5

Naa^aa^maan Duqv Zorc Longx

1Naa^aa^maan zoux Silie hungh nyei domh baeng-bieiv. Ninh nyei ziouv funx ninh zoux longc jienv nyei mienh yaac taaih ninh, weic zuqc Ziouv longc ninh tengx Silie Guoqv duqv hingh. Ninh benx yietc dauh mborqv jaax henv nyei mienh, mv baac ninh butv ⟨gomh huv baengc.⟩
2Maaih nzunc Silie nyei ziex guanh baeng mingh mborqv I^saa^laa^en Deic-Bung wuov zanc ninh mbuo caangv duqv dauh sieqv-faix. Naaiv dauh sieqv-faix fu-sux Naa^aa^maan nyei auv. 3Wuov dauh sieqv gorngv mbuox ninh nyei ziouv, Naa^aa^maan nyei auv, “Feix duqv yie nyei ziouv mingh buangh yiem Saa^maa^lie nyei douc waac mienh. Naaiv dauh mienh haih zorc ninh nyei baengc longx.”
4Naa^aa^maan ziouc mingh mbuox ninh nyei ziouv, Silie nyei hungh diex, wuov dauh I^saa^laa^en sieqv hnangv haaix nor gorngv, 5Silie nyei hungh gorngv, “Meih gunv mingh aqv maah! Yie ziouc fungx fienx mingh bun I^saa^laa^en nyei hungh.” Naa^aa^maan ziouc cuotv jauv, dorh jienv nyic baeqv ziepc joih nyaanh caux feix ziepc faam joih jiem caux ziepc yiemc lui-houx mingh. 6Ninh dorh mingh bun I^saa^laa^en nyei hungh wuov zeiv fienx hnangv naaiv nor gorngv, “Yie fungx naaiv zeiv fienx caux yie nyei domh jien, Naa^aa^maan, mingh meih naaic weic tov meih zorc ninh nyei ndopv huv baengc longx.”
7I^saa^laa^en nyei hungh doqc liuz naaiv zeiv fienx, ninh ⟨betv ninh nyei lui⟩ yaac gorngv, “Yie zoux Tin-Hungh? Haih bun mienh daic, bun mienh nangh fai? Naaiv dauh mienh cingx fungx fienx heuc yie zorc naaiv dauh mienh nyei gomh huv baengc longx. Mangc maah! Ninh kungx lorz sic caux yie nzaeng hnangv.”
8Tin-Hungh nyei mienh, E^li^saa, haiz gorngv hungh diex betv ninh nyei lui, ninh ziouc paaiv mienh mingh gorngv, “Meih weic haaix diuc betv meih nyei lui? Gunv heuc naaic dauh mienh daaih yie naaiv. Ninh ziouc hiuv duqv yiem I^saa^laa^en Deic-Bung maaih dauh douc waac mienh.” 9Naa^aa^maan ziouc dorh jienv ninh nyei yietc zungv maaz caux maaz-cie mingh dingh jienv E^li^saa nyei gaengh ndaangc. 10E^li^saa heuc dauh douc fienx mienh cuotv mingh mbuox Naa^aa^maan, “Mingh Jor^ndaen Ndaaih nzaaux siec nzunc sin. Meih nyei orv ziouc longx hnangv loz wuov nor. Meih yaac cing-nzengc mi'aqv.”
11Mv baac Naa^aa^maan qiex jiez jienv mingh mi'aqv. Ninh gorngv, “Yie laaic ninh oix cuotv daaih lorz yie, souv jienv daux gaux heuc Ziouv, ninh nyei Tin-Hungh, nyei mbuox, yaac huangx buoz yiem butv baengc nyei dorngx gu'nguaaic, zorc yie nyei gomh huv baengc longx. 12Ndaa^matv^gatc nyei ndaaih, Aa^mbaa^naa caux Faan^baa, maiv zeiz gauh longx I^saa^laa^en nyei diuh diuh wuom fai? Yie yiem wuov nzaaux yaac haih duqv cing-nzengc daaih maiv zeiz?” Ninh ziouc daaux sin qiex jiez jienv mingh mi'aqv.
13Mv baac Naa^aa^maan nyei bou mingh taux ninh nyei nza'hmien gorngv, “Domh Gorx aac, se gorngv wuov dauh douc waac mienh heuc meih zoux yietc nyungc hlo nyei sic, domh gorx m'daaih zoux nyei maiv zeiz? Hnangv naaic, ninh mbuox domh gorx, ‘Mingh nzaaux ziouc cing-nzengc aqv,’ maiv zeiz gauh oix zuqc zoux fai?” 14Naa^aa^maan ziouc ei jienv Tin-Hungh nyei mienh nyei waac njiec Jor^ndaen Ndaaih ziemx siec nzunc. Ninh nyei orv ziouc nzuonx loz hnangv fu'jueiv nyei orv nor, ninh yaac cing-nzengc mi'aqv.
15Naa^aa^maan caux gan ninh nyei yietc zungv mienh nzuonx taux Tin-Hungh nyei mienh wuov, souv jienv E^li^saa nyei nza'hmien gorngv, “Ih zanc yie hiuv duqv yiem lungh ndiev maiv maaih Tin-Hungh cuotv liuz yiem I^saa^laa^en Deic-Bung. Ih zanc tov zipv yie, meih nyei bou, oix jiu bun nyei zingh nyeic.”
16E^li^saa dau, “Yie ziangv jienv ziangh jienv nyei Ziouv, dongh yie fu-sux wuov dauh laengz waac, yie maiv zipv yietc nyungc.” Maiv gunv Naa^aa^maan qaqv tov ninh longc, ninh ngaengc jienv maiv longc.
17Naa^aa^maan gorngv, “Meih za'gengh maiv longc nor, tov meih bun gaux i dauh lorh tor nyei nie yie, meih nyei bou, weic zuqc yiem naaiv mingh meih nyei bou maiv fongc horc buov ziec nyei ga'naaiv fai longc haaix nyungc ziec haaix dauh zienh cuotv liuz ziec bun Ziouv. 18Mv baac tov Ziouv guangc yie, meih nyei bou, zoux nyei naaiv yietc nyungc sic. Se yie nyei ziouv bieqc Limmon zienh nyei miuc-biauv ndoqv njiec baaix nyei ziangh hoc, ninh yaac bangc yie nyei buoz bieqc, yie yaac yiem wuov ndoqv njiec. Yie yiem Limmon nyei miuc-biauv ndoqv njiec nyei ziangh hoc, tov Ziouv guangc nqoi yie, meih nyei bou, nyei zuiz.”
19E^li^saa gorngv, “Meih gunv baengh orn nyei nzuonx.”
 Naa^aa^maan cuotv jauv mingh maiv gaengh go ndongc haaix,
20Tin-Hungh nyei mienh, E^li^saa nyei bou, Ge^haa^si, yiem hnyouv hnamv, “Yie nyei ziouv ba'laqc korv-lienh Naa^aa^maan, maiv longc yietc nyungc ninh dorh daaih nyei ga'naaiv. Yie ziangv jienv ziangh jienv nyei Ziouv laengz yie oix tiux mingh zunc zaaic tov deix ninh nyei ga'naaiv.”
21Ge^haa^si ziouc gaanv jienv gan Naa^aa^maan mingh. Naa^aa^maan buatc dauh mienh tiux jienv daaih, ninh ziouc njiec cie zipv. Ninh gorngv, “Maaih haaix nyungc jauv fai?”
22Ge^haa^si dau, “Maiv maaih haaix nyungc lorqc. Yie nyei ziouv paaiv yie daaih gorngv, ‘A'jang maaih i dauh wuov guanh douc waac mienh nyei mienh lunx mienh yiem E^faa^im nyei mbong-aiv dorngx daaih. Tov bun nyic ziepc yietv joih nyaanh ninh mbuo caux i yiemc lui-houx.’+”
23Naa^aa^maan gorngv, “Tov dorh feix ziepc nyeic joih nyaanh mingh maah!” Ninh qaqv tov Ge^haa^si longc ziouc zorqv feix ziepc nyeic joih nyaanh dapv i norm mbuoqc, aengx zorqv i yiemc lui-houx dapv jienv. Ninh yaac bun i dauh bou ndaam jienv mingh. Wuov deix bou ndaam jienv mingh ndaangc Ge^haa^si. 24Taux mbong-aiv, Ge^haa^si zorqv bou ndaam nyei ga'naaiv hietv jienv biauv ziouc heuc wuov deix bou nzuonx. Ninh mbuo yaac nzuonx mi'aqv. 25Nqa'haav ninh bieqc mingh souv jienv ninh nyei ziouv, E^li^saa, nyei nza'hmien.
 E^li^saa naaic, “Ge^haa^si aac, meih mingh haaix nzuonx?”
 Ge^haa^si dau, “Yie, meih nyei bou, maiv mingh haaix.”
26Mv baac E^li^saa gorngv mbuox ninh, “Wuov dauh mienh daaux sin daaih zipv meih nyei ziangh hoc, yie nyei hnyouv maiv caux meih mingh fai? Ih zanc se taux ziangh hoc zipv nyaanh zipv lui-houx fai zipv ga'lanv huingx, a'ngunc huingx, ngongh guanh, ba'gi yungh guanh, nouh gauv nouh beiz nyei ziangh hoc fai? 27Weic naaiv Naa^aa^maan nyei gomh huv baengc ziouc jiex meih caux meih nyei zeiv-fun yietc liuz oix butv.” Ge^haa^si ziouc yiem E^li^saa nyei nza'hmien cuotv mingh. Ninh butv gomh huv baengc. Ninh nyei ndopv mbopv baeqc nyei, hnangv sorng nor.