7

Gi^nde^on Mborqv Hingh Mi^ndien Mienh

1Yelupv Mbaa^an, se Gi^nde^on, caux jienv gan ninh wuov deix mienh, jiez sin nziouv nyei mingh liepc ciangv yiem Haalotv wuom-zingv ga'hlen. Mi^ndien Mienh nyei ciangv yiem ninh mbuo nyei baqv bung, nitv fatv Mo^le Mbong. 2Ziouv gorngv mbuox Gi^nde^on, “Gan meih nyei mienh ba'laqc camv haic. Yie ziouc maiv haih zorqv Mi^ndien Mienh jiu bun yiem ninh mbuo nyei buoz-ndiev. Nzauh heix I^saa^laa^en Mienh oix ceng-hlo doix yie gorngv, ‘Yie mbuo ganh nyei qaqv njoux cuotv yie mbuo ganh.’ 3Weic naaiv meih oix zuqc zunh bun zuangx mienh muangx, ‘Haaix dauh gamh nziex, sin zinx jienv yiem nor, wuov dauh gunv leih Gi^le^aatc Mbong nzuonx biauv aqv.’ ” Wuov zanc maaih i waanc i cin dauh mienh nzuonx biauv. Zengc njiec yietc waanc dauh yiem wuov hnangv.
4Ziouv gorngv mbuox Gi^nde^on, “Gan meih nyei mienh corc camv haic. Meih oix zuqc dorh ninh mbuo mingh taux wuom. Yiem wuov yie ziouc weic meih seix ninh mbuo. Yie gorngv mbuox meih, ‘Bun naaiv dauh caux meih mingh,’ wuov dauh oix zuqc caux meih mingh. Yie mbuox meih, ‘Maiv dungx bun naaiv dauh caux meih mingh,’ wuov dauh maiv duqv mingh aqv.”
5Gi^nde^on ziouc dorh wuov deix mienh njiec taux wuom-hlen. Ziouv gorngv mbuox Gi^nde^on, “Da'faanh longc mbietc mbiec wuom hnangv juv wuov deix, oix zuqc bun ninh mbuo ganh yiem norm dorngx. Gueic njiec hopv wuom wuov deix, yaac oix zuqc bun ganh yiem norm dorngx.” 6Longc buoz puangv wuom faaux daaih mbiec wuov deix maaih faam-baeqv dauh. Zengc njiec wuov deix yietc zungv gueic njiec hopv.
7Ziouv gorngv mbuox Gi^nde^on, “Yie oix longc mbiec wuom naaiv deix faam-baeqv dauh weic njoux meih mbuo, zorqv Mi^ndien Mienh jiu bun yiem meih nyei buoz-ndiev. Zengc njiec wuov deix, gunv bun gorqv-mienh nzuonx gorqv-mienh nyei biauv aqv.” 8Gi^nde^on bun wuov deix nzengc njiec nyei mienh nzuonx ninh mbuo ganh nyei biauv, mv baac ninh liouh njiec wuov deix faam-baeqv dauh. Ninh mbuo yaac longc nzuonx biauv wuov deix mienh nyei bienh fuix caux jorng.
 Mi^ndien Mienh nyei ciangv yiem Gi^nde^on wuov ndiev maengx nyei horngz.
9Dongh naaic muonz Ziouv gorngv mbuox Gi^nde^on, “Jiez sin daaih njiec mingh mborqv Mi^ndien Mienh nyei ciangv, weic zuqc yie zorqv ninh mbuo jiu bun yiem meih nyei buoz-ndiev. 10Mv baac se gorngv meih gamh nziex, maiv gaamv mingh nor, gunv dorh meih nyei bou, Bulaa, caux jienv meih mingh wuov norm ciangv. 11Meih duqv muangx haiz ninh mbuo gorngv haaix nyungc, nqa'haav meih ziouc maaih qaqv henv jiez daaih, haih njiec mingh mborqv wuov norm ciangv.” Gi^nde^on ziouc dorh jienv ninh nyei bou, Bulaa, njiec mingh taux win-wangv nyei ciangv ga'hlen, baeng zuov nyei dorngx. 12Mi^ndien Mienh, Aa^maa^lekv Mienh caux dong bung nyei mienh yiem wuov norm horngz ndongc jopv-nyeic camv. Ninh mbuo nyei lorh torh camv gau, saauv zungv maiv zienz, ndongc koiv-hlen nyei saa-ziou camv.
13Gi^nde^on mingh taux wuov zanc, maaih dauh mienh gorngv ninh mbeix nyei mbeix bun ninh nyei doic muangx. Ninh gorngv, “Yie mbeix norm mbeix nor. Yie mbeix buatc maaih norm mbaali njuov njangx bieqc Mi^ndien Mienh nyei ciangv zong zuqc ndopv-liuh mbaang, zungv mbienv nzuonx mbitv mbeih nyei yiem wuov ndau.”
14Ninh nyei doic dau, “Naaiv se I^saa^laa^en Mienh, Yo^aatc nyei dorn, Gi^nde^on, nyei nzuqc ndaauv. Tin-Hungh zorqv Mi^ndien Mienh caux yietc zungv jun-baeng jiu bun yiem ninh nyei buoz-ndiev mi'aqv.”
15Gi^nde^on haiz liuz naaiv norm mbeix caux porv mbeix nyei eix leiz, ninh ziouc baaix Tin-Hungh. Baaix liuz, ninh nzuonx I^saa^laa^en Mienh nyei ciangv mingh gorngv, “Jiez sin daaih maah! Ziouv zungv zorqv Mi^ndien Mienh nyei jun-baeng jiu bun yiem meih mbuo nyei buoz-ndiev.” 16Gi^nde^on ziouc zorqv wuov deix faam-baeqv dauh baeng bun nqoi zoux buo guanh. Ninh bun dauh dauh nanv jienv jorng caux nie-mor-kungx, dapv douz-baav gu'nyuoz.
17Gi^nde^on mbuox ziangx ninh mbuo, “Meih mbuo mangc yie maah! Yie hnangv haaix nor zoux, meih mbuo yaac oix zuqc hnangv wuov nor zoux. Taux ciangv ga'hlen, baeng zuov nyei dorngx, yie zoux haaix nyungc meih mbuo yaac gan jienv zoux. 18Yie caux gan yie wuov deix biomv jorng nyei ziangh hoc, meih mbuo weih gormx Mi^ndien Mienh nyei ciangv nyei mienh oix zuqc biomv meih mbuo nyei jorng yaac heuc jienv gorngv, ‘Weic Ziouv yaac weic Gi^nde^on.’+”
19Gi^nde^on caux gan ninh wuov deix yietc baeqv dauh mienh ziouc mingh taux ciangv ga'hlen ndaamv muonz nyei dorngx, doix Mi^ndien Mienh coqv hoqc tiuv liuz siouv gaeng mienh nyei ziangh hoc. Gi^nde^on mbuo ziouc biomv ninh mbuo nyei jorng, yaac mborqv huv dongh ninh mbuo nanv jienv nyei nie-mor. 20Buo guanh baeng zungv biomv jorng yaac mborqv huv nie-mor. Zaaix jieqv buoz nanv jienv douz-baav, mbiaauc jieqv buoz nanv jienv ninh mbuo oix biomv nyei jorng. Ninh mbuo yaac heuc jienv gorngv, “Nzuqc ndaauv weic Ziouv yaac weic Gi^nde^on.” 21Gi^nde^on mbuo gorqv-mienh souv jienv gorqv-mienh nyei dorngx weih gormx ciangv. Mi^ndien nyei jun-baeng mbiouh mbiouh nyei heuc jienv tiux biaux.
22Gi^nde^on mbuo biomv faam-baeqv norm jorng wuov zanc, Ziouv bun gormx wuov norm ciangv nyei Mi^ndien Mienh longc nzuqc ndaauv, meih daix yie, yie daix meih. Jun-baeng biaux gan Se^le^laa Mungv mingh taux Mbetc Qitv^taa Mungv, aengx mingh taux Aa^mben Me^ho^laa Mungv, nitv Tapv^mbaatc Saengv nyei gapv-jaaix. 23Gi^nde^on heuc Napv^taa^li, Aa^se caux yietc zungv Maa^natv^se Deic nyei I^saa^laa^en Mienh cuotv daaih tengx zunc Mi^ndien Mienh mingh. 24Gi^nde^on bun douc fienx mienh cuotv mingh gormx E^faa^im nyei mbong-aiv dorngx mbuox mienh, “Njiec daaih tengx jienv mborqv Mi^ndien Mienh, yaac yiem ninh mbuo nyei wuov ndaangc maengx caangv jiex Jor^ndaen Ndaaih nyei norm-norm jauv-bouc mingh taux Mbetc^mbaa^laa^aa Saengv.”
 Wuov deix douc fienx mienh heuc E^faa^im nyei zuangx mienh cuotv daaih. Ninh mbuo ziouc caangv duqv Jor^ndaen Ndaaih nyei wuom-bouc mingh taux Mbetc^mbaa^laa^aa.
25Ninh mbuo yaac zorqv duqv i dauh Mi^ndien Mienh nyei bieiv-zeiv, Olepv caux Se^epc. Ninh mbuo yiem Olepv nyei la'bieiv-mbaengx daix Olepv, yaac yiem Se^epc nyei nyueih a'ngunc biouv nyei zorngh daix Se^epc, aengx zunc jienv Mi^ndien Mienh mingh. Ninh mbuo yaac dorh Olepv caux Se^epc nyei m'nqorngv daaih taux Jor^ndaen Ndaaih dong bung maengx bun Gi^nde^on.