19

  1Zoux duqv zingx nyei mienh jomc mienh
   zungv gauh longx mienh hngongx mienh gorngv-baeqc.
  2Mienh maiv maaih wuonh zaang se maiv benx.
   Hnyouv beqv nyei mienh yaac haih zoux dorngc sic.
  3Mienh laaix ganh hngongx zuqc baaic,
   ninh nyei hnyouv qiex jiez haic Ziouv.
  4Maaih zinh maaih nyaanh ziouc maaih gorx-youz camv,
   mv baac maiv maaih zinh nyaanh nyei mienh zuqc gorx-youz guangc.
  5Zoux jaav zorng-zengx nyei mienh simv maiv ndutv zuqc dingc zuiz.
   Gorngv-baeqc nyei mienh setv mueiz yaac biaux maiv ndutv.
  6Hnyouv jangv nyei mienh maaih mienh camv tov ninh tengx.
   Fungx zingh nyeic nyei mienh duqv dauh dauh zoux ninh nyei doic.
  7Mienh jomc mienh nyei yietc zungv muoz-doic youx ninh,
   ninh nyei loz-gaeng gauh fatv simv.
  Ninh gan jienv ninh mbuo longc waac tov
   mv baac ninh mbuo mingh mi'aqv.
  8Duqv cong-mengh nyei mienh hnamv ganh,
   goux jienv wuonh zaang nyei mienh oix duqv longx.
  9Zoux jaav zorng-zengx nyei mienh simv maiv ndutv zuqc dingc zuiz,
   gorngv-baeqc nyei mienh yaac oix zuqc mietc.
  10Mienh hngongx mienh hnangv butv-zoih mienh yiem se maiv puix,
   zoux nouh nyei mienh gunv zoux ziouv nyei mienh gauh fatv maiv puix.
  11Hnamv duqv tong nyei mienh maiv qiex jiez siepv,
   guangc nqoi zuqc mienh zoux dorngc nyei jauv se bun ganh duqv mienh taaih.
  12Hungh diex qiex jiez se hnangv sienh njunh nor,
   mv baac ninh nyei en hnangv mbiungc-suiv pinx miev.
  13Hngongx nyei fu'jueiv haih bun domh mienh zuqc baaic.
   Auv hengx nzaeng jaax se hnangv mbiungc maiv dingh liouh nyei ndiepv jienv yiem.
  14Biauv caux zinh zoih yiem die nzipc daaih,
   mv baac guai nyei auv se Ziouv ceix bun.
  15Zoux lueic nyei jauv bun mienh m'njormh duqv ndo.
   Kungx oix henh nyei mienh oix zuqc ngorc.
  16Gan leiz-latc nyei mienh goux ninh nyei maengc,
   mv baac ngaengc Tin-Hungh nyei doz wuov dauh oix zuqc daic.
  17Haaix dauh korv-lienh mienh jomc mienh se hnangv gaav ga'naaiv bun Ziouv.
   Weic ninh zoux longx nyei jauv Ziouv oix winh bun ninh.
  18Dongh maaih lamh hnamv nyei ziangh hoc oix zuqc mborqv njaaux meih nyei fu'jueiv.
   Maiv dungx dingc sueih ninh zuqc mietc.
  19Ga'qiex beqv nyei mienh oix zuqc dingc zuiz,
   se gorngv meih njoux ninh meih zungv oix zuqc aengx njoux.
  20Oix zuqc muangx mienh kuinx, muangx mienh njaaux,
   weic bun meih nqa'haav hingv haih maaih cong-mengh.
  21Mienh nyei hnyouv daav za'eix camv,
   mv baac Ziouv nyei za'eix oix duqv liepc jiez.
  22Mienh gauh oix jiex nyei se maaih hnyouv ziepc zuoqv nyei hnamv.
   Mienh jomc mienh corc gauh longx gorngv-baeqc nyei mienh.
  23Taaih Ziouv ziouc bun mienh duqv maengc ziangh,
   duqv daaih nyei mienh buangv hnyouv nyei hitv kuonx,
   yaac maiv zuqc haaix nyungc hoic.
  24Mienh lueic mienh nyei buoz lom bieqc nzormc,
   zungv maiv kangv bouh faaux ganh nyei nzuih.
  25Oix zuqc mborqv huotv nyei mienh,
   maiv hiuv haaix nyungc nyei mienh ziouc haih hoqc duqv guai.
  Oix zuqc kuinx haih mengh baeqc nyei mienh,
   ninh ziouc haih maaih wuonh zaang.
  26Zoux doqc ninh nyei die yaac zunc ninh nyei maa guangc nyei mienh,
   se zuqc nyaiv, zuqc mienh mangc piex nyei dorn.
  27Yie nyei dorn aac, se gorngv meih guangc, maiv muangx njaaux nyei jauv,
   meih ziouc leih nqoi maaih wuonh zaang nyei waac.
  28Maiv lamh longc nyei zorng-zengx mienh jatv baengh fim nyei jauv,
   orqv mienh nyei nzuih kungx naqv zoux dorngc nyei zuiz.
  29Maaih dingc zuiz nyei jauv liuc leiz ziangx weic huotv nyei mienh,
   yaac liuc leiz ziangx mborqv mienh hngongx mienh nyei diqc daanz.