4
Cov Yixayee tsw yeem rov lug cuag Vaajtswv
1Mej cov maum nyuj Npasaa
kws nyob sau lub roob Xamali,
ca le noog tej lug nuav.
Mej quab yuam cov tuabneeg pluag
hab zuaj cov tuabneeg txom nyem,
hab has rua mej tug quasyawg tas,
“Ca le muab cawv lug rua peb haus.”
2Vaajtswv Yawmsaub tuav nwg txujkev dawb huv
cog lug twv has tas,
“Saib nawj, lub caij lub nyoog
kws luas yuav muab nqai lauj
nqai mej moog yeej yuav lug,
mas mej txhua tug yuav raug luas
muab nuv ntseg nqai moog taag nrho huvsw.
3Mej txhua tug yuav tawm huv tej qhov ntsaa loog kws pob
ncaaj nraim moog,
hab yuav raug muab laim pov tseg rua ntawm Hamoos.”
Yawmsaub has le nuav ntaag.
4“Mej ca le lug rua ntawm Npe‑ee
hab ua txhum los maj,
ca le lug rua ntawm Kilakaa
hab ua tej kev faav xeeb
ntau quas zug tuaj los maj,
ca le coj tej tsaj tuaj xyeem txhua taagkig,
hab coj ib feem kaum tuaj txhua txhua peb nub.
5Ca le muab tej ncuav xyaw keeb lug
hlawv xyeem ua tsaug,
hab tshaaj tawm txug tej kws mej zoo sab pub
hab khaav txug tej hov.
Cov Yixayee 'e, mej yeej nyam ua le nuav.”
Vaajtswv Yawmsaub has le nuav ntaag.
6“Thoob plawg huv mej txhua lub moos
kuv ca mej tej kaug nav tau su,
hab ca mej tu ncua tsw muaj mov noj
rua huv mej txhua lub chaw,
los mej tseed tsw rov lug cuag kuv.”
Yawmsaub has le nuav ntaag.
7“Tseed tshuav peb lub hlis le txug caij hlais qoob
tassws kuv taav tsw pub naag lug rua mej lawm.
Kuv pub naag lug rua ib lub moos,
tseg ib lub moos,
ib daim teb muaj naag lug,
ib daim teb tsw muaj naag lug, qoob qhuav taag.
8Ob lub peb lub moos txhad le tuaj moog
nrhav dej haus rua huv ib lub moos,
kuj tsw tau haus tsau,
los mej tseed tsw rov lug cuag kuv.”
Yawmsaub has le nuav ntaag.
9“Kuv ua rua mej tej qoob
ua npluag hab tuaj pwm,
kuv ua rua mej tej vaaj hab mej tej vaaj txwv maab
puam tsuaj taag,
kooj ntaas noj mej tej txwv cua tej txwv aulib taag,
los mej tseed tsw rov lug cuag kuv.”
Yawmsaub has le nuav ntaag.
10“Kuv tso tej mob kis kws muaj rua huv
Iyi tebchaws lug raug mej,
kuv xuas nav ntaaj tua mej tej tub hluas pov tseg,
hab coj mej tej neeg moog,
kuv ua rua mej tej yeej ua rog
tsw lwj quas lawg rua huv mej qhov ntswg,
los mej tseed tsw rov lug cuag kuv.”
Yawmsaub has le nuav ntaag.
11“Kuv muab mej ib txha rhuav tshem
ib yaam le Vaajtswv rhuav tshem lub moos Xauntoo
hab lub moos Kaumaula,
mas mej zoo le tug qaab tawg
kws luas thau huv cub tawg lug,
los mej tseed tsw rov lug cuag kuv.”
Yawmsaub has le nuav ntaag.
12“Cov Yixayee 'e, vem le nuav
kuv yuav ua le nuav rua mej.
Cov Yixayee 'e, vem kuv yuav ua le nuav rua mej,
ca le npaaj ntswb mej tug Vaajtswv.”
13Tug kws puab tej roob hab tswm tej cua,
hab has tej kws nwg xaav tseg rua tuabneeg paub,
yog tug kws muab kaaj ntug ua qhov tsaus ntuj lawm,
hab moog lug sau tej chaw sab huv lub nplajteb,
nwg lub npe hu ua Yawmsaub,
yog Vaajtswv kws muaj fwjchim luj kawg nkaus.