4

Phung Chroh Jêng Nguay

1Pôri gâp, du huê jêng bu nă yor Kôranh Brah vơh vơl ma khân may ăn hăn khư ma kan Brah Ndu kuăl jêh khân may, 2ma nau tông bâr ngăn ngên, jêh ri rdơ̆ rbăn, ma nau srôih ăn khân may tâm dơn ndrăng khân may ma nau rŏng, 3ma nau đăp mpăn ăn khân may srôih djôt prăp nau Brah Huêng Ueh tâm rnglăp.
4Geh knŏng du săk jăn jêh ri du Brah Huêng Ueh nâm bu Brah Ndu kuăl jêh khân may ma kan khân may ma knŏng du nau kâp gân. 5Geh knŏng du huê Kôranh Brah, du ntil nau chroh, du ntil nau ƀaptem. 6Geh knŏng nguay Brah Ndu jêh ri Mbơ̆ ma lĕ rngôch, păng gŭ ta klơ lơn ma lĕ rngôch, ndrel ma lĕ rngôch, jêh ri tâm lĕ rngôch. 7Ăp nơm tâm phung he hŏc geh jêh nau dơi êng êng tĭng nâm Brah Krist ăn. 8Yor nây bu lah jêh pô aơ:
 "Dôl hao klơ, Păng chông leo âk bu nă jêh ri Păng ăn nau yô̆ ma âk bunuyh".
9(Pôri, nâm bu ntĭt nau "Păng hao klơ jêh?" Di lĕ nâm bu ntĭt păng jŭr jêh lĕ tâm ntŭk tâm dâng neh? 10Nơm jŭr jêh jêng Nơm hao jêh lĕ ta klơ lơn ma lĕ rngôch trôk, pôri gay ma mbêng lĕ rngôch).
11Păng yơh ăn nau dơi ma phung kon bunuyh ma phung aơ păng jêng kôranh oh mon, ma phung ri jêng nơm mbơh lor ma phung iti jêng nơm mbơh nau mhe mhan ueh, ma phung ito jêng Kôranh nơm nti, jêh ri nơm nti. 12Păng ƀư pô nây ŭch nkra lơi lĕ rngôch phung chroh gay ma dơi pah kan ma Brah Ndu tât dơi rdâk njêng săk jăn Brah Krist. 13Pôri lĕ rngôch phung he dơi rnglăp jêng nguay tâm nau chroh jêh ri tâm nau gĭt năl Kon Brah Ndu, kŏ he tât văch ma toyh, ăn nŭm nau dăng ktang tâm ban ma Brah Krist nơm. 14Ri he mâu hôm jêng kon se ôh. Lah tât bunuyh blau nkra nau ndơm gay ƀư vĭ lơi he, ŭch đŏt rdu he nâm bu dak njach mâu lah sial khôm leo pachiau pama, he mâu iăt ôh nau khân păng nti nklă nây. 15Ƀiălah he ngơi ngăn ma nuih n'hâm rŏng, dĭng he văch ma toyh ăp kô̆ tâm Brah Krist. 16Păng jêng bôk, păng chiă uănh lĕ săk jăn, ăn ăp kô̆ tâm gop ăn di, tâm khan ăn nâp đah ryôk păng. Pôri lah ăp kô̆ êng êng dơi jêng ăn di, ri mơ săk jăn mra văch ma toyh, tâm n'hao tâm njêng êng păng nơm tâm nau rŏng.

Nau Nti Ăn Blau Du Đah Nau Tih Djơh Mhĭk Neh Ntu Jêh Ri Ăn Nsoh Bunuyh Mhe

17Pô aơ nau gâp lah jêh ri mbơh ma amoh Kôranh Brah, lơi ăn khân may hăn nâm bu phung bu năch ôh. Phung nây tĭng ndô̆ nau mĭn sưr khân păng nơm. 18Nau khân păng gĭt rbăng jêng ngo gŭ ngai đah nau rêh Brah Ndu, yor nau rluk tâm nuih n'hâm luh tă bơh nau dăng nuih n'hâm khân păng. 19Khân păng roh lĕ nuih n'hâm mĭn jêh ri jao khân păng nơm tâm nau blă blơ, ŭch ƀư ăp ntil nau ƀơ̆.
20Ƀiălah mâu di pô nây ôh phung khân may nti gay ma gĭt năl Brah Krist! 21Tơlah khân may tăng jêh nau Păng ngơi jêh ri khân may nti jêh tâm Păng, tĭng nâm nau ngăn tâm Yêsu Krist. 22Ăn khân may chalơi hom nau gŭ ngau krao sach ơm, bunuyh ơm jêng tih mhĭk jêh yor nau kơnh ndơm. 23Ăn khân may ƀư tay ăn mhe tâm nau mĭn khân may. 24Jêh ri ăn khân may soh bunuyh mhe rhăk njêng jêh tĭng nâm bu rup Brah Ndu nơm tâm nau sŏng jêh ri nau kloh ueh luh bơh nau ngăn.
25Pôri yơh, ăn ăp nơm khân may chalơi nau mƀruh, "Ngơi ngăn ma phung chiau meng păng, "yorlah he jêng kômâk jâng jon ndrăng he. 26Tơlah khân may ji nuih, lơi ƀư tih ôh; lơi iang nuih tât nar nhâp ôh. 27Jêh ri lơi trơn ntŭk ăn brah mhĭk ôh. 28Mbu nơm vay ntŭng, lơi hôm ntŭng ôh; ƀiălah ueh lơn ăn păng pah kan sŏng srăng ma ti păng nơm, gay ma geh ndơ ăn ma nơm pưt ndơ. 29Lơi ăn du ntil nau ngơi mhĭk luh tă bơh trôm mbung khân may ôh, ƀiălah tơlah geh nau khlay, ăn khân may ngơi bar pe rplay kơl tâm n'hao nuih, jêh ri jêng ueh ma phung gŭ iăt.
30Lơi ăn rngot Brah Huêng Ueh Brah Ndu ôh, yor ma Păng, Brah Ndu tâp pŏng jêh khân may gay prăp ma nar tâm chuai. 31Ngroh lơi nau tăng bơh khân may, nau tâm nuih, nau khek biănh, nau nter, nau suai rak, jêh ri nau djơh mhĭk. 32Ăn khân may gŭ ueh ndrăng khân may nơm, bêng ma nau blau yô̆, tâm yô̆ an ndrăng khân may nâm bu Brah Ndu yô̆ an jêh ma khân may tâm Brah Krist.