20

1Dak play kriăk ƀâu jêng nơm blau mưch, ndrănh katang jêng nơm tâm djrel;
 mbu nơm nhêt rlau keh ir mâu di ôh jêng bunuynh gĭt nau.
2Nau hađăch ji nuih nâm bu yau mŭr rđuh ngrông,
 mbu nơm nsônh păng ăn roh nau rêh păng nơm.
3Der mâu ƀư ôh nau tâm djrel jêng nau yơk ma bunuyh,
 ƀiă lah kanŏng bunuyh rluk tŭp tâm nau nây.
4Bunuyh ƀlao mâu kai ôh mir dôl yan ji kăt,
 ta yan kăch păng mâu mra geh play ôh.
5Nau mĭn ŭch tâm nuih n'hâm jêng nâm bu dak jru,
 ƀiălah bunuyh gĭt rbăng mra bâk tă bơh nây.
6Âk bunuyh nkoch ma nau păng nơm jêng ueh,
 ƀiălah mbu dơi saơ nơm răp jăp?
7Bunuyh sŏng chuat tâm nau mơih rmên,
 ueh lăng ngăn ma kon sau păng nar kăndơ̆
8Hađăch gŭ ta sưng phat dôih,
 mprơh lĕ nau mhĭk ma măt păng uănh.
9Mbu dơi lah: "Gâp hŏ diôt prăp nuih n'hâm gâp kloh ueh,
 gâp kloh ueh jêh mâu geh nau tih ôh?"
10Bar rplay njing, jêh ri bar njing n'gơch.
 Yêhôva tâm rmot lĕ bar nây.
11Nđâp kon se jê̆ mâm păng jêng dơi mpơl ma nau păng ƀư,
 gĭt lah nau păng ƀư jêng kloh mâu lah sŏng srăng.
12Tôr gĭt tăng jêh ri măt gĭt saơ,
 Yêhôva dadê njêng lĕ bar.
13Lơi ta rŏng ir ôh ma nau bêch klach lah may mra jêng o ach,
 lin măt may mra geh ăp ntil ndơ sông sa.
14Nơm rvăt lah ma ndơ nây mhĭk, mhĭk ngăn,
 ƀiălah jêh păng dâk hăn păng tâm rnê ma păng nơm.
15Geh mah jêh ri ăp ntil lŭ khlay,
 ƀiălah mpiăt gĭt mĭn âk jêng khlay ngăn ngên.
16Sŏk hom ao păng nchăm yorlah păng râng ma bunuyh bunăch,
 ăn păng geh ndơ chăm tơlah păng râng ma bu ur êng.
17Ƀănh geh ma nau ndơm jêng njŭng ma bunuyh,
 ƀiălah dăch dŭt trôm mbung păng bêng ma choih.
18Lĕ nau ŭch jêng nâp yor ma nau tâm chră,
 ƀư nau tâm lơh dơi gay ntĭm ma nau gĭt njrăng.
19Mbu nơm nkoch bri n'hi ƀlêp ƀlêr pơk mpơl nau ndâp,
 pôri lơi tâm rnglăp ôh đah nơm hay ngơi.
20Tơlah du huê bunuyh rak rtăp me mbơ̆ păng;
 ŭnh kađen păng mra nhhât tâm ntŭk ngo klĕng.
21Drăp ndơn gơnh geh ndal ir bơh ntơm bôk saơm mâu mra ăn tât nau ueh uĭn ôh ta nglĕ dŭt.
22Lơi lah ôh: "Gâp mra har plơng ma nau mhĭk",
 gŭ kâp hom Yêhôva,
 Păng mra tâm rklaih may.
23Yêhôva mra tâm rmot ma rplay njing mâu di ôh.
 Jêh ri njing mâu di mâu ƀư maak ma Păng ôh.
24Yêhôva yơh ƀĭt gai nhuat bunuyh,
 pô nây mâm bunuyh dơi gĭt rbăng trong păng nơm?
25Jêng dăk bu sân yơh ma bunuyh mâu chrê ma nau păng ton nhhơr ăn ndơ kloh ueh,
 jêh ri pakơi jêh nau păng ton ri mơ plơ̆ mĭn rvê tay đŏng.
26Du huê hađăch gĭt nau ƀư roh lơi phung mhĭk.
 Jêh ri păng ăn bu rvah jâng ndeh ta kalơ phung nây.
27Huêng tâm kon bunuyh jêng ŭnh kađen Yêhôva,
 păng sek uănh tât ta ntŭk ndâp tâm trôm nuih n'hâm.
28Nau tâm rŏng jêh ri nau răp jăp king hađăch,
 sưng hađăch dơi jêng nâp yor tă nau tâm rŏng.
29Nau chrêk ma lơp jêng nau katang phung bu klâu ndăm,
 ƀiălah chhŏk nglang (ndra) jêng nau nkrơ̆ ma phung bu ranh.
30Khap sôt rmanh ƀư kloh nau djơh mhĭk,
 jêh ri nau bu dong ƀư kloh ntŭk ndâp tâm trôm nuih n'hâm.