17

Mikaa Nyei Miuc-Fangx

1Maaih dauh mienh yiem E^faa^im nyei mbong-aiv dorngx. Ninh nyei mbuox heuc Mikaa. 2Ninh gorngv mbuox ninh nyei maa, “Maaih mienh nimc maa nyei wuov deix hietc joih nyaanh. Maa zioux wuov dauh janx-zaqc, yie yaac haiz mi'aqv. Mangc gaax! Wuov deix nyaanh yiem yie naaiv. Se yie zorqv.”
 Ninh nyei maa ziouc gorngv, “Yie nyei dorn aac, tov Ziouv ceix fuqv bun maa nyei dorn oc.”
3Mikaa ziouc zorqv wuov deix hietc joih nyaanh daaih bun ninh nyei maa. Ninh nyei maa gorngv, “Naaiv deix nyaanh maa zorqv daaih fongc horc bun Ziouv weic bun aa dorn longc zoux norm ndingh daaih caux norm dox daaih nyei miuc-fangx. Maa ziouc aengx zorqv nyaanh jiu nzuonx bun aa dorn.”
4Mikaa zorqv wuov deix nyaanh fungx nzuonx bun ninh nyei maa liuz, ninh nyei maa ziouc zorqv yietc joih ziepc betv lungz nyaanh dorh mingh bun nyaanh zaangc tengx ndingh norm caux dox norm miuc-fangx. Naaiv deix miuc-fangx an jienv Mikaa nyei biauv gu'nyuoz.
5Naaiv dauh Mikaa maaih ninh ganh zaangc zienh nyei dorngx. Ninh zoux norm ⟨efotv⟩ caux deix miuc-fangx, yaac paaiv dauh ninh nyei dorn zoux ninh nyei sai mienh. 6Wuov jaax lungh ndiev maiv maaih hungh diex gunv I^saa^laa^en Mienh. Gorqv-mienh ziouc sueih eix ziux gorqv-mienh nyei hnyouv zoux.
7Maaih dauh mienh lunx mienh, se Yu^ndaa bungh buonc nyei ⟨Lewi Mienh,⟩ yiem Yu^ndaa Deic nyei Mbetc^le^hem Mungv. 8Ninh cuotv Yu^ndaa Deic, Mbetc^le^hem Mungv, oix lorz ganh norm dorngx yiem. Yangh jauv mingh wuov zanc ninh mingh taux E^faa^im nyei mbong-aiv dorngx, Mikaa nyei biauv wuov.
9Mikaa naaic gaax ninh, “Meih yiem haaix daaih?”
 Ninh dau, “Yie se Lewi Mienh, yiem Yu^ndaa Deic, Mbetc^le^hem Mungv daaih. Yie oix lorz norm dorngx yiem.”
10Mikaa ziouc gorngv mbuox ninh, “Meih gunv caux yie yiem naaiv maah! Meih ziouc zoux hnangv yie nyei die caux yie nyei sai mienh. Yie laengz yietc hnyangx bun faam-lungz nyaanh caux yietc yiemc lui-houx caux jienv nyanc hopv.” 11Naaiv dauh Lewi Mienh buangv hnyouv caux Mikaa yiem. Ninh yaac hnangv benx Mikaa ganh nyei dorn. 12Mikaa ziouc orn naaiv dauh Lewi mienh lunx mienh daaih benx ninh nyei sai mienh, yiem jienv Mikaa nyei biauv. 13Mikaa gorngv, “Ih zanc yie hiuv duqv Ziouv oix ceix fuqv bun yie duqv longx, weic zuqc yie maaih dauh Lewi Mienh tengx yie zoux sai mienh.”