2

Nau Khlay Ma Nau Blau Mĭn

1Hơi kon, tơ lah may sŏk dơn nau gâp ngơi, jêh ri djôt prăp nau gâp ntăm tâm nuih n'hâm may.
2Rkêng tôr ma nau blau mĭn, geh nuih n'hâm ma nau gĭt rbăng;
3Ngăn yơh, tơlah may joi, sek uănh ăn n'hêl nanê̆ jêh ri tơ lah may dăn ma nau gĭt rbăng,
4tơ lah may joi păng nâm bu prăk, jêh ri tĭng păng nâm bu drăp ndơ bu pôn jêh.
5Nôk nây may gĭt rbăng nau klach yơk ma Yêhôva, jêh ri dơi saơ ntil nau blau mĭn Brah Ndu.
6Yorlah Yêhôva ăn nau blau mĭn, bơh bâr Păng tă luh nau blau mĭn jêh ri nau gĭt rbăng.
7Păng prăp nau tâm rklaih ma bunuyh sŏng,
 Păng jêng khêl ma phung chuat tâm nau di.
8Păng n'gang trong phung sŏng, jêh ri mât mray trong phung kloh ueh Păng.
9Nôk nây may mra gĭt rbăng nau sŏng, nau di, nau n'hêl nanê̆ jêh ri lĕ rngôch trong ueh.
10Yorlah nau gĭt rbăng mra lăp tâm nuih n'hâm may, jêh ri huêng may mra sŏk nau blau mĭn mra ƀư maak huêng may.
11Nau blau sek uănh mra mât njrăng may, nau gĭt rbăng mra king may.
12Gay tâm rklaih may tă bơh trong mhĭk, tă bơh bunuyh ngơi nau kue.
13Phung nây chalơi trong nau sŏng-srăng gay chuat tâm nau ngo klĕng.
14Khân păng nđơr ƀư nau mhĭk, khân păng hâk ma nau ƀai phung ƀai.
15Khân păng tĭng trong nau kue, jêh nây ƀư nau ngơi ndơm, jêh ri ƀư hiơt trong khân păng nơm.
16Pô ri nau blau mĭn mra rklaih may bơh nau bu ur văng tĭr nơm joi ndơm may ma nau ngơi n'hi.
17Nơm chalơi sai păng ơm geh jêh bơh păng hôm druh mom.
 Jêh ri chuêl nau tâm rnglăp đah Brah Ndu păng.
18Yor lah ngih păng rklĭng mpeh nau khĭt jêh ri trong păng njŭn tât ta ntŭk ƀon phung khĭt gŭ.
19Phung hăn ma păng mâu mâp plơ̆ sĭt ôh; mâu lĕ khân păng dơi tât ma trong nau rêh.
20Pôri may blau mĭn mra chuat hăn tâm trong bunuyh ueh.
 Jêh ri tĭng trong phung sŏng.
21Yorlah phung sŏng mra dơi chăm bri, jêh ri phung mleh mra gŭ ta nây ƀa ƀơ.
22Ƀiălah phung djơh mhĭk bu mra ƀư rai lơi bơh bri neh, jêh ri phung ƀlêp-ƀlêr bu mra mprơh lơi.