7

1Mv baac E^li^saa gorngv, “Meih mbuo muangx Ziouv nyei waac maah! Ziouv hnangv naaiv nor gorngv, ‘Njang hnoi leih maiv go naaiv norm ziangh hoc, yiem Saa^maa^lie nyei zingh gaengh, siec morqv mbuonv maaic duqv nyic zinh lengh nyaanh. Ziepc hmz morqv mbiauh mbaali yaac maaic duqv nyic zinh lengh nyaanh.’+”
2Maaih dauh hungh diex nyei sin-hlen baeng gorngv, “Mangc maah! Ziouv bun lungh gaengh nqoi nzengc, zungv maiv haih maaih naaiv nyungc sic saah?”
 E^li^saa dau, “Meih ganh nyei m'zing duqv buatc mv baac meih maiv duqv nyanc yietc deix.”

Silie Mienh Nyei Baeng Tuix Nzengc

3Yiem zingh gaengh ndaangc maaih biei dauh butv ⟨gomh huv baengc⟩ nyei mienh. Ninh mbuo laanh gorngv mbuox laanh, “Mbuo weic haaix diuc zueiz jienv naaiv zuov daic? 4Se gorngv mbuo gorngv, ‘Mbuo bieqc zingh maah!’ yiem wuov zingh ngorc hnaangx, mbuo yaac zuqc daic. Se gorngv mbuo zueiz jienv naaiv, mbuo yaac zuqc daic. Hnangv naaic, daaih maah! Mbuo mingh Silie Mienh nyei ciangv. Se gorngv ninh mbuo liouh mbuo nyei maengc ziouc duqv ziangh. Se gorngv ninh mbuo daix mbuo, mbuo ziouc zuqc daic.”
5Taux nziemx-yaangh nyei ziangh hoc, ninh mbuo mingh Silie Mienh nyei ciangv. Taux ciangv ga'hlen, maiv buatc yietc dauh mienh yiem wuov, 6weic zuqc Ziouv bun Silie Mienh nyei baeng muangx haiz mborqv jaax nyei maaz-cie caux maaz caux domh baeng-guanh nyei qiex mbui. Ninh mbuo ziouc laanh mbuox laanh, “Mangc maah! I^saa^laa^en nyei hungh cingv Hitv^tai Mienh nyei hungh caux I^yipv nyei hungh daaih mborqv mbuo.” 7Nziemx-yaangh nyei ziangh hoc ninh mbuo ziouc biaux, guangc jienv ninh mbuo nyei ndopv-liuh, ninh mbuo nyei maaz caux lorh. Ninh mbuo ziang naaic guangc jienv ndopv-liuh ciangv biaux mi'aqv.
8Wuov deix butv gomh huv baengc nyei mienh mingh taux ciangv ga'hlen bieqc norm ndopv-liuh. Ninh mbuo youc nyanc youc hopv, aengx zorqv jiem nyaanh caux lui-houx dorh mingh bingx jienv. Ninh mbuo aengx nzuonx daaih bieqc ganh norm ndopv-liuh, zorqv yiem wuov norm nyei ga'naaiv fih hnangv nyei dorh mingh bingx.
9Nqa'haav ninh mbuo laanh gorngv mbuox laanh, “Mbuo hnangv naaiv zoux se maiv horpc. Ih hnoi maaih kuv fienx. Se gorngv mbuo maiv mbuox mienh aengx zuov taux lungh njang, zuiz ziouc ndortv zuqc mbuo aqv. Daaih maah! Mbuo ih zanc mingh mbuox hungh diex nyei jien.”
10Ninh mbuo ziouc mingh heuc zuov zingh gaengh nyei mienh yaac mbuox ninh mbuo, “Yie mbuo bieqc Silie Mienh nyei ndopv-liuh ciangv. Maiv buatc haaix dauh mienh yaac maiv haiz haaix dauh nyei qiex mbui. Kungx maaih maaz caux lorh ndoh jienv wuov. Ndopv-liuh yaac hnangv wuov.” 11Zuov gaengh nyei mienh ziouc heuc, yaac maaih mienh mbuox taux hungh dinc.
12Lungh muonz zanc hungh diex jiez sin mbuox ninh nyei jien, “Yie mbuox meih mbuo, Silie Mienh hnangv haaix nor zoux bun mbuo. Ninh mbuo hiuv duqv mbuo ngorc hnaangx, ninh mbuo ziouc cuotv ciangv bingx jienv ciangv ga'hlen. Ninh mbuo hnamv daaih, ‘Ninh mbuo ndongc haaix zungv oix cuotv zingh.’ Ninh mbuo ziouc liemh nangh nyei zorqv yie mbuo aengx bieqc zingh aqv.”
13Maaih dauh ninh nyei jien gorngv mbuox hungh diex, “Bun deix mienh geh biaa dauh yiem zingh gu'nyuoz zengc njiec nyei maaz, mingh mangc gaax hnangv haaix nor. Se gorngv ninh mbuo zuqc daic, ninh mbuo ziouc hnangv yiem naaiv zengc njiec nyei I^saa^laa^en Mienh daic nor. Se hnangv yiem naaiv zuqc daic mingh nyei I^saa^laa^en Mienh. Tov paaiv deix mienh mingh mangc gaax.”
14Ninh mbuo ziouc paaiv i norm maaz-cie caux maaz mingh zunc Silie nyei baeng-guanh. Hungh diex jaa waac gorngv, “Meih mbuo mingh mangc gaax maaih haaix nyungc sic cuotv.” 15Ninh mbuo ziouc gan jienv Silie baeng mingh taux Jor^ndaen Ndaaih. Ziangh diuh jauv buatc Silie Mienh gaanv biaux nyei ziangh hoc guangc nyei lui-houx caux jaa-sic. Naaiv deix douc fienx mienh ziouc nzuonx mingh mbuox hungh diex. 16Zuangx mienh ziouc cuotv mingh luv Silie Mienh nyei ciangv. Hnangv naaic siec morqv mbuonv maaic duqv nyic zinh lengh nyaanh. Ziepc hmz morqv mbiauh mbaali yaac maaic duqv nyic zinh lengh nyaanh. Hnangv Ziouv gorngv jiex nyei waac nor.
17Hungh diex paaiv yiem ninh nyei sin-hlen wuov dauh baeng zuov zingh gaengh. Zuov gaengh nyei ziangh hoc ninh zuqc caaiv daic mi'aqv, hnangv hungh diex mingh Tin-Hungh nyei mienh nyei biauv Tin-Hungh nyei mienh jaa-ndaangc gorngv nyei waac nor. 18Sic cuotv daaih hnangv Tin-Hungh nyei mienh gorngv mbuox hungh diex. Ninh gorngv, “Njang hnoi leih maiv go naaiv norm ziangh hoc, yiem Saa^maa^lie nyei zingh gaengh, siec morqv mbiauh maaic duqv nyic zinh lengh nyaanh. Ziepc hmz morqv mbiauh mbaali yaac maaic duqv nyic zinh lengh nyaanh.”
19Wuov dauh baeng-bieiv zinh ndaangc gorngv mbuox Tin-Hungh nyei mienh “Mangc maah! Maiv gunv Ziouv bun lungh gaengh nqoi nzengc, zungv maiv haih maaih naaiv nyungc sic saah?” Tin-Hungh nyei mienh dau, “Meih ganh nyei m'zing duqv buatc mv baac meih maiv duqv nyanc yietc deix.” 20Za'gengh cuotv daaih hnangv naaic nor, weic zuqc yiem wuov zingh gaengh ninh zuqc zuangx mienh caaiv daic mi'aqv.