh, Aamon

(Beiv mangc 2 Zunh Doic Douh 33:21-25)

19Aamon faaux weic zoux hungh wuov zanc, ninh nyei hnyangx-jeiv duqv nyic ziepc nyeic hnyangx. Ninh yiem Ye^lu^saa^lem gunv i hnyangx. Ninh nyei maa nyei mbuox heuc Me^sun^le^metv. Se Yotv^mbaa Mienh, Haalutv, nyei sieqv. 20Ziux Ziouv mangc, Aamon zoux waaic sic hnangv ninh nyei die, Maa^natv^se, zoux nor. 21Ninh zuotc ninh nyei die nyei yietc zungv nyungc zeiv zoux. Ninh zaangc yaac baaix ninh nyei die zaangc nyei miuc-fangx. 22Ninh guangc Ziouv, ninh nyei nyei ong-taaix nyei Tin-Hungh, maiv yangh Ziouv nyei jauv.
23Aamon nyei jien daav za'eix ngaengc ninh ziouc yiem hungh dinc gu'nyuoz daix ninh. 24Mv baac Yu^ndaa Deic-Bung nyei baeqc fingx daix dongh daav za'eix daix hungh diex wuov deix mienh. Ninh mbuo yaac liepc Aamon nyei dorn, Yo^si^yaa, div ninh zoux hungh.
25Aamon gunv nyei ziangh hoc zoux liuz zengc njiec nyei sic fiev jienv Yu^ndaa hungh nyei hungh douh daan. 26Ninh zangx jienv Utc^saa nyei huingx, ninh ganh nyei zouv. Ninh nyei dorn, Yo^si^yaa, nzipc jienv ninh zoux hungh.