8

Sunem Mienh M'sieqv Dorn Duqv Ninh Nyei Ndau Nzuonx

1E^li^saa gorngv mbuox dauh m'sieqv dorn, dongh ninh nyei dorn daic, E^li^saa tengx nangh daaih wuov dauh, “Meih caux meih nyei biauv zong mienh oix zuqc cuotv naaiv norm dorngx mingh yiem meih ganh yiem duqv nyei dorngx, weic zuqc Ziouv dingc ziangx bun naaiv norm deic-bung buangh siec hnyangx domh huaang domh ngorc.” 2Wuov dauh m'sieqv dorn ziouc ei jienv Tin-Hungh nyei mienh, E^li^saa, mbuox nyei waac zoux. Ninh caux ninh nyei yietc biauv mienh cuotv mingh yiem Fi^li^saa^die Deic-Bung siec hnyangx.
3Siec hnyangx jiex liuz, wuov dauh m'sieqv dorn yiem Fi^li^saa^die Deic-Bung nzuonx ziouc mingh lorz hungh diex tov ninh nyei biauv caux lingh deic nzuonx. 4Mingh tov wuov zanc, hungh diex caux Tin-Hungh nyei mienh nyei bou, Ge^haa^si, gorngv jienv waac. Hungh diex mbuox Ge^haa^si, “Tov meih gorngv E^li^saa zoux yietc zungv mbuoqc horngh nyei sic bun yie muangx.” 5Ge^haa^si gorngv jienv mbuox hungh diex E^li^saa hnangv haaix nor tengx daic mingh nyei mienh nangh daaih wuov zanc, dongh ninh nyei dorn daic, E^li^saa tengx nangh daaih wuov dauh m'sieqv dorn taux daaih weic tov hungh diex bun ninh nyei biauv caux lingh deic nzuonx.
 Ge^haa^si gorngv, “Yie nyei ziouv, yie nyei hungh aah! Dongh naaiv dauh m'sieqv dorn. Naaiv yaac ninh nyei dorn, dongh daic mingh E^li^saa tengx nangh daaih wuov dauh.”
6Hungh diex naaic wuov dauh m'sieqv dorn taux naaiv deix jauv, wuov dauh m'sieqv dorn ziouc gorngv bun ninh muangx.
 Hungh diex ziouc paaiv dauh jien mbenc ninh nyei sic, gorngv mbuox ninh, “Da'faanh benx naaiv dauh m'sieqv dorn nyei yietc zungv ga'naaiv oix zuqc fungx nzuonx bun ninh, liemh ninh cuotv deic-bung wuov hnoi taux ih zanc ninh nyei ndau cuotv nyei buonc oix zuqc fungx nzuonx.”

Haa^saa^en Duqv Zoux Silie Nyei Hungh

7E^li^saa mingh taux Ndaa^matv^gatc Zingh. Wuov zanc Silie nyei hungh, Mben Haa^ndatc, butv baengc. Maaih mienh gorngv mbuox hungh diex, “Tin-Hungh nyei mienh daaih taux naaiv.” 8Hungh diex ziouc mbuox Haa^saa^en. “Dorh zingh nyeic mingh buangh Tin-Hungh nyei mienh. Tov ninh naaic Ziouv, ‘Yie butv naaiv norm baengc haih longx nyei fai?’+”
9Haa^saa^en mingh buangh E^li^saa, yaac longc feix ziepc dauh lorh torh tor jienv Ndaa^matv^gatc Zingh gauh longx jiex nyei ga'naaiv zoux zingh nyeic bun E^li^saa. Ninh souv jienv E^li^saa nyei nza'hmien wuov zanc ninh gorngv, “Meih nyei bou, Silie nyei hungh, Mben Haa^ndatc, heuc yie daaih naaic meih, ‘Yie butv naaiv norm baengc haih longx nyei fai?’+”
10E^li^saa dau, “Nzuonx mingh mbuox Mben Haa^ndatc, ‘Meih za'gengh haih longx.’ Mv baac Ziouv, bun yie hiuv duqv ninh za'gengh oix zuqc daic.” 11Tin-Hungh nyei mienh, E^li^saa, nuqv-nuqv nyei mangc Haa^saa^en taux Haa^saa^en siangx nyaiv nyei. Tin-Hungh nyei mienh yaac nyiemv aqv.
12Haa^saa^en naaic gaax, “Domh Gorx aac, meih zoux haaix nyungc nyiemv?”
 E^li^saa dau, “Weic zuqc yie hiuv duqv meih oix hnangv haaix nor zoux hoic I^saa^laa^en Mienh. Meih oix longc douz buov ninh mbuo weih jienv wuonv nyei dorngx, longc nzuqc ndaauv daix ninh mbuo nyei mienh lunx mienh, zorqv ninh mbuo nyei fu'jueiv-faix guaeqv daic, yaac piqv nqoi maaih gu'nguaaz nyei m'sieqv dorn nyei ga'sie.”
13Haa^saa^en gorngv, “Yie, meih nyei bou, kungx ndongc dauh juv hnangv. Fungc haih zoux duqv cuotv naaiv deix domh sic?”
 E^li^saa dau, “Ziouv bun yie hiuv duqv meih oix duqv zoux Silie nyei hungh.”
14Haa^saa^en ziouc leih nqoi E^li^saa nzuonx taux ninh nyei ziouv, Mben Haa^ndatc, wuov. Mben Haa^ndatc naaic ninh, “E^li^saa hnangv haaix nor gorngv?”
 Haa^saa^en dau, “Ninh mbuox yie, meih nyei baengc za'gengh haih longx nyei.”
15Mv baac da'nyeic hnoi Haa^saa^en zorqv kuaaiv suangx ziemx wuom daaih opv jienv hungh diex nyei hmien. Hungh ziouc daic mi'aqv. Haa^saa^en ziouc nzipc jienv zoux Silie nyei hungh.

Yu^ndaa Nyei Hungh, Ye^ho^lam

(Beiv mangc 2 Zunh Doic Douh 21:1-20)

16I^saa^laa^en nyei hungh, Aa^hapc nyei dorn, Yolam, zoux hungh da'hmz hnyangx wuov hnyangx, Ye^ho^saa^fatv nyei dorn, Ye^ho^lam, faaux weic zoux Yu^ndaa nyei hungh. 17Dongh ninh faaux weic zoux hungh wuov zanc, ninh nyei hnyangx-jeiv duqv faah ziepc nyeic hnyangx. Ninh yiem Ye^lu^saa^lem gunv hietc hnyangx. 18Ninh ei jienv I^saa^laa^en nyei hungh nyei za'eix, se hnangv Aa^hapc wuov biauv mienh, weic zuqc ninh longc Aa^hapc nyei sieqv zoux auv. Ziux Ziouv mangc ninh zoux waaic sic. 19Mv baac Ziouv weic ninh nyei bou, Ndaawitv, maiv mietc Yu^ndaa, weic zuqc ninh laengz bun Ndaawitv yietc liuz maaih zeiv-fun zoux hungh.
20Ye^ho^lam zoux hungh nyei ziangh hoc, E^ndom Deic ngaengc jienv Yu^ndaa ziouc liepc ninh mbuo ganh nyei hungh. 21Ye^ho^lam ziouc dorh jienv ninh nyei yietc zungv mborqv jaax nyei maaz-cie mingh taux Saax^i wuov. E^ndom nyei baeng weih jienv ninh caux zaangv mborqv jaax cie nyei zuangx baeng-bieiv, mv baac Ye^ho^lam mbuo lungh muonz zanc mborqv tong weih jienv nyei mienh ziouc duqv biaux cuotv. Ninh nyei baeng yaac biaux nzuonx biauv nzengc mi'aqv. 22E^ndom ziouc ngaengc jienv Yu^ndaa taux ih jaax hnoi. Lipv^naa Zingh yaac doix wuov deix ziangh hoc fih hnangv nyei ngaengc.
23Ye^ho^lam zoux hungh gunv nyei ziangh hoc zengc njiec nyei sic caux ninh zoux nyei yietc zungv, fiev jienv Yu^ndaa hungh nyei hungh douh daan. 24Ye^ho^lam ziouc guei seix mi'aqv, yaac caux ninh nyei ong-taaix zangx jienv Ndaawitv nyei Zingh. Ninh nyei dorn, Aa^hatc^yaa, ziouc nzipc jienv ninh zoux hungh.

Yu^ndaa Nyei Hungh, Aa^hatc^yaa

(Beiv mangc 2 Zunh Doic Douh 22:1-6)

25Aa^hapc nyei dorn, Yolam, zoux I^saa^laa^en nyei hungh ziepc nyeic hnyangx wuov hnyangx, Ye^ho^lam nyei dorn, Aa^hatc^yaa, faaux weic zoux Yu^ndaa nyei hungh. 26Aa^hatc^yaa duqv zoux hungh wuov zanc ninh nyei hnyangx-jeiv duqv nyic ziepc nyeic hnyangx. Ninh yiem Ye^lu^saa^lem gunv yietc hnyangx. Ninh nyei maa se I^saa^laa^en hungh, Omli nyei sieqv-fun, mbuox heuc Aa^taa^li^yaa. 27Aa^hatc^yaa ei jienv Aa^hapc wuov biauv mienh nyei za'eix zoux. Ziux Ziouv mangc ninh zoux waaic sic hnangv Aa^hapc zoux nor, weic zuqc ninh benx Aa^hapc nyei hungh douh nyei yietc dauh sieqv-laangh.
28Aa^hatc^yaa caux Aa^hapc nyei dorn, Yolam, cuotv mingh taux Laamotv Gi^le^aatc caux Silie nyei hungh, Haa^saa^en, mborqv jaax. Silie Mienh zoux bun Yolam zuqc mun. 29Yolam ziouc nzuonx taux Yitv^le^en zorc ninh yiem Laamotv caux Silie hungh, Haa^saa^en, mborqv jaax zuqc Silie baeng bun ninh zuqc mun nyei dorngx longx.
 Yu^ndaa nyei hungh, Ye^ho^lam nyei dorn, Aa^hatc^yaa, ziouc njiec taux Yitv^le^en mangc Aa^hapc nyei dorn, Yolam, weic zuqc Yolam zuqc mun.