27

Se^lo^fe^hatc Nyei Sieqv

1Se^lo^fe^hatc nyei biaa dauh sieqv nyei mbuox maaih hnangv naaiv, Maa^haa^laa, Noyaa, Hokv^laa, Minkaa caux Ti^laa^saa. Se^lo^fe^hatc se Hefe nyei dorn, Hefe se Gi^le^aatc nyei dorn, Gi^le^aatc se Maa^ki^le nyei dorn, Maa^ki^le se Maa^natv^se nyei dorn, zoux Maa^natv^se Fingx. Maa^natv^se zoux Yosepv nyei dorn. 2Naaiv deix biaa muoz-sieqv mingh taux Wuic Buangh Ndopv-Liuh nyei gaengh ndaangc, souv jienv Mose caux E^le^aa^saa sai mienh caux zuangx bieiv zeiv caux gapv zunv nyei zuangx mienh nyei nza'hmien gorngv, 3“Yie mbuo nyei die yiem wuov deic-bung-huaang daic mi'aqv. Ninh yaac maiv maaih dorn. Ninh maiv caux gan Kolaa wuov deix gapv zunv ngaengc Ziouv. Ninh daic se weic ninh ganh nyei zuiz. 4Laaix yie mbuo nyei die maiv maaih dorn, weic haaix diuc bun ninh nyei mbuox yiem ninh nyei fingx ndortv mingh? Tov bun yie mbuo yiem yie mbuo nyei cien-ceqv mbu'ndongx maaih yie mbuo nzipc nyei buonc maah!”
5Mose ziouc dorh ninh mbuo nyei jauv-louc mbuox Ziouv. 6Ziouv gorngv mbuox ninh, 7“Se^lo^fe^hatc nyei sieqv gorngv duqv horpc nyei. Meih zungv oix zuqc yiem ninh mbuo nyei die nyei muoz-doic mbu'ndongx paaiv ndau bun ninh mbuo nzipc. Zorqv ninh mbuo nyei die nzipc nyei buonc jiu bun ninh mbuo.
8“Mbuox I^saa^laa^en Mienh ‘Se gorngv maaih dauh m'jangc dorn daic mi'aqv, ninh yaac maiv maaih dorn, oix zuqc zorqv ninh nzipc nyei buonc jiu bun ninh nyei sieqv nzipc. 9Se gorngv ninh maiv maaih sieqv, oix zuqc zorqv ninh nzipc nyei buonc jiu bun ninh nyei gorx fai youz nzipc. 10Se gorngv maiv maaih gorx, maiv maaih youz, oix zuqc jiu bun ninh nyei baeqv fai die nyei youz nzipc. 11Se gorngv ninh nyei die maiv maaih gorx, maiv maaih youz, oix zuqc zorqv ninh nzipc nyei buonc jiu bun caux ninh juangc fingx gauh cien jiex wuov dauh, benx wuov dauh nzipc nyei buonc. Naaiv se I^saa^laa^en Mienh nyei leiz-latc caux leiz ziux Ziouv paaiv Mose nor.’+”

Orn Yo^su^waa Div Mose

12Ziouv mbuox Mose, “Oix zuqc faaux naaiv Aa^mbaa^lim Geh Zorng mangc yie jiu bun I^saa^laa^en Mienh nyei deic-bung. 13Mangc liuz, nqa'haav oix zuqc guei seix aqv, hnangv meih nyei gorx Aalon wuov nor. 14Weic zuqc yiem Sin Deic-Bung-Huaang, wuom cuotv nyei dorngx, zuangx mienh ngaengc yie wuov zanc, meih mbuo i dauh maiv ei jienv yie mbuox nyei waac dorng zuangx bun mienh taaih yie cing-nzengc.” (Naaiv norm wuom cuotv nyei dorngx se Me^li^mbaa Wuom, yiem Sin Deic-Bung-Huaang, Kaa^ndetc Deic.)
15Mose gorngv mbuox Ziouv, 16“Ziouv, maanc mienh nyei lingh wuonh nyei Tin-Hungh aac, tov orn dauh mienh gunv naaiv deix zuangx mienh, 17bun ninh haih yiem ninh mbuo nyei nza'hmien bieqc bieqc cuotv-cuotv, yaac haih dorh ninh mbuo bieqc cuotv, weic bun Ziouv nyei baeqc fingx maiv hnangv maiv maaih ziouv goux nyei ba'gi yungh guanh nor.” 18Ziouv gorngv mbuox Mose, “Dorh Nun nyei dorn, Yo^su^waa, daaih. Ninh maaih Singx Lingh yiem hnyouv nyei. Meih oix zuqc dorh buoz maan jienv ninh. 19Yaac bun ninh souv jienv E^le^aa^saa sai mienh caux gapv zunv nyei zuangx mienh nyei nza'hmien, dorng jienv ninh mbuo paaiv ninh. 20Oix zuqc jiu deix meih nyei hatc maaz bun ninh weic bun I^saa^laa^en nyei zuangx mienh muangx ninh nyei waac. 21Ninh oix zuqc souv jienv E^le^aa^saa sai mienh nyei nza'hmien, sai mienh ziouc yiem Ziouv nyei nza'hmien longc Ulim naaic weic tengx dingc hnangv haaix nor zoux. Yo^su^waa caux I^saa^laa^en nyei zuangx mienh oix zuqc ei jienv E^le^aa^saa sai mienh nyei waac bieqc cuotv.”
22Mose ei jienv Ziouv mbuox nyei waac zoux. Ninh dorh Yo^su^waa daaih bun ninh souv jienv E^le^aa^saa sai mienh caux gapv zunv nyei zuangx mienh nyei nza'hmien. 23Ziux Ziouv mbuox nyei waac, Mose yaac dorh buoz maan jienv Yo^su^waa paaiv ninh.